Wiɛɛlaa 27
27
Pɔɔl n zuu muugberzeŋ di ra la Room wia
1Baŋ wa ŋɔ a wia tuŋ, ba ŋɔ ba daŋ gil Pɔɔl zuu muugberzeŋ bɛl di la Itali hɛri. Ba kpa u ni nɛra baŋhina baŋ tɔ dia, di tɛɛ koorizeŋ soojazi nabɔma bɛl, ú kpogli baa ra la. U sɔnnɛ faa Juliɔs. 2N ni baa maa ga zuu muugbera bɛl n lii Adramitum di ra la Eesia hɛri bola la n du a muuzeŋ la nua. Masɛdɔnia hɛri hinuu bɛl n lii Tɛsalɔnika ge faa du yaa be yaa nuu maa ra la. U sɔnnɛ faa Aristakus.#Wiɛɛ 19:29
3Hɔɔŋ wa pizɛɛ yaa wa hel Saidɔn. Juliɔs la ɛɛ Pɔɔl nɛnnɛ, di tɛu ŋmɛnɛɛ ú la u dammuzi be de, bá ga kpogluu tama ka ú bir di ra ba. U la ka bir ba. 4Yaa kpa ra la. Peu gaa ta di ra chem yaa ni, yaa bir ga hɛrjiga Saiprɔs harbɔɔ ú tɔ yaa peu la. 5Yaa ba nii la n dugli Silisia ni Pamfilia hɛri la di giu di ga hel Mira la n du Lisia hɛri la. 6Soojazi nabɔma la wer na Alɛgzandria muugbera bɛl n na la Itali hɛri, di gil yaa zuuu di ra la. 7Yaa waa wette ya na manaŋ, ka ra la bɔɔiih guŋŋ hɔpizaa anɛɛ. A nuu yaa mɔɔ ka yaa wer hel Sinaidus. Peu waa sɛɛwɛ yaa deŋli la. Yaa bir la hɛrjiga bɛl banna yir Krit paga, bɔr la peu n waa ta werge, di ga bɛri Salmɔni, 8di ga dugli muu kɛrii di ra la. A kaa nuu yaa werge ka yaa haa hel bɔr la n dugli Lasia ba ra yir de Fɛɛ Hevins la.
9Yaa birgi de werge. Jus hina Hɔpizizeŋ la banna vɔɔ nua la wa bɛri yaa ni gba. Di a saŋa wa bɛrɔɔ, muuzeŋ la waa ɔɔ kaa ɛɛ zuui. Awia, Pɔɔl karfi baa 10di ŋɔ, “Di yaa ra la filaŋkeŋ yaa daŋ ga zuu tɔɔrɔɔ biini yaa ni yaa muugbera ni u bunni maa ta.” 11Ka soojazi nabɔma la waa nuuwɛ tɛɛ Pɔɔl ka ra hiŋ a muugbera balaa nabɔma ni a muugbera hiŋ nuuzi. 12Baabuu ŋɔwɛɛ lugɔ bɔr la waa wer ban niŋ lau muugbera la chiŋŋi de, a pezenaa saŋa la. Ka Krit muugbessi chignibɔr bɛl du de, ba ra yir de Fonigs. Ba galga maa ra ŋɔ dí ba izi ra la bá vii wer hel de mɔɔ, di ga du de ka á pezenaa saŋa wa bɛri. Denii niŋ wer gber baa pezenaa la ni, dikuubɛɛwiai, de faa chaŋ wiifurii nodig wiikakag wiicholii ni wiifurii nomɛɛl wiikakag wiicholiire.
Pekpeg n gaa ta muuzeŋ biini wia
13Denii peu la n wa bittɛ lii wiifurii nodig wiikakag di jaa ra ta tama tama, ba binni lugɔ ba jaa na ŋmɛnɛɛrɛ bá ra la. Ba lalli a muugbera lugbii la n ɔɔ lawuu chiŋŋi la ka ra la ga ga muu kɛrii di ra kaali.
14Tama, di pezenzeŋ bɛl izoo. Waabuu ɔɔ lii wiifurii nomɛɛl wiikakag wiifurii, di chum werge la. 15U lii a hɛri barii di waa yag yaa muugbera. Yaa yoou huhzi. A muugbera waa kaa wer ra la see, ka hanna la bɔr la a peu n tawɛɛ ra la la. 16Yaa wa hel hɛrjiga bɛl banna yir Kauda harbɔɔ. U gber yaa a peu tama ka u haa ra yoo yaa. Yaa kuuh werge maa, 17ka haa wer lalli gberjiga la n choŋŋi harbɔɔ di ra hiŋ la, di vɔɔu nɛnnɛ. Baŋ wa vɔɔu la, ba kaa vɔɔzi muugbera la maa. Bɔdɛdɛrɛ bɛl du de ba ra yiruu Sirtis. Ba maa ra fɔŋ lugɔ peu la daŋ taa baa la bá ga far. Awia, ba gil wɛjɛzeŋ la n du a muugbera nyuu la tuu hɛri ka peu la taa baa guŋŋ ba ra la.
18Hɔɔŋ wa pizɛɛ, di a peu haa ra ta werge. Ba lizi muugbera la bunni di ra ta a nii biini. 19Hɔɔŋ kaa pizi, ba kaa lizi a muugbera kuna aŋhina ge di kaa ta. 20Hɔpizikpila maa biini, di yaa waa wette na wiizi. Yaa waa chinchiŋwilaa gba nawɛɛ. Ka peu la haa vɛɛ ra ta werge. Yaa waa kaa ɛɛ tamii lugɔ yaa daŋ wer lɛɛ yaa hinaa.
21Denii bam birgee ka ba haa waa diwee diwee la, Pɔɔl izi ba baaŋ di ŋɔ ba be, “N nabɔnzi, di ii vii nuu wii la miŋ faa ŋɔwɛɛ ŋɔ ií gilɛɛ gil ya lii Krit mɔɔ la, wii naa vii wàá na yaa, yaa kuna maa chɔgi keŋ. 22Ka n na suŋŋi ia ií nuu n be, di gil ii bɔra sɔɔni. Muugbera naawaa daŋ chɔgi, ka ii bɛl maa wàá siu. 23Kɔraawiizi la n dɔɔŋ, di gil n na hum u huma labuu bagliŋ guŋ. U gillɔɔ u mɛlika bɛl ba n be dɛɛla hamuŋa ni, 24di wa ŋɔ, ‘Pɔɔl, i daŋ chi Koorizeŋ Siiza see. Kɔraawiizii dau guŋ. Awia, gilɛɛ ra ɔm. Bannii maa i ni baa n du muugbera naa biini naa ge, Kɔraawiizi nuuwɔɔ tɛi di ŋɔ u daŋ lɛɛ ba gba.’ 25Awia, yaabalaa, ií maa gil ii bɔra sɔɔni. N yardi gunla Kɔraawiizi uŋ ŋɔ n be labuu, guŋ himmaanii niŋ ɛɛ. 26Ama, yaa daŋ wa ta hɛrjiga bɛl.”
27Denii hamuŋzi fidaanaazuhiŋ wa hel, di peu la haa ra yoo yaa Muuzeŋ Mɛditerenɛn biini. Hɛuh n wa hɛɛhzɛɛ, muugbera balaa la tami lugɔ ba jaa ra dugli hɛri bɛllɛ. 28Ba kpa kuŋ di du nii la biini di mɛgzuu ra na. U luŋzi ɛɛ nogumzi kalfa ni tokko. Tama, ba kaa mɛgzi na. U kaa ɛɛ nogumzi tokko ni kpɔrgɔ. 29Ba jaa ra fɔŋ lugɔ a muugbera daŋ lii bia ni di purgi. Ba lau muugbera la lugbia anaazu di gil a tuu a nii biini a muugbera har, á lawuu chiŋŋi, ka ra suŋŋi wiizi hɔ́pizi, bɔ́r chaani baa.
30A muugbera balaa baŋhina ra nyiŋŋi ba chɔ lii muugbera la biini, di gil muugberjiga la tuu nii la biini, di ra nyiŋŋi ba dar yaa lugɔ ba daŋ kpa lugbia di lau a muugbera see ge. 31Ka Pɔɔl ŋɔ soojazi ni ba nabɔma be, “Di nɛra naa lii muugbera naa biini, ii wàá na iihinaa.” 32Soojazi la ga chaahzi muugberjiga la ŋmɛnni, u chol nii la biini.
33Hɔɔŋ waa nyiŋŋi pizaa, Pɔɔl suŋŋi ba maa werge, “Ií di diwee. Hɔpizaa fidaanaazu maa iinna fɔŋ wii la n niŋ wa ɛɛ ia naa wiarɛ ii haa waa sɛɛwɛ ii di kummaa la. 34Awia, n na suŋŋi iabuu, ií nyiŋŋi diwee di, di wer dɔɔ fɔŋŋa di wer na iihinaa wia naa biini, dikuubɛɛwiai, ii yemmaa waa ba ɛŋ tai.” 35Uŋ wa ŋɔ guŋ, u kpa paanuu di suŋŋi wiizi du u ni, ba maa see, ka mɔnnuu ra hee. 36Denii ba maa bampiree ɛɛ kpaŋ. Ba jaa ra di. 37Nɛra kalfazi anɛɛ ni tokkoahoro ni fidaanumbɛllɛ faa du a muugbera biini. 38Ba maa n wa diwee piŋ, ba kpa mia la maa fug chaari nii la biini, ka muugbera la jaa wer du fug.
39Hɔɔŋ wa pizi baa, muugbera balaa la waa wette bá zum hɛri la. Ka baŋ wa na a muu bɔfɔɔlii bɛl, de hɛri mɛgzi dɔŋa ni, ba ta jina dɔŋa be, bá vii wer ga de di gi. 40Ba jaa kpa a muugbera lugbia maa ta nii la biini, di pur u kuna la ge n ɔɔ gil u ra deŋli la, ka kpa wɛjɛzeŋ la di kaa vɔɔ chiŋ, di lawuu bir, peu ra ta u ni, ú wer ra la. 41Banna la la, ba waa de helle, ka zuu bɔtizaa bɛl. A muugberzeŋ nyuu zuu hɛɛhriichaa biini di far de chi. Waa wette lii. Nii ra yag u harbɔɔ werge, u ra purgi.
42Denii a soojazi ta jina bá kpu banla baŋ vɔɔzi yɔlɔzi la maa, bá gilɛɛ wer sɔŋŋi kaali di lɛɛ bahinaa. 43Ka ba nabɔma kuu Pɔɔl wia di ŋɔ bá gil baa, ka ŋɔ dí banla maa n zum sɔŋŋaa, bá zaah chogli nii la biini, di tɔ see ra lii. 44Banla ge n kawɛɛ, bá kpa muugbera daazi ni kummaa ban niŋ wer kpa a muugbera biini di zaali nii la ni, di hiŋ baa lii. Ba maa ɛɛ guŋ di wer lɛɛ bahinaa lii nii la biini.
Currently Selected:
Wiɛɛlaa 27: vag
Highlight
Share
Copy
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.
Wiɛɛlaa 27
27
Pɔɔl n zuu muugberzeŋ di ra la Room wia
1Baŋ wa ŋɔ a wia tuŋ, ba ŋɔ ba daŋ gil Pɔɔl zuu muugberzeŋ bɛl di la Itali hɛri. Ba kpa u ni nɛra baŋhina baŋ tɔ dia, di tɛɛ koorizeŋ soojazi nabɔma bɛl, ú kpogli baa ra la. U sɔnnɛ faa Juliɔs. 2N ni baa maa ga zuu muugbera bɛl n lii Adramitum di ra la Eesia hɛri bola la n du a muuzeŋ la nua. Masɛdɔnia hɛri hinuu bɛl n lii Tɛsalɔnika ge faa du yaa be yaa nuu maa ra la. U sɔnnɛ faa Aristakus.#Wiɛɛ 19:29
3Hɔɔŋ wa pizɛɛ yaa wa hel Saidɔn. Juliɔs la ɛɛ Pɔɔl nɛnnɛ, di tɛu ŋmɛnɛɛ ú la u dammuzi be de, bá ga kpogluu tama ka ú bir di ra ba. U la ka bir ba. 4Yaa kpa ra la. Peu gaa ta di ra chem yaa ni, yaa bir ga hɛrjiga Saiprɔs harbɔɔ ú tɔ yaa peu la. 5Yaa ba nii la n dugli Silisia ni Pamfilia hɛri la di giu di ga hel Mira la n du Lisia hɛri la. 6Soojazi nabɔma la wer na Alɛgzandria muugbera bɛl n na la Itali hɛri, di gil yaa zuuu di ra la. 7Yaa waa wette ya na manaŋ, ka ra la bɔɔiih guŋŋ hɔpizaa anɛɛ. A nuu yaa mɔɔ ka yaa wer hel Sinaidus. Peu waa sɛɛwɛ yaa deŋli la. Yaa bir la hɛrjiga bɛl banna yir Krit paga, bɔr la peu n waa ta werge, di ga bɛri Salmɔni, 8di ga dugli muu kɛrii di ra la. A kaa nuu yaa werge ka yaa haa hel bɔr la n dugli Lasia ba ra yir de Fɛɛ Hevins la.
9Yaa birgi de werge. Jus hina Hɔpizizeŋ la banna vɔɔ nua la wa bɛri yaa ni gba. Di a saŋa wa bɛrɔɔ, muuzeŋ la waa ɔɔ kaa ɛɛ zuui. Awia, Pɔɔl karfi baa 10di ŋɔ, “Di yaa ra la filaŋkeŋ yaa daŋ ga zuu tɔɔrɔɔ biini yaa ni yaa muugbera ni u bunni maa ta.” 11Ka soojazi nabɔma la waa nuuwɛ tɛɛ Pɔɔl ka ra hiŋ a muugbera balaa nabɔma ni a muugbera hiŋ nuuzi. 12Baabuu ŋɔwɛɛ lugɔ bɔr la waa wer ban niŋ lau muugbera la chiŋŋi de, a pezenaa saŋa la. Ka Krit muugbessi chignibɔr bɛl du de, ba ra yir de Fonigs. Ba galga maa ra ŋɔ dí ba izi ra la bá vii wer hel de mɔɔ, di ga du de ka á pezenaa saŋa wa bɛri. Denii niŋ wer gber baa pezenaa la ni, dikuubɛɛwiai, de faa chaŋ wiifurii nodig wiikakag wiicholii ni wiifurii nomɛɛl wiikakag wiicholiire.
Pekpeg n gaa ta muuzeŋ biini wia
13Denii peu la n wa bittɛ lii wiifurii nodig wiikakag di jaa ra ta tama tama, ba binni lugɔ ba jaa na ŋmɛnɛɛrɛ bá ra la. Ba lalli a muugbera lugbii la n ɔɔ lawuu chiŋŋi la ka ra la ga ga muu kɛrii di ra kaali.
14Tama, di pezenzeŋ bɛl izoo. Waabuu ɔɔ lii wiifurii nomɛɛl wiikakag wiifurii, di chum werge la. 15U lii a hɛri barii di waa yag yaa muugbera. Yaa yoou huhzi. A muugbera waa kaa wer ra la see, ka hanna la bɔr la a peu n tawɛɛ ra la la. 16Yaa wa hel hɛrjiga bɛl banna yir Kauda harbɔɔ. U gber yaa a peu tama ka u haa ra yoo yaa. Yaa kuuh werge maa, 17ka haa wer lalli gberjiga la n choŋŋi harbɔɔ di ra hiŋ la, di vɔɔu nɛnnɛ. Baŋ wa vɔɔu la, ba kaa vɔɔzi muugbera la maa. Bɔdɛdɛrɛ bɛl du de ba ra yiruu Sirtis. Ba maa ra fɔŋ lugɔ peu la daŋ taa baa la bá ga far. Awia, ba gil wɛjɛzeŋ la n du a muugbera nyuu la tuu hɛri ka peu la taa baa guŋŋ ba ra la.
18Hɔɔŋ wa pizɛɛ, di a peu haa ra ta werge. Ba lizi muugbera la bunni di ra ta a nii biini. 19Hɔɔŋ kaa pizi, ba kaa lizi a muugbera kuna aŋhina ge di kaa ta. 20Hɔpizikpila maa biini, di yaa waa wette na wiizi. Yaa waa chinchiŋwilaa gba nawɛɛ. Ka peu la haa vɛɛ ra ta werge. Yaa waa kaa ɛɛ tamii lugɔ yaa daŋ wer lɛɛ yaa hinaa.
21Denii bam birgee ka ba haa waa diwee diwee la, Pɔɔl izi ba baaŋ di ŋɔ ba be, “N nabɔnzi, di ii vii nuu wii la miŋ faa ŋɔwɛɛ ŋɔ ií gilɛɛ gil ya lii Krit mɔɔ la, wii naa vii wàá na yaa, yaa kuna maa chɔgi keŋ. 22Ka n na suŋŋi ia ií nuu n be, di gil ii bɔra sɔɔni. Muugbera naawaa daŋ chɔgi, ka ii bɛl maa wàá siu. 23Kɔraawiizi la n dɔɔŋ, di gil n na hum u huma labuu bagliŋ guŋ. U gillɔɔ u mɛlika bɛl ba n be dɛɛla hamuŋa ni, 24di wa ŋɔ, ‘Pɔɔl, i daŋ chi Koorizeŋ Siiza see. Kɔraawiizii dau guŋ. Awia, gilɛɛ ra ɔm. Bannii maa i ni baa n du muugbera naa biini naa ge, Kɔraawiizi nuuwɔɔ tɛi di ŋɔ u daŋ lɛɛ ba gba.’ 25Awia, yaabalaa, ií maa gil ii bɔra sɔɔni. N yardi gunla Kɔraawiizi uŋ ŋɔ n be labuu, guŋ himmaanii niŋ ɛɛ. 26Ama, yaa daŋ wa ta hɛrjiga bɛl.”
27Denii hamuŋzi fidaanaazuhiŋ wa hel, di peu la haa ra yoo yaa Muuzeŋ Mɛditerenɛn biini. Hɛuh n wa hɛɛhzɛɛ, muugbera balaa la tami lugɔ ba jaa ra dugli hɛri bɛllɛ. 28Ba kpa kuŋ di du nii la biini di mɛgzuu ra na. U luŋzi ɛɛ nogumzi kalfa ni tokko. Tama, ba kaa mɛgzi na. U kaa ɛɛ nogumzi tokko ni kpɔrgɔ. 29Ba jaa ra fɔŋ lugɔ a muugbera daŋ lii bia ni di purgi. Ba lau muugbera la lugbia anaazu di gil a tuu a nii biini a muugbera har, á lawuu chiŋŋi, ka ra suŋŋi wiizi hɔ́pizi, bɔ́r chaani baa.
30A muugbera balaa baŋhina ra nyiŋŋi ba chɔ lii muugbera la biini, di gil muugberjiga la tuu nii la biini, di ra nyiŋŋi ba dar yaa lugɔ ba daŋ kpa lugbia di lau a muugbera see ge. 31Ka Pɔɔl ŋɔ soojazi ni ba nabɔma be, “Di nɛra naa lii muugbera naa biini, ii wàá na iihinaa.” 32Soojazi la ga chaahzi muugberjiga la ŋmɛnni, u chol nii la biini.
33Hɔɔŋ waa nyiŋŋi pizaa, Pɔɔl suŋŋi ba maa werge, “Ií di diwee. Hɔpizaa fidaanaazu maa iinna fɔŋ wii la n niŋ wa ɛɛ ia naa wiarɛ ii haa waa sɛɛwɛ ii di kummaa la. 34Awia, n na suŋŋi iabuu, ií nyiŋŋi diwee di, di wer dɔɔ fɔŋŋa di wer na iihinaa wia naa biini, dikuubɛɛwiai, ii yemmaa waa ba ɛŋ tai.” 35Uŋ wa ŋɔ guŋ, u kpa paanuu di suŋŋi wiizi du u ni, ba maa see, ka mɔnnuu ra hee. 36Denii ba maa bampiree ɛɛ kpaŋ. Ba jaa ra di. 37Nɛra kalfazi anɛɛ ni tokkoahoro ni fidaanumbɛllɛ faa du a muugbera biini. 38Ba maa n wa diwee piŋ, ba kpa mia la maa fug chaari nii la biini, ka muugbera la jaa wer du fug.
39Hɔɔŋ wa pizi baa, muugbera balaa la waa wette bá zum hɛri la. Ka baŋ wa na a muu bɔfɔɔlii bɛl, de hɛri mɛgzi dɔŋa ni, ba ta jina dɔŋa be, bá vii wer ga de di gi. 40Ba jaa kpa a muugbera lugbia maa ta nii la biini, di pur u kuna la ge n ɔɔ gil u ra deŋli la, ka kpa wɛjɛzeŋ la di kaa vɔɔ chiŋ, di lawuu bir, peu ra ta u ni, ú wer ra la. 41Banna la la, ba waa de helle, ka zuu bɔtizaa bɛl. A muugberzeŋ nyuu zuu hɛɛhriichaa biini di far de chi. Waa wette lii. Nii ra yag u harbɔɔ werge, u ra purgi.
42Denii a soojazi ta jina bá kpu banla baŋ vɔɔzi yɔlɔzi la maa, bá gilɛɛ wer sɔŋŋi kaali di lɛɛ bahinaa. 43Ka ba nabɔma kuu Pɔɔl wia di ŋɔ bá gil baa, ka ŋɔ dí banla maa n zum sɔŋŋaa, bá zaah chogli nii la biini, di tɔ see ra lii. 44Banla ge n kawɛɛ, bá kpa muugbera daazi ni kummaa ban niŋ wer kpa a muugbera biini di zaali nii la ni, di hiŋ baa lii. Ba maa ɛɛ guŋ di wer lɛɛ bahinaa lii nii la biini.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.