Mark i̱ Holisso 4
4
Chapta Oshta (4)
Hattak Ná Hokchi Isht Anno̱pa
1Hihma̱, himákma̱ Jesus at Galilee Okhata lapálika ya̱, nán ayim ábachit hikít iyattók. Hihma̱ oklah alhíha yat lawah fihnah ósh ittahobat áfalótattók.
Yohmih ma̱, Jesus at oka píni (boat) okhata apaknaka hiki̱yah ma̱ pit chokkówa cha binílih ósh nán im ábáchittók. Hihma̱ oklah lawa yash at okhata lapálika maki̱liho̱ hiyohma̱yattók. 2Jesus at oklah alhíha ya̱, ná la̱wa ka̱ im ábachih ósh nán isht alhpisa ho̱ annówa yo̱ isht im anópolih ósh áchihmat, 3“Ho happonakloh! Hattak ná hokchi yat ná hokcháchi̱h ósh iyattók. 4Hitokósh nihhi fimmi ósh a̱yahma̱, nihhi kanimíkat hina lapálika yo̱ o̱lowílittók. Hihma̱, hoshi yat a̱t apat tahlittók. 5Hikma̱ nihhi kanimíkat tali apaknaka lokfi yat a̱sha a̱lhi kiyoho̱ o̱lowílittók. Hicha lokfi yat hofóbi kiyoh atoko̱ chíkosi offottók. 6Hihókako̱ hashi (sun) yat kochahma̱, nán offo yómi kat shilat tahattók, akshish (roots) at ik hofóbóh átoko̱. 7Hikma̱ nihhi kanimíkat shawwa haloppa ayitti̱takla yo̱ lowílittók. Nihhi yómikat offot iyahma, shawwa haloppa yómikat offot alótahmat abit tahlina, ná ik wayottók. 8Hikma̱ nihhi kanimíkat yakni achokmaho̱ o̱lowílittók. Nihhi kanímikat áwaya kat pókoli tohchína (30) onattók, hikma kanímikato lawakat pókoli hannali (60) ónattók, hikma̱ kanímikato lawakat talhípa achaffa (100) onattók,” áchittók.
9Hihma̱, Jesus at i̱makáchihmat, “Hachi haksobis isht haklachi̱ kat hachi̱ hi̱li kat, happona̱kloh,” áchittók.
10O̱t ahchíbat tahahma̱, Jesus hicha im apostle awahtoklo (12) alhíha hicha iyákayya alhíha kaniyómi kat iláp akillah ósh máyahmat nán isht alhpisa annówa yómi kásh mat nánaho̱ makáchih oka̱ oklah ikanna bannat ponaklottók.
11Hihma̱, Jesus at i̱makáchihmat, “Hachishnákósh Chihówa im ápihlichíka isht imma ya̱ hash akostinícháchi̱ ka̱ Chihówa yat hachi yátókolittók. Hikako̱ oklah siyákayya kiyoh alhíha ato nán isht alhpisa annówa ya̱ oklah hakloh hókakósh oklah akostiníchih kiyoh.
12Kaníhminá yammat yohmi kato: ‘Yakómikat nánaka̱ oklah pihi̱sah ohmákósh oklah ikimikáno káchi̱h. Hikmat am anno̱pa ha̱ oklah háha̱kloh ohmákósh ná oklah ikimikáno káchi̱h. Hitokmato, Chihówa ya̱ oklah i̱folótah mash yohmá hi̱natok hicha im áyashshachíka yat oklah at i̱kashófa hi̱nah ókih,’” im áchittók.
13Jesus at oklah i̱makáchihmat, “Nán isht alhpisa annówa (parable) ilappa̱ hach ikimikánoh okmat nán isht alhpisa annówa i̱la ka̱ hash im akostini̱cháchi̱h kiyoh ókih.
14Nánaho̱ makáchi ka̱ hachim anoliláchi̱h. Nihhi ya̱ ná hokchi yat fimmi kásh mat Chihówa im anno̱pa ak ókih.
15Nihhi yat hina lapálika o̱lowíli kásh yammato, oklah alhíha yat Chihówa im anno̱pa oklah hakloh kak ókih. Hihókako̱, Chihówa im anno̱pa haklo kásh ma̱, chíkosi maki̱liho̱ Satan at a̱t imiyaksichih ókih. 16Nihhi yat tali lawa apaknaka lokfi yat a̱shah a̱lhi kiyoho̱ o̱lowíli kásh yammat, oklah alhíha yat Chihówa im anno̱pa ya̱ oklah hakloh hicha ashshali̱t ná yokpah ósh yimmi ókih.
17Hihókakósh ná yimmi a̱lhi yat oklah ikimikshoh, hihátokósh chíkkosi takla kako̱ lha̱kot hiyohma̱yah ókih. Mak átokmat ná yimmi atók takla ná kanah at hotoppalikma̱, kiyokmat nánakat palammikma̱, chíkkosi Chihówa iyákayyat oklah issah ókih. 18Nihhi yat shawwa ná haloppa ayitti̱takla yo̱ o̱lowíli kásh yammat oklah alhíha ak ohmih, oklah at Chihówa im anno̱pa ya̱ hakloh.
19Hihókako̱, oklah alhíha yómikat ná la̱wa ka̱ isht oklah ataklamma, hikmat iskali oklah i̱ lawah bannah, hikmat ná i̱la ka̱ oklah bannah. Hihátokósh Chihówa im anno̱pa ano imiyaksi hicha oklah iki̱bátíyoh.
20Hikma̱ nihhi yat yakni achokma o̱lowílih kásh yammat oklah alhíha yat Chihówa im anno̱pa haklo cha i̱ yimmih hicha Chihówa i̱bátiya kat ik isso ak ohmih. Oklah alhíha yat, ani api (fruit tree) yat o̱cholólit ani (fruit) pokólih tohchínah (30) kiyokmat ishit pokóli hannálih (60) kiyokmat ishit talhípa achaffah (100) offochih ak ohmih ókih,” áchittók.
Palah Isht Imma
21Hicha Jesus at áchihmat, “Palah ish tobáchi cha taposhshik (basket) notáka chik találoh ósh, ánosi notáka akmáko̱ chik találoh ósh palah áyo̱hikíya yo̱ ish o̱hilíchih.
22Makohmiho̱ nána móma kat loma átok mákósh anno̱wáchi̱h. Ná loma átokma̱ kanah mákósh oklah ikkanáchi̱h ókih. 23Hachi haksobis ishit hakláchi̱ kat hachi̱ hi̱li kat, happonakloh!
24Nánaho̱ makálika̱ ahchokmat hoha̱kloh! Nánahmák kanohmiho̱ ish hopílakat makohmih ishísháchi̱h ókih, hicha ish happona̱klokmat i̱shahlika̱ ishísháchi̱h.
25Kanah ósh nána i̱shikmat ma i̱shahlika̱ ísháchi̱h, hikma kanah ósh ná iskiti̱ni i̱shitokiya makmákósh i̱kaniyachi̱h,” áchittók.
Nihhi Yat Offoh Isht Anno̱pa
26Hihma̱ Jesus at áchihmat, “Chihówa im ápihlichíka yat yappak ohmi. Hattak ná hokchi yat yakni ya̱ nihhi fimmi: 27Hikmat ninak hicha nittak ayyoka ka̱ nosih hicha to̱ksalih ósh a̱ttah, nihhi hokchi kásh mat offoh, hihókako̱ kaníhmih ósh offo kano ikkana kiyoh. 28Hattak ná hokchi mat, apílah kiyoh máko̱ yakni másh nihhi ma offochih. Ti̱kba kano nihhi yat offot mi̱tih, itokmat offot iyak mat ná waya, (grain) noshkobo yat toba tokmat wayat taha. 29Hikma̱ offot taha cha ámo onak ma̱ hattak ná hokchi mat kanah alhíha yat o̱t amáchi̱ho̱ osápa ma̱ pit chaffichih,” áchittók.
Mustard Nihhi Isht Anno̱pa
30Hihmat Jesus at áchih mómah mat yappa̱ makáchittók, “Chihówa im ápihlichíka yat nátah ohmi ho̱ ímakácha hi̱nah choh? Nán isht alhpisa annówa nátaho̱ ishit hachim anólilá hi̱nah? 31Chihówa im ápihlichíka yat mustard nihhi ak ohmih ókih. Nihhi yammat nihhi yakni ahollokchi móma ka̱ osi kat i̱shahlih. 32Hihókakósh, nihhi osi mat hokchik ma̱, offot tahah okmat ná waya alhíha ma̱ móma ka̱ chito kat i̱shahlih ókih. Hikmat naksis (branch) at hochitot offo ka̱ hoshi alhíha átok mat naksis apakna ma̱ i̱chokka ayikbá hi̱nah,” áchittók.
33Jesus at oklah alhíha átokma̱, nán isht alhipisa annówa (parables) yakómi ho̱ isht im ano̱polih ósh nán im ábachittók. Hikmat, oklahat haklá hi̱nah alhlhi ka̱ isht im anopoli attók.
34Oklah alhíha ya̱ nán im anólikmat, nán isht alhpisa annówa akilla ho̱ isht im anópoli attók. Hihókakósh, Jesus hicha iyákayya alhíha at iláp akillah ósh ma̱yak mano, nán isht alhpisa annówa mat nánaho̱ makáchika̱ im anóli attók.
Jesus at Mahli Kallo Hicha Oka Powákachi ya̱, “Issah Hicha Cholo̱sah,” Im Áchih
35Okítiya maki̱ni ka̱ Jesus at iyákayya alhíha i̱makáchihmat, “Okhata (lake) i̱tannap kililhkóli,” im áchittók.
36Hihma̱ iyákayya alhíha yat oklah lawa alhíha kásh mat ma̱yaná Jesus a̱ oka píni pit ibá alhtocha isht ilhkólittók. Yohmih ma̱ oka píni i̱la kak kiya apihat a̱yattók.
37Okhata awánablit iyah ósh ittanóho̱wah ma̱, mahli kallo hicha o̱ba chito kat o̱wakattok. Hihma̱ oka yat powákachi kat oka píni ma̱ a̱t íhi̱ssoho̱ pit áha̱lhto ma̱, oka yat alótat tahattók 38Hihókako̱ Jesus ato oka píni a̱shaka ma̱ inoshkóbo ya̱ alhpishshi (pillow) o̱bohli cha nosih ósh itto̱lattók. Hihma̱, iyákayya alhíha yat okcháli cha i̱makáchihmat, “Nán im ábachi mah, oka ano̱ka oklah hapilláchi̱ kako̱, nána isht ish hapiyahni kiyoho̱?” oklah imáchittók.
39Hihma̱ Jesus at wakáyat hikíya cha mahli kallo ma̱ hicha oka powákachi ma̱, “Issah hicha cholo̱sah,” im áchittók. Hihma̱ mahli kallo yat issah ma̱, nánah mákósh o̱t cholósattók.
40Hihma̱ Jesus at iyákayya alhíha ya̱ i̱ponaklohmat, “Katína hachi nokshópah? Ná yimmi yat ik hachimiksho ho̱?” im áchittók.
41Hihma̱ oklah nokshópah fihnattók, hicha oklah itti̱makáchihmat, “Katah okako̱ mahli kallo hicha oka powákachí atokmakósh i̱batiya!” oklah áchittók.
Currently Selected:
Mark i̱ Holisso 4: CHTW
Highlight
Share
Copy
Want to have your highlights saved across all your devices? Sign up or sign in
Choctaw Mark and Genesis Portions © American Bible Society, 2005.