1 Solnomalar Kirish
Kirish
“Solnomalar (birinchi kitob)” va “Solnomalar (ikkinchi kitob)”larda Isroil xalqining tarixi bayon qilinadi. Garchi ikkala kitobda “Shohlar” kitoblaridagi koʻp voqealar takrorlansa ham, Isroil tarixi “Shohlar” kitoblaridagiga qaraganda bir oz boshqacharoq nuqtayi nazardan yoritiladi. “Shohlar” kitoblari Isroil xalqi Bobilga surgun qilingan davrda yozilgan boʻlsa, “Solnomalar” kitoblari xalq surgundan ona yurtiga qaytgandan keyin yozilgan edi. Shu sababdan “Solnomalar” kitoblarida nasabnomalarga, shoh Dovud va shoh Sulaymonning hukmronligi davriga, shuningdek, Maʼbadning qurilishi bilan bogʻliq boʻlgan voqealarga alohida urgʻu va eʼtibor berilgan. Shu orqali muallif surgundan qaytib kelgan xalqni oʻz oʻtmishi bilan bogʻlab turgan rishtalarni koʻrsatmoqchi boʻladi, Xudoning qilayotgan ishlarini madh etadi.
“Solnomalar (birinchi kitob)” va “Solnomalar (ikkinchi kitob)”ning asl nusxasi bitta ibroniycha kitob boʻlib, ikkala qismni bitta oʻramga joylash uzunlik qilgani uchun, kitob ikki qismga — “Solnomalar (birinchi kitob)” va “Solnomalar (ikkinchi kitob)”ga boʻlingan.
“Solnomalar (birinchi kitob)”da shoh Dovud bosh qahramondir. U Quddusni Xudoga sajda qilish markaziga aylantiradi. Xudoga toʻgʻri yoʻllar bilan sajda qilishni oʻz xalqiga oʻrgatadi. Maʼbadni Dovudning oʻgʻli Sulaymon qurgan boʻlsa–da, Dovud Maʼbadning asoschisi sifatida shuhrat qozonadi. U Xudoga chin koʻngildan sajda qiladigan va itoat etadigan inson sifatida namuna qilib koʻrsatiladi.
“Solnomalar (birinchi kitob)”ning koʻp qismida roʻyxat berilgan boʻlib, bu roʻyxatga Odam Atodan shoh Shoul davrigacha boʻlgan nasllar kiritilgan (1-9–boblar). Shoulning oʻlimi toʻgʻrisidagi xabardan keyin (10–bob), shoh Dovudga urgʻu beriladi (11-29–boblar). Dovud qay tarzda shoh boʻlgani va Quddusni poytaxt qilgani hikoya qilinadi. Dovudning sipohlari va lashkarboshilari toʻgʻrisidagi maʼlumot beriladi. Soʻng Dovud muqaddas Ahd sandigʻini yangi joyga — Quddusga koʻchirgani haqida soʻz yuritiladi. Kitobning oxirida Dovud Xudoning Maʼbadini qurish uchun qanday tayyorgarlik koʻrgani va oʻgʻli Sulaymonga sajda marosimlariga oid koʻrsatmalar bergani toʻgʻrisida bayon qilinadi.
Currently Selected:
1 Solnomalar Kirish: O‘zbMK
Highlight
Share
Copy
Want to have your highlights saved across all your devices? Sign up or sign in
© Muqaddas Kitobni tarjima qilish instituti, 2016, 2018, 2020