Room 13
13
Nabɔnzi dɔɔra sɛɛi wia
1A dɛkkɔɔ nɛr maa n na sɛɛ hɛri nabɔnzi dɔɔra, dikuubɛɛwiai, nɛr maa wàá wer di nabɔmuu, di Kɔraawiizi wɔɔ tɛɛwɛ. Kɔraawiizii gillɛ ba ra di nabɔmuu la. 2Awia, nɛr la maa n niŋ vɛɛ u hɛri nabɔnzi wiŋɔzi, Kɔraawiizi nuarɛ u vɛɛ. U daŋ di u seriya, ú chol. 3Hɛri nabɔnzi wia waa hunnanaa hiŋ na ɛɛ ɔnsii. Hunchɔgaa hinnɛ hɛri nabɔnzi wia ra ɛɛ ɔnsii. Haa nyiŋŋi hɛri nabɔma wia ra ɛɛi ɔnsiiyaa? Amɔ, í ra hum hunnanaa ú chɔlii. 4U ɛɛ Kɔraawiizi baliirɛ ú wer nyiŋŋi winanaa tɛi. Ka di i ra ɛɛ wichɔgaa, i danna ɔmuu. Waa fɔŋŋa dɔɔwɛ pɛɛpɛɛ. U kaa ɛɛ Kɔraawiizi balii, ú wer tɔɔri unla maa n na ɛɛ wichɔgaa Kɔraawiizi baaŋ fuuh u ni. 5Awia, ií ra sɛɛ ba dɔɔra. Ií gilɛɛ ra sɛɛ dikuu iinna ɔm ba baaŋ bɛŋ wia, ka ra sɛɛ, ií wer dɔɔ biinihuŋŋu ií biine gilɛɛ waa tɔɔri ia.
6A guŋ wiarɛ a kaa du wer lugɔ ií ra turgi lampoo. A lampoo hina gba ɛɛ Kɔraawiizi balaarɛ, ba ra hum a huma.#Mat 22:21; Maak 12:17 7Awia, ií ra turgi gunla maa iin niŋ turgi tɛɛ baa. Unla iin niŋ turgi lampoo la tɛɛ, ií turgi tɛu. Unla iin niŋ kɛɛ kebee la tɛɛ, ií kɛɛ tɛu. Unla iin ninna ɔm, ií ra ɔmuu. Unla iin ninna tɔgzi, ií ra tɔgzuu.
Dɔnnɔŋŋaa wia
8Ií gilɛɛ gil nɛr maa kim du ii ni. Nɔŋŋaawaa, i daŋ nɔŋŋi nɛra di hanna la. Guŋ bɛŋ kinnɛ waa tuŋ. Hinla maa n nɔŋŋi i dɔŋhiŋ, i hiŋ Kɔraawiizi Gbɔgni la maanii wa tuŋ nɛnnɛ. 9Kɔraawiizi Gbɔgni labuu keŋ. Gilɛɛ wàá sɛm, gilɛɛ wàá kpu nɛr, gilɛɛ wàá ŋmɛɛ, gilɛɛ wàá dɔɔ kɛkɛluu. Gbɔgni naa ni aŋhina n kaa jaa, a maa hiŋaa du Gbɔgkpaŋ biinii. Waabuu keŋ. Nɔŋŋi i dɔŋhiŋ gunla hin nɔŋŋi i hiŋ la.#Lii 20:13-16; Levi 19:18 10Di i nɔŋŋi i dɔŋhiŋ, hàá sɛɛ ɛɛu wichɔgaa. Awia, dɔnnɔŋŋaarɛ ɛɛ Gbɔg la maa hiŋaa.
11Ií ra hiŋ guŋ, dikuubɛɛwiai, ii zum wia la n niŋ wa ɛɛ filaŋkenne, di zum lugɔ a dɛkkɔɔ yaa n izi dɔɔ, dikuubɛɛwiai, yaa lɛɛi saŋa duglɔɔrɛ kaali saŋa la yaa n felee yardi Yeesu la. 12Hamuŋa a bɛruu. Hɔpizaa ge ra dugli. Awia, ií gil ya kpa bɔbiri huma ha, ka kpa Kɔraawiizi laal kuna laali yaa hinaa, di wer hum hɔpizaa huma. 13Ya gilɛɛ ra ɛɛ basabasa di ra dɛɛzi, di gilɛɛ ra ɛɛ sɛnsɛŋ wia ani wikuna, di gilɛɛ ra di dɔŋa hɔɔzi di dɔɔ bɔwii. 14Ií gil yaa Dɔɔri Yeesu Kristo du ii ni alugɔ iiŋ kpa tagta laali, nɛ́ra wer na u manni ii ni, ka vɛɛ ii bɔrahɔŋ kunnyiŋŋichɔgaa la.
Currently Selected:
Room 13: vag
Highlight
Share
Copy
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.
