Room 14

Ii gilɛɛ ra di dɔŋa seriya

1Di Yeesu hiŋri bɛl du de, waa u hiŋaa fɔŋŋa dɔɔwɛ ka ra nyiŋŋi u zuu ii biini, ií lɛɛu du ii biini di gilɛɛ binni lugɔ ií diu hɔɔzi. 2Ii bɛl ra binni lugɔ u daŋ wer di kummaa. Bɛl ge waa u hiŋaa fɔŋŋa dɔɔwɛ nɛnnɛ, di ra di dɔpaŋhoori bɛŋ. Waa ol ra hee. 3Hinla n na di kummaa, gilɛɛ ra gbɛlli unla n na kii aŋhina dii. Hinla n na kii kuna aŋhina dii, gilɛɛ ra ŋɔ lugɔ unla n na di kummaa la ra ɛɛ wichɔgaarɛ, dikuubɛɛwiai, Kɔraawiizi kpaubuu birgi u hor.#Kɔlɔ 2:16-17 4Anɛɛ hiŋ í wer ŋɔ nɛbɛl balii cholloowei? U himmaa dɔɔrii niŋ zum, di u cholloo gɛɛ waa cholle. Wàá gil u chol gba. Kɔraawiizi daŋ gil u wer chi.

5Nɛbɛl ra tɔgzi hɔpizii bɛllɛ kaali aŋhina. Bɛl ge ra ŋɔ lugɔ a maa ɛɛ kpannɛ. A wesso ii maa n zum ii himmaa biine gunla iin niŋ ɛɛ. 6Nɛr la n na tɔgzi hɔpizii bɛl, yaa Dɔɔrii u ra binni di ra tɔgzuu la. Unla n na di kummaa, u Dɔɔrii u ra binni di ra dia la ka ra jaamuu dikuu a wia. Unla n na kiia ge, u ge gba ra binni u Dɔɔrii di ra kiia, ka ge ra jaamuu dikuu anla unna di la wia. 7Yaa bɛl maa waa yaa bɛŋ duwɛɛ yaa miibɔɔ naa wia biini. Yaa bɛl maa ge waa yaa bɛŋ duwɛɛ yaa siu ge biini. 8Di yaa du de di ra nyiŋ, yaa Dɔɔri wiarɛ yaa du de. Di yaa siuwɔ ge, yaa Dɔɔri wiarɛ yaa siu. Awia, di yaa ra nyiŋ gɛɛ yaa waa nyiŋ, ka yaa Dɔɔrii dɔɔ yaa.

9Dikuubɛɛwiai, Kristo siuwɔɔ di kaa izi siu biini, ú wer ɛɛ lalaa ni nyinee maa dɔɔri. 10Hinla n na ŋɔ lugɔ i dɔŋhiŋ ɛɛ wichɔgaarɛ, hìŋ́ niŋ ŋɔ u wia guŋ? Ɛrɛɛ i ra gbɛlli i dɔŋhiŋ gunnɛi? Yaa maanii niŋ ŋmɛnɛ wa chi Kɔraawiizi seriya diiribɔr. 11Ba faa sɛbɔɔrɛ,

“Kɔraawiizi ŋɔwɔɔrɛ,

‘Ií gil n ŋɔ wibii ii nuu.

Miŋ du de saŋa maa wia,

nɛr maa daŋ ŋmɛnɛ

giŋŋi n see,

di sɛɛ chɔgri.’ ”#Aiza 45:23; Fili 2:10

12Yaa maa daŋ ŋmɛnɛ bagli yaa himmaa wia tɛɛ Kɔraawiizi.

13Awia, ií gilɛɛ kaa ra ŋɔ ii dɔŋahina wia ni wichɔgaa. Ka ií lau keŋ nfɛrɛ lugɔ bɛ́l maa gilɛɛ waa ɛɛ wiimaa n niŋ gil u dɔŋhiŋ leu, di ɛɛ wichɔgaa.

14N Dɔɔri Yeesu gillɔɔ n zum lugɔ kummaa waa kii. Diwee dee maa waa doŋa dɔɔwɛ u hiŋ ni. Ka baŋhina be, diwee aŋhina a kiiu. A dii ra tɛɛ baa doŋa. 15Ama, di i kuu i diwee wia gil i dɔŋhiŋ ɛɛ wichɔgaa, u biini chɔgi, i nɔŋŋuubuu naá? Kristo kuu a hiŋ wiarɛ siu. Awia, a waa dɛkkɛ hin niŋ bir chɔguu dikuu diwee wia. 16Gilɛɛ gil nɛr maa wer kpa i winanaa ɛɛi birgi wichɔgaa, di ra gbɛllaa. 17Kundii ni kunnyɔɔi waa wizenaa ɛɛwɛ Kɔraawiizi Kora biini. Wideŋlaa, nuukpaŋ dɔɔi ani bɔsɔna la n lii Kɔraawiizi Dumnanii fɔŋŋa biini la, aabuu ɛɛ wizenaa u kora biini. 18Nɛr la maa n kpa annii ra hum Kristo, u wia daŋ par Kɔraawiizi, di kaa du wer nɛra ge be.

19Awia, ií gil ya aah siwii ra nyiŋŋi ya ni yaa dɔŋahina nuukpaŋ dɔɔi, di kaa ra nyiŋŋi gunla yaa n niŋ hiini dɔŋa, yaa maa wer lau nɛnnɛ. 20Ií gilɛɛ kuu diwee dii wia chɔgi Kɔraawiizi huma. Kummaa dii waa kii. Ka di nɛr la maa wa di diwee aŋhina a gil u dɔŋhiŋ leu, a diwee dii waa wer tɛɛ a hiŋ. 21A wesso hiŋ gil ol heei, siŋ nyɔɔi ani kuŋ la maa n niŋ gil i dɔŋhiŋ leu.

22Wia la hinna ɛɛ, haa ra aani ni wichɔgaa wia, gil guŋ du i ni Kɔraawiizi bɛŋ be. Nɛr la biini n wɔɔ ra tɛɛ wichɔgaa dikuu wia la unna ɛɛ la wia, u nuu sumaa. 23Ka nɛr la n na aani diwee aŋhina dii ka ra dia, u dɔɔ chɔgrii, dikuu uŋ waa sɛɛwɛ lugɔ a wesso un niŋ dia, ka dia la wia. Wii la maa hiŋ waa sɛɛwɛ lugɔ u ɛɛ winaniirɛ ka ɛɛu, wichɔgiirɛ i ɛɛ.

Currently Selected:

Room 14: vag

Highlight

Copy