Mark i̱ Holisso 5
5
Chapta Talhlhápih (5)
Jesus at Hattak Shilombish Okpolo Anokfo̱kka ya̱ Masálachih
1Jesus hicha iyákayya alhíha yat oka píni (boat) o̱t alhto cha Galilee Okhata i̱ tannap ilhkólit Gerasa yakni a̱ oklah áyónattók. 2Hihma̱ Jesus at oka píni ákohchah aki̱ni ka̱ hattak shilombish okpolo anokfo̱ka yat illi áholloppi ámi̱tih ósh, Jesus a̱ a̱t afámattók. 3Hattak pat illi áholloppi ako̱ atta yattók. Hikma̱ kanah másh takchit bohlá híkiyot tahattók, tali ittiyátakáli íshi mákósh. 4Hikmat tali ittiyátakáli yá ibbak hicha iyyi isht takchi máko̱ oppannih bikattók. Hattak pa̱ kanahat ho̱klá híkiyottók. 5Nittak hicha ninak a̱ hattak pat áholloppi, hicha nánih apaknaka ya̱ hikit a̱yattók, taklholálit attah, hicha tali yómika̱ isht ilí bashlih yómih bíkattók. 6Hattak pat Jesus at mishíhmaho̱ a̱ya ka̱ pisahmat, pit o̱balíli cha iyyi kaláha isht o̱t binílit holítoblit ayoppachittók.
7-8Hihma̱ Jesus at áchihmat, “Shilombish okpolo chiyah at, hattak pa̱ ákohcha,” im áchittók. Hihma̱ hattak mat chitót taklholálit, “Jesus, Chihówa Móma i̱ Shahli Oshi chiya mah, nátaho̱ siyah mihchih chinnah átoko? Chihówa íhohchifo lhopólichit chim asilhhalih, is siyalbashshalinnah!” im áchittók.
9Jesus at shilombish okpolo ma̱ i̱ ponaklohmat, “Chi hohchifo yat nátah?” im áchittók.
Hihma̱ shilombish okpolo mat áchihmat, “Sa hohchifo yat Lawa, hapi láwah átoko̱” im áchittók. 10Hihma̱ shilombish okpolo alhíha mat, Jesus a̱ im asilhhahmat, “Hapi̱ yakni ákochit kani ish hapi chaffichinnah,” im áchittók.
11Makfokálika̱, nánih lapálika ma̱ shokka lawa alhíha yat i̱pah ósh ma̱yattók. 12Hitoko̱ shilombish okpolo alhíha mat Jesus a̱ im asilhhat áchihmat, “Shokka alhíha mako̱ ano̱ka pit hapi chaffichih. Yammako̱ ano̱ka alhto hapinnah,” oklah áchittók. 13Hihma̱, Jesus at shilombish okpolo alhíha ma̱ i̱ haklo ná hattak ma̱ ákocháwíhacha shokka alhíha mako̱ o̱t alhtottók. Hihma̱ shokka alhíha yat talhípa sipokni toklo (2000) o̱nah ósh nánih ma akka pit yilhípat okhata pit okattolat illit tahattók.
14Hihma̱ shokka pihlíchi alhíha yat oklah yilhípat tamáhah hicha yakni apakfo̱pa ka̱ ma̱ya alhíha, nána kaniyómitoka̱ o̱t im anólittók. Hihma̱ oklah pisah banna kat áyónattók. 15Jesus a̱ oklah im ónahmat, hattak, shilombish okpolo anokfo̱kah chásh yammat, bini̱liho̱ oklah pisattók. Hattak mat náfokka fo̱ka hicha im anokfila yat ittilawwi yósh yamma̱ bini̱littók. Hihma̱ oklah alhíha yat nokshópah fihnattók. 16Hattak ma̱ hicha shokka alhíha ma̱ nána ákaniyómitoka̱ oklah pi̱satok at tamáhah hicha yakni apakfo̱pa ka̱ ma̱ya alhíha ya̱ oklah im anólih ósh ma̱yattók. 17Hihma̱ oklah alhíha yat Jesus a̱ oklah i̱ nokshópah átokósh yakni ma̱ akanalláchi̱ ho̱ oklah imasilhhattók.
18Hihma̱ Jesus at yamma akanalláchi̱h ósh oka píni pit chokkowáchi̱h ósh a̱tta ma̱, hattak, shilombish okpolo yat anokfo̱ka chásh mat ta̱kla íya banna kat im asilhhattók.
19Hihókako̱ Jesus at híkiyo im ahnittók. Hicha i̱makáchihmat, “Chim ayokla alhíha imiya cha o̱t im anóli Chitókaka yat chi̱ka̱na cha nán achokma chi̱toka̱ chi̱ mihchittoka̱,” im áchittók. 20Hihma̱ hattak mat yamma̱ ákanalli cha yakni Decapolis (Tamáhah Pokkoli) íya cha Jesus at nána ho̱ i̱mihchittóka̱ kanah la̱wa ka̱ im anólittók. Hihma̱ oklah hakloh mat noklhaka̱cha fihnattók.
Allatík Illi Hicha Ohoyoh Abika Atoka̱ Masáláchih
21Jesus at falámat oka píni pit chokkówah mat Galilee Okhata i̱tannap onnattók. Hihmat oka píni ma̱ ákocha cha okhata lapálika ma̱ híki̱ya ma̱ oklah lawa alhíha yat Jesus a̱ im áyittahobat áfolótattók. 22Jew im áyittanáha tikba i̱híkiya achaffa kat o̱t a̱ttattók. Hattak pat Jairus hohchifo attók. Hihmat Jesus a̱ pisah mat imonattók. Hicha iyyi itto̱ma ya̱ tikba o̱t akka lhipíyattók. 23Hicha apíla banna kat imasilhhat áchihmat, “Siyoshitik at illi fokálih ósh itto̱la! Ish mi̱ti cha, chibbak átokma̱ o̱t ish o̱ bohlikma, masálicha okcha̱ya hi̱nah,” im áchittók. 24Hihma̱ Jesus at Jairus ta̱kla iyahma̱, la̱wa kat ta̱kla oklah ilhkólittók. Jesus a̱ oklah áfolótat bili̱kat kaniyah ósh ittanoho̱wattók. 25Oklah lawa alhíha ma̱, ohóyoh at issis mitáfa isht abíkattoka̱ (bleeding sickness) afammi awah toklo (12) o̱nah ósh atta atókat a̱yattók. 26Ohóyoh mat alikchi la̱wa ka̱ pisattók, hihókako̱ alikchi alhíha yat ná apílacha híkiyottók. Hikash pí i̱shat ilbashshalittok. Iskali kaniyómi ho̱ i̱shittok mat móma ka̱ alikchi alhíha ma̱ isht i̱ chilófattók. Hihókakósh ik masáloh ósh pí i̱shalit abíkat tahattók. 27Ohóyoh mat, Jesus at nána ho̱ mihchittoka̱ ha̱klottok ósh olbal ónacha i̱ náfokka pit patólittók. 28Ohóyoh mat anokfillihmat, “Pi i̱ náfokka pit patólilikmat, sa másalá hi̱nah,” ahnittók. 29Hihma̱ Jesus im í náfokka patólih akíni ka̱, ashshali̱t mítáfat issattók. Hihma̱ ohóyoh mat masáli kat ikkánattók.
30Makfihnah ma̱ Jesus at imisht lha̱ko yat kanah masálichi ka̱ ikkánattók. Hihmat folóta cha oklah alhíha ya̱ imáchihmat, “Katah ósh a̱ náfokka ya̱ potólih?” áchittók.
31Hihma̱ iyákayya alhíha yat i̱makáchih mat, Pisah, oklah lawa kat chitto̱mat chihali̱t ittanówat kaniya ka̱, katit, “Katah ósh sa potoli?” ish áchahi̱la?, oklah im áchittók.
32Hihókako̱ Jesus at kanah ósh potólitoka̱ pisah bannah ósh filímówattók. 33Ohóyoh mat ikkánatok nánah ósh ákánihmitoka̱. Hihátokósh nokshopat wannichih ósh mi̱tit Jesus tikba ya̱ a̱t akka lhipíyattók. Hihmat ohóyoh mat kanihmina yohmitokat Jesus im anólittók. 34Hihma̱ Jesus at ohóyoh ma̱ i̱makáchihmat, “Chi yimmi pollah átokósh himakno chi masálih ókih. Chihówa i̱nokta̱la (peace) yat chiya nokfo̱kaho̱ iyah. Abíka ma̱ chi masálih átokósh chi hottopáchi̱ kiyoh,” im áchittók.
35Jesus at anópolih ósh a̱tta móma ho̱, hattak kaniyómi kat Jairus i̱chokka ámi̱tit álacha Jairus a̱t i̱makáchihmat, “Chiyoshitik at illih ókih, hihoka̱ isht ish ataklamminnah, nán im ábachi pa̱!” oklah im áchittók. 36Hattak alhíha mat nána oklah áchika̱, Jesus at ha̱klottók, hihókakósh nán ik ahnottók. Hicha Jairus a̱ i̱makáchihmat, “Kanihmáchi̱ka̱ chi nokshopannah! Pi a̱yimmih,” im áchittók.
37Jesus at Peter, James, hicha ittiyápishi John, akilla ho̱ isht iyattók. Oklah i̱la kano ikíyo kiya imahnittók. 38Jesus, Peter, James hicha John at Jairus awa̱t i̱chokka ilhkólittók. Hihmat oklah at lawa ka̱ pi̱sattók. Hikmat oklahat nokha̱kloh ósh chitolit yayat shiníkachittók. 39Hihma̱ Jesus at chokka ano̱ka o̱t chokkówa cha oklaha̱ i̱makáchihmat, “Katína yayat yakot hash áshah atoko? Allatík pat illi kiyoh ókih! Pi nosih ósh itto̱lah ókih,” im áchittók. 40Hihókako̱ oklah alhíha yat Jesus i̱yokpattók. Hihma̱ Jesus at kanah mako̱ chokka aboha ma̱ ákochawit tahlittók. Hicha allatík ma̱ i̱ki hicha ishki hikmat iyákayya tohchína kásh makillaho̱ allatík mat kanímáko̱ ayitto̱latok ma̱ iláwít pit chokkowattók. 41Jesus at allatík ibbak ma̱ ishi cha, “Talitha koum!” im áchittók, yappat Allatík osi, tánih áchih. 42Hihma̱ allatík mat ashshali̱t wakáyat hikíya cha nówat folótattók affami yat awahtoklo ónah átokósh. Yohmi ma̱ oklah noklhaka̱cha fihnattók. 43Kanihmi toka̱, Jesus at kanaha̱ ik im anólo kiya ahnit oklah alhíha iba ma̱ya kásh ma̱ lha̱kochih ósh im anólittók. Hihmat Jesus at, allatík ma̱ illi̱pa imá hiná ahnit oklah im anólittók.
Currently Selected:
Mark i̱ Holisso 5: CHTW
Highlight
Share
Copy
Want to have your highlights saved across all your devices? Sign up or sign in
Choctaw Mark and Genesis Portions © American Bible Society, 2005.