Mark i̱ Holisso 2
2
Chapta Tokloh (2)
Jesus at Hattak Ihaknip Witiklá Hikiyo Masáláchih
1Hitoko̱, nittak kanohmi kat o̱t iyah ma̱, Jesus at falámat Capernaum tamáhah alattók. Hihma̱, oklah alhíha yat haklottók, Jesus at chokka ano̱ka a̱tta ka̱. 2Yohmih ma̱, oklah alhíha yat lawakat chokka ma̱ a̱t ittahóba ka̱ áhikiya hi̱nah kat ikshottók. Hikmat, okhissa ít áchokowa akmáko̱ áhikiya hi̱nah kat ikshottók. Hihma̱ Jesus at Chihówa im anno̱pa im ábachih ósh a̱ttattók. 3Hihma̱ hattak at ihaknip witiklá híkiyo yo̱, oshtah ósh itti̱shólit isht im álattók. 4Hihókako̱ oklah alhíha yat lawah fihna toko̱ nánit hattak ma̱ Jesus bili̱ka oklah isht imóná híkiyottók. Hitokósh chokka apakna ma̱ lho̱pa oklah ikbittók, Jesus at áhi̱kiya apaknaka ma̱. Hicha mihchit oklah tahlihmat, hattak mat áyo̱nosi o̱notto̱la ho̱, lho̱pa ma̱ pit lhopillichit akka isht onattók. 5Yohmih ma̱ Jesus at, oklah alhíha pat i̱ yimmi ka̱ pisahmat hattak ihaknip witiklá híkiyo ásho̱ i̱makáchihmat, “A̱kána mah, ná chim ayashshachika móma kat chi̱ kashófah ókih,” im áchittók.
6Hihma̱ Moses i̱ Nán Alhpisa im ábachi alhíha (teachers of the Law of Moses) kaniyómi kat yamma̱ binohma̱ya tokat yakot oklah anokfillikat, 7“Katihmi ná yakot makáchih? Hattak pat anópoli kat Chihówa ilá ittillawíchih ósh anópolih! Chihówa akilla kásh kanah a̱ nán im ayashshachika i̱ kashoffa hi̱la ókih,” oklah ahnittók.
8Hihókako̱ ashshali̱t Jesus at ikkánattók nánaho̱ oklah anokfilli ka̱, hicha i̱makáchihmat, “Katina yot hash anokfilli cho? 9Hattak witiklá híkiyo pa̱, ‘Ná chim ayashshachika at chi̱ kashófah ókih’, im áchilih, chó, ‘Tánicha, chim ayónosi ya̱ shólicha nówáh’, im áchilik mak hachi yimmáchi̱ chó? 10Kanihmih kiya hattak pa̱ masálichíláchi̱h. Kanahat nán ayashshachika ka̱ i̱kashoffilá hi̱nah kat hachi pisáchiláchi̱h. Hikma̱ hash ikkánáchi̱h, anakósh, Hattak Oshi Holittópa (Holy Son of Man) siyah, hicha yakni apaknaka pa̱ kanahat nán ayashshachika ka̱ i̱ kashoffila hi̱nakat nán isht alhpisa i̱shilika̱,” im áchittók. Hihmat, Jesus at hattak haknip witiklá híkiyo ásh i̱makáchihmat, 11“Tánicha, chim ayónosi ishi cha, chi̱ chokka iyah, chim áchilih ókih,” im áchittók. 12Hihma̱ ashshali̱t tánittók hicha im ayónosi ishi cha iyattók. Hihma̱ mómakat yamma̱ oklah pi̱satok at noklhaka̱chah fihnattók. Hicha Chihówa oklah ayokpachih ósh áchihmat, “Nána kat yakohmi ka̱ oklah ípisa kiyoh ósh oklah ípisah ókih,” oklah áchittók.
Jesus at Levi I̱payah Iyakáyya Chi̱ka̱
13Hihma̱, Jesus at Galilee Okhata lapálika ma̱, falámat iyattók. Hihma̱ oklah la̱wa kat Jesus áyittahóbat áfolótattók. Makohma̱ nán im ábáha̱chittók. 14Hitokósh, nowah ósh a̱yahmat, hattak Levi hohchifo, Alphaeus oshi yat im áto̱ksali, iskali ayowa abóha bini̱li ka̱ pisattók. Hihmat, Jesus at im áchihmat, “Siyákayyah!” im áchittók. Hihma̱, Levi at wakáyat hikíya cha iyákayyattók.
15Ahchíhba ma̱, Jesus at Levi i̱ chokka anóka ya̱ o̱t iba i̱pah ósh bini̱littók. Hikma̱ iskali ayówa alhíha hicha nán ashshachi alhíha yat lawa hósh, Jesus hicha iyákayya alhíha ya̱ takla binohma̱yattók. Oklah alhíha yakómi kat lawah ósh Jesus iyakkayyat ittanóho̱wattók. 16Hihma̱, Moses i̱ Nán Alhpisa im ábachi Pharisee alhíha yat yamma̱ pi̱t oklah pi̱sattók. Hicha Jesus iyákayya alhíha oklah i̱ ponaklohmat, “Katína ná hachim ábachi yat iskali ayowa alhíha hicha nán ashshachi alhíha iba i̱pah choh?” oklah im áchittók.
17Hihma̱ Jesus at yappa̱ haklohmat, oklah i̱makáchihmat, “Abíka kiyoh alhíha ato alikchi bannah kiyoh, hihókako̱ abíka alhíha ato hihókih. Yammaki̱lih ohmi ka̱ achokma alhíha ano i̱ pa̱yat nówalitok kiyoh, hikásh nán ashshachi alhíha akósh Chihówa oklah i̱folatacha i̱batiya chi̱ kako̱ i̱payat no̱walitok,” im áchittók.
Iki̱poh Ósh Anno̱pa Ilbashsha Asilhhá Isht Imma
18John Baptist iyákayya alhíha hicha Pharisee alhíha yat iki̱poh ósh anno̱pa ilbashsha asilhhah ósh (fasting) ma̱yah bíkattók. Yohmih ma̱ nittak achaffa ka̱, oklah alhíha kanímikat Jesus a̱ imóna cha yakot i̱ ponaklohmat, “Katína John iyákayya hicha Pharisee iyákayya alhíha yat iki̱pohósh anno̱pa ilbashsha asilhhat ma̱yah. Hihókako̱ chiyákayya alhíha ato kiyoh?” oklah im áchittók.
19Hihma̱ Jesus at afalammi̱chit i̱makáchihmat, “Hattak at ittawáyáchi̱ kat, i̱ka̱na alhíha ibá ta̱kla a̱ttah móma ka̱, oklahat iki̱poh ósh anno̱pa ilbashsha asilhhat máya hi̱nah cho? 20Hihókako̱ hattak at ittawáyáchi̱ yamma̱, oklah ásanáli yat a̱t hoklit isháchi̱h nittak at aláchi̱h ókih. Hikma̱ oklah nokha̱klo kat iki̱poh ósh anno̱pa ilbashsha asihi̱lhháchi̱h ókih.
21Kanah at nátanna (cloth) himóna ya̱ lhilaffit áyíshicha náfokka lhipa ya̱ lho̱pa taka̱li ka̱ apaknachit acho̱li kiyoh. Yamma̱ mihchikma̱, nátanna himóna mat osit taháchi̱, hikmat náfokka lhipa ma̱, lhilaffit i̱shat lho̱bláchi̱h. 22Hikma̱ kanah at pa̱ki okchi (wine) himmóna ya̱ áyalhto, ná hakshop isht átoba lhipa yo̱ ápittah kiyoh. Yamma̱ mihchikma̱ pa̱ki okchi mat homit iyakmat ná hakshop ma̱ bokaffáchi̱h. Makokma̱ pa̱ki okchi hicha ná hakshop mat okpoláchi̱h. Hihátoko̱ pa̱ki okchi himóna ya̱ ná hakshop himóna yo̱ ápitta hi̱natok,” im áchittók.
Nittak Holittópa Nittak Isht Imma
23Nittak Holittópa nittak (Sabbath), himmóna ka̱ Jesus hicha iyákayya alhíha yat ná wáya (grain), áhollokchi a̱sha ka̱ nówat lhopóli ósh ittanóho̱wattók. Hihma̱ Jesus iyákayya alhíha yat ná wáya ma̱ nihhi oklah apáchi̱kat amot isht hikít iyattók. 24Hihma̱, Pharisee alhíha kaniyómi kat oklah áchihmat, “Katihminá Nittak Holittópa nittak ókako̱ chiyákayya alhíha yat ná wáya nihhi amoh? Nán alhpisa yat áchikat, oklah mihcha hítok kiyoho̱ áchih ókih!” oklah im áchittók.
25Hihma̱ Jesus at i̱makáchihmat, “David hicha áyittapiha alhíha yat oklah hokchafo hicha illi̱pa bannahmat nánaho̱ mihchih toka̱, Holisso Holittópa ma̱ taka̱lika̱ hachik ittimanópólo yo̱? 26Nittak makfokáli ka̱, Abiathar akósh mi̱ko priest i̱ noshkobóka i̱shahli yattók. Nán alhpisa yat áchikat, pallaska holittópa ya̱ priest alhíha akillah ósh apa hi̱nah áchih. Hihkiya, David at Chihówa i̱ chokka o̱t chokkówa cha pallaska holittópa ma̱ apattók. Hicha áyittapiha alhíha akmáko̱, pallaska ma̱ imattók,” im áchittók.
27Hihmat, Jesus at Pharisee alhíha im áchihmat, “Nittak Holittópa nittak at oklah alhíha ako̱ apíláchi̱ho̱ Chihówa yat ikbittók. Nittak holittópa nittak at oklaha̱ i̱ mi̱ko áchi̱ho̱ Chihówa yat ikbittók kiyoh. 28Yohmi hátoko̱, Hattak Oshi Holittópa akósh Nittak Holittópa nittak a̱ i̱ mi̱ko ókih,” im áchittók.
Currently Selected:
Mark i̱ Holisso 2: CHTW
Highlight
Share
Copy
Want to have your highlights saved across all your devices? Sign up or sign in
Choctaw Mark and Genesis Portions © American Bible Society, 2005.