Wiɛɛlaa 19
19
Pɔɔl n du Ɛfɛsus wia
1Denii Apɔlɔs n wa du Kɔrint la, Pɔɔl ga a hɛri baaŋ di ba Ɛfɛsus, di wa huuzi Yeesu hiŋra baŋhina de#Ɛfɛs 1:1 2di pɛɛzi baa, “Iiŋ yardi Yeesu, ii na Kɔraawiizi Dumnanii lii u bee?”
Ba ŋɔ, “Akai. Yaa waa u wia zummɛ gba.”
3U kaa pɛɛzi baa, “Ban sɔ ia Kɔraawiizi nii, niisɔi bɛlii deere ba sɔ iai?”
Ba ŋɔ, “Jɔɔn niisɔi labuu ba sɔ yaa.”
4Pɔɔl ŋɔ, “Jɔɔn ɔɔ faa ŋɔu lugɔ nɛ́ra gil ba biine chɔgi dikuu ba wichɔgaa wia di gilaa ha ka ú sɔ baa Kɔraawiizi nii, ka ŋɔ, ‘Nɛbɛl du n hattɛ di ra ba. Di u wa ballɔ, ií yardi a hiŋ. Waabuu Yeesu.’ ”#Luuk 3:2-3 5Ɛfɛsus hina la n wa nuu guŋ, ba gil ba sɔ baa Kɔraawiizi nii bá ra hiŋ Yeesu. 6Pɔɔl kpa u nonee sag ba ni. Kɔraawiizi Dumnanii zuu ba ni. Ba ra mɔɔ mɔɔdumazi di ra ŋɔ Kɔraawiizi wia u fɔŋŋa biini. 7Ba faa du nɛra fidibanɛɛ.
8Pɔɔl ɔɔ zuu ba jaamaa dia di ra ŋɔ Kɔraawiizi Kora wia ni bampirsi ni baaguzi ahoro maa biini di ra di nɛra hɔɔzi di fɔrgi baa bá sɛɛ a wiŋɔzi. 9Ka baŋhina waa sɛɛwɛ tɛu dikuu ba dignikpega wia. Ba waa sɛɛwɛ ba hiŋ Kɔraawiizi nua, ka ra gbɛlli u Ŋmɛnɛɛ hiŋaa nɛkpila maa be. Awia, Pɔɔl gil baa ka lau Yeesu hiŋra la bargi lii ba be, di la Tiranus sukuru, di jaa di nɛra mmɔri a sukuru biini. 10Gunnɛ u bagli baa de hɔpizibii maa guŋŋ binni anɛɛ maa biini. Jus hina ni Giris hina la maa n du Eesia hɛri nuu Kɔraawiizi wia.
11Kɔraawiizi kaa kpa fɔŋŋa du Pɔɔl ni u wer di ra ɛɛ wizenaa, 12haali nɛra kpa aŋkitizi ni kirsɔɔzi uŋ gbɔgzɛɛ di ga tɛɛ ba wiila hina ba nyaagi, tinnanchɔgaa ge lii ba ni.
13Jus baala baŋhina faa gaagi kpa Yeesu sɔŋ di ra duŋŋi tinnanchɔgaa la. Ba ɔɔ ŋɔ tinnanchɔgaa la be, “Yeesu la Pɔɔl n ɔɔ ra ŋɔ u wia la sɔŋ biini, ií wa lii.” 14Jus hinuu bɛl baŋ faa ra yir Skiva, u faa ɛɛ ba Kizeehina nabɔma bɛl, biibaala baniidaanɛɛrɛ faa gaagɛɛ ra ɛɛ guŋ.
15A hɔl bɛl, baŋ wa ŋɔ guŋ tinnanchɔgii hiŋ bɛl be, u ŋɔ ba be, “N zum Yeesuu, di kaa zum Pɔɔl ge. Ka maa iawaa zummɛ.” 16Tinnanchɔgii hiŋ la izi di lɔɔzi baa werge di kpegli baa di vɛgzi ba laala haazi. Ba ni ŋmɛra ni bɔwiilazi chɔ kaali. 17Jus hina ni Giris hina maa n du Ɛfɛsus nuu a wia. Ɔnsii lau baa. Ba ra tɔgzi yaa Dɔɔri Yeesu sɔŋ. 18Banla n yardɛɛ la kpila maa ba di waa huuhzi ba biine di ra sɛɛ chɔgri Kɔraawiizi be. 19Baŋhina faa ra hum ziŋgaabo humaa. Ba kpa ba hɔna maa di wa fuuh nɛkpila maa see ka kur ba hɔna la kebee, a hel ba kebinanaa kagbonzi bɔra adunu. 20Kennaa baŋ ɛɛwɛ naa gillɔɔ Kɔraawiizi wiŋɔɔlii ra yaari bɔr maa di wer dɔɔ fɔŋŋa di ra jaa.
21Denii Pɔɔl fɛ nfɛrɛ lugɔ a dɛkkɔ uŋ ga Masɛdɔnia ni Akaaya di la Jɛrusalɛm, di ŋɔ, “Di n wa la Jɛrusalɛm naa, n daŋ la Room ge.” 22U hum u balaa Timoti ni Ɛrastus bá la Masɛdɔnia hɛri, ka ge du Eesia hɛri di birgi tama.
23A saŋa, dɔm izi Ɛfɛsus dikuu Yeesu hiŋaa wia. 24Luuri bɛl du de. U sɔnnɛ faa Dimitrius. U ɔɔ kpa lugbii di luu kuna lugɔ ba vugzeŋ bɛl banna yir Diana. U ni babalaa ɔɔ ra na kebee werge maa ba huma hiŋ biini.
25Denii Dimitrius yirgi babalaa ni banla maa n du a huma biini di ŋɔ ba be, “Yaabalaa, ii zummɔ lugɔ huma naa biinii yaa daama ra lii. 26Ka filaŋkeŋ ii siwee ra na, ii digna ge ra nuu gunla Pɔɔl n na bagli nɛra ɛŋ. Ɛfɛsus bɛŋ lɛi u ra ɛɛ guŋ. Eesia hɛri maanii u ra ɛɛ guŋ di ra bir nɛkpila bampiree ba ra sɛɛ gunla unna ŋɔ la. Kenne u ɔɔ ra ŋɔ, dí kuna la newea n ɔɔ luu la waa vuga ɛɛwɛ. 27Unna ŋɔ kennaa, nɛra daŋ waa gbɛlli yaa huma naa, yáa vugzeŋ Diana jaami dia ge bir pɛɛ, ú himmaa ta. Wàá ka na girme. Eesia hɛri hina ni durnya maa n na maŋkuruu kennaa, a guŋ wàá du wer.”
28A nɛkpila n wa nuu guŋ, ba baana fuuh werge maa. Ba izi di ra pogzi werge di ra ŋɔ, “Aa! Yaa Ɛfɛsus hina dɔɔri vughaaŋ Diana ɛɛ vugzenne.” 29Dɔm izi a bolzeŋ hina maa. Nɛra lau Masɛdɔnia hina baŋhina n du Pɔɔl ba, ba sɔnaa Geyus ni Aristakus, di taagi baa la ba jaamaa bɔzeŋ bɛl.#Room 16:23 30Pɔɔl faa ra nyiŋŋi u la ga zuu a nɛra biini, ka Yeesu hiŋra waa sɛɛwɛ ú la de. 31Eesia hɛri nabɔnzi baŋhina ɛɛ Pɔɔl dammuzii, ba hum nɛra bá ga fɔrguu di ú jaande maa, ú gilɛɛ waa zuu a nɛra biini.
32Ka a nɛra du de di ra kɔɔ basabasa. Baŋhina ra ŋɔ wii naa, baŋhina ge ra ŋɔ annii. Ka ba galga maa waa zum wii la n baani ba ba de.
33A nɛra baŋhina gil Jus hina daansɛɛ hiŋ bɛl banna yir Alɛgzanda la lii. U vig baa nonii bá siigi. 34Ka baŋ wa zummɛ lugɔ u ɛɛ Jus hinuurɛ, ba maa kpa loobikpaŋ di ra pogzi di ra ŋɔ, “Aa! Aa! Yaa Ɛfɛsus hina Dɔɔri Diana ɛɛ vugzenne.” Ba pogzi guŋŋ haali karfizi anɛɛ maa biini.
35Ba kupo jaa wa lii di ra laafi baa. Ba siigi. U ŋɔ ba be, “Ɛfɛsus hina, ií ra nuu ɛŋ. Nɛr maa zummɔ lugɔ yaa bolle dɔɔ yaa dɔɔri Diana jaamidia ni u vugbii la n lii chiŋ di chol hɛri la. 36A waa bilii dɔɔwɛ. Awia, ií gil a kɔɔi filaŋkeŋ di gilɛɛ fir ɛɛ wii la iiŋ waa zummɛ. 37Nɛra naa waa yaa dɔɔri jaamidia kummaa ŋmɛɛwɛ. Ba wɔɔ kaa gbɛlli ge, ka ii lau baa ba ɛŋ.
38Di Dimitrius ni u dɔŋahina dɔɔ ba wii, seriya dii dia la pillɔɔrɛ zinaa. A sitɔɔra ge du de. Ii gil ba la gaa sami dɔŋa. 39Di ba ga ɛɛ guŋ tuŋ di wii bɛl haa du de, a hɔl la nabɔnzi n wa chaalɛɛ la, bá kpa ŋɔ ba be. 40Ka kennaa iinna ɛɛ zinaa naa, ba daŋ kpaa pɛɛzi yaa. Di ba kpaa pɛɛzi yaa, yaa ge n waa wiimaa dɔɔwɛ ya ŋɔ naa, ba daŋ ŋɔ dí yaabuu gillɛ nɛra ra izi dɔm.” 41Uŋ wa ŋɔ guŋ tuŋ, u ta nɛra la, ba lii.
Currently Selected:
Wiɛɛlaa 19: vag
Highlight
Share
Copy
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.
Wiɛɛlaa 19
19
Pɔɔl n du Ɛfɛsus wia
1Denii Apɔlɔs n wa du Kɔrint la, Pɔɔl ga a hɛri baaŋ di ba Ɛfɛsus, di wa huuzi Yeesu hiŋra baŋhina de#Ɛfɛs 1:1 2di pɛɛzi baa, “Iiŋ yardi Yeesu, ii na Kɔraawiizi Dumnanii lii u bee?”
Ba ŋɔ, “Akai. Yaa waa u wia zummɛ gba.”
3U kaa pɛɛzi baa, “Ban sɔ ia Kɔraawiizi nii, niisɔi bɛlii deere ba sɔ iai?”
Ba ŋɔ, “Jɔɔn niisɔi labuu ba sɔ yaa.”
4Pɔɔl ŋɔ, “Jɔɔn ɔɔ faa ŋɔu lugɔ nɛ́ra gil ba biine chɔgi dikuu ba wichɔgaa wia di gilaa ha ka ú sɔ baa Kɔraawiizi nii, ka ŋɔ, ‘Nɛbɛl du n hattɛ di ra ba. Di u wa ballɔ, ií yardi a hiŋ. Waabuu Yeesu.’ ”#Luuk 3:2-3 5Ɛfɛsus hina la n wa nuu guŋ, ba gil ba sɔ baa Kɔraawiizi nii bá ra hiŋ Yeesu. 6Pɔɔl kpa u nonee sag ba ni. Kɔraawiizi Dumnanii zuu ba ni. Ba ra mɔɔ mɔɔdumazi di ra ŋɔ Kɔraawiizi wia u fɔŋŋa biini. 7Ba faa du nɛra fidibanɛɛ.
8Pɔɔl ɔɔ zuu ba jaamaa dia di ra ŋɔ Kɔraawiizi Kora wia ni bampirsi ni baaguzi ahoro maa biini di ra di nɛra hɔɔzi di fɔrgi baa bá sɛɛ a wiŋɔzi. 9Ka baŋhina waa sɛɛwɛ tɛu dikuu ba dignikpega wia. Ba waa sɛɛwɛ ba hiŋ Kɔraawiizi nua, ka ra gbɛlli u Ŋmɛnɛɛ hiŋaa nɛkpila maa be. Awia, Pɔɔl gil baa ka lau Yeesu hiŋra la bargi lii ba be, di la Tiranus sukuru, di jaa di nɛra mmɔri a sukuru biini. 10Gunnɛ u bagli baa de hɔpizibii maa guŋŋ binni anɛɛ maa biini. Jus hina ni Giris hina la maa n du Eesia hɛri nuu Kɔraawiizi wia.
11Kɔraawiizi kaa kpa fɔŋŋa du Pɔɔl ni u wer di ra ɛɛ wizenaa, 12haali nɛra kpa aŋkitizi ni kirsɔɔzi uŋ gbɔgzɛɛ di ga tɛɛ ba wiila hina ba nyaagi, tinnanchɔgaa ge lii ba ni.
13Jus baala baŋhina faa gaagi kpa Yeesu sɔŋ di ra duŋŋi tinnanchɔgaa la. Ba ɔɔ ŋɔ tinnanchɔgaa la be, “Yeesu la Pɔɔl n ɔɔ ra ŋɔ u wia la sɔŋ biini, ií wa lii.” 14Jus hinuu bɛl baŋ faa ra yir Skiva, u faa ɛɛ ba Kizeehina nabɔma bɛl, biibaala baniidaanɛɛrɛ faa gaagɛɛ ra ɛɛ guŋ.
15A hɔl bɛl, baŋ wa ŋɔ guŋ tinnanchɔgii hiŋ bɛl be, u ŋɔ ba be, “N zum Yeesuu, di kaa zum Pɔɔl ge. Ka maa iawaa zummɛ.” 16Tinnanchɔgii hiŋ la izi di lɔɔzi baa werge di kpegli baa di vɛgzi ba laala haazi. Ba ni ŋmɛra ni bɔwiilazi chɔ kaali. 17Jus hina ni Giris hina maa n du Ɛfɛsus nuu a wia. Ɔnsii lau baa. Ba ra tɔgzi yaa Dɔɔri Yeesu sɔŋ. 18Banla n yardɛɛ la kpila maa ba di waa huuhzi ba biine di ra sɛɛ chɔgri Kɔraawiizi be. 19Baŋhina faa ra hum ziŋgaabo humaa. Ba kpa ba hɔna maa di wa fuuh nɛkpila maa see ka kur ba hɔna la kebee, a hel ba kebinanaa kagbonzi bɔra adunu. 20Kennaa baŋ ɛɛwɛ naa gillɔɔ Kɔraawiizi wiŋɔɔlii ra yaari bɔr maa di wer dɔɔ fɔŋŋa di ra jaa.
21Denii Pɔɔl fɛ nfɛrɛ lugɔ a dɛkkɔ uŋ ga Masɛdɔnia ni Akaaya di la Jɛrusalɛm, di ŋɔ, “Di n wa la Jɛrusalɛm naa, n daŋ la Room ge.” 22U hum u balaa Timoti ni Ɛrastus bá la Masɛdɔnia hɛri, ka ge du Eesia hɛri di birgi tama.
23A saŋa, dɔm izi Ɛfɛsus dikuu Yeesu hiŋaa wia. 24Luuri bɛl du de. U sɔnnɛ faa Dimitrius. U ɔɔ kpa lugbii di luu kuna lugɔ ba vugzeŋ bɛl banna yir Diana. U ni babalaa ɔɔ ra na kebee werge maa ba huma hiŋ biini.
25Denii Dimitrius yirgi babalaa ni banla maa n du a huma biini di ŋɔ ba be, “Yaabalaa, ii zummɔ lugɔ huma naa biinii yaa daama ra lii. 26Ka filaŋkeŋ ii siwee ra na, ii digna ge ra nuu gunla Pɔɔl n na bagli nɛra ɛŋ. Ɛfɛsus bɛŋ lɛi u ra ɛɛ guŋ. Eesia hɛri maanii u ra ɛɛ guŋ di ra bir nɛkpila bampiree ba ra sɛɛ gunla unna ŋɔ la. Kenne u ɔɔ ra ŋɔ, dí kuna la newea n ɔɔ luu la waa vuga ɛɛwɛ. 27Unna ŋɔ kennaa, nɛra daŋ waa gbɛlli yaa huma naa, yáa vugzeŋ Diana jaami dia ge bir pɛɛ, ú himmaa ta. Wàá ka na girme. Eesia hɛri hina ni durnya maa n na maŋkuruu kennaa, a guŋ wàá du wer.”
28A nɛkpila n wa nuu guŋ, ba baana fuuh werge maa. Ba izi di ra pogzi werge di ra ŋɔ, “Aa! Yaa Ɛfɛsus hina dɔɔri vughaaŋ Diana ɛɛ vugzenne.” 29Dɔm izi a bolzeŋ hina maa. Nɛra lau Masɛdɔnia hina baŋhina n du Pɔɔl ba, ba sɔnaa Geyus ni Aristakus, di taagi baa la ba jaamaa bɔzeŋ bɛl.#Room 16:23 30Pɔɔl faa ra nyiŋŋi u la ga zuu a nɛra biini, ka Yeesu hiŋra waa sɛɛwɛ ú la de. 31Eesia hɛri nabɔnzi baŋhina ɛɛ Pɔɔl dammuzii, ba hum nɛra bá ga fɔrguu di ú jaande maa, ú gilɛɛ waa zuu a nɛra biini.
32Ka a nɛra du de di ra kɔɔ basabasa. Baŋhina ra ŋɔ wii naa, baŋhina ge ra ŋɔ annii. Ka ba galga maa waa zum wii la n baani ba ba de.
33A nɛra baŋhina gil Jus hina daansɛɛ hiŋ bɛl banna yir Alɛgzanda la lii. U vig baa nonii bá siigi. 34Ka baŋ wa zummɛ lugɔ u ɛɛ Jus hinuurɛ, ba maa kpa loobikpaŋ di ra pogzi di ra ŋɔ, “Aa! Aa! Yaa Ɛfɛsus hina Dɔɔri Diana ɛɛ vugzenne.” Ba pogzi guŋŋ haali karfizi anɛɛ maa biini.
35Ba kupo jaa wa lii di ra laafi baa. Ba siigi. U ŋɔ ba be, “Ɛfɛsus hina, ií ra nuu ɛŋ. Nɛr maa zummɔ lugɔ yaa bolle dɔɔ yaa dɔɔri Diana jaamidia ni u vugbii la n lii chiŋ di chol hɛri la. 36A waa bilii dɔɔwɛ. Awia, ií gil a kɔɔi filaŋkeŋ di gilɛɛ fir ɛɛ wii la iiŋ waa zummɛ. 37Nɛra naa waa yaa dɔɔri jaamidia kummaa ŋmɛɛwɛ. Ba wɔɔ kaa gbɛlli ge, ka ii lau baa ba ɛŋ.
38Di Dimitrius ni u dɔŋahina dɔɔ ba wii, seriya dii dia la pillɔɔrɛ zinaa. A sitɔɔra ge du de. Ii gil ba la gaa sami dɔŋa. 39Di ba ga ɛɛ guŋ tuŋ di wii bɛl haa du de, a hɔl la nabɔnzi n wa chaalɛɛ la, bá kpa ŋɔ ba be. 40Ka kennaa iinna ɛɛ zinaa naa, ba daŋ kpaa pɛɛzi yaa. Di ba kpaa pɛɛzi yaa, yaa ge n waa wiimaa dɔɔwɛ ya ŋɔ naa, ba daŋ ŋɔ dí yaabuu gillɛ nɛra ra izi dɔm.” 41Uŋ wa ŋɔ guŋ tuŋ, u ta nɛra la, ba lii.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.