Matiu Sotfala stori blong buk ya
Sotfala stori blong buk ya
Buk ya, GUD NIUS BLONG JISAS KRAES WE MATIU I RAETEM, hem i talemaot gud nius se Jisas*, hem i man we God i bin promes long ol man blong hem bifo, se bambae i kam blong sevem ol man blong hem. Mo long Jisas, ol promes we God i bin mekem long ol man ya blong hem long Oltesteman, oli kamtru. Jisas i bon long ples blong ol laen* blong Isrel*, mo hem i wan long olgeta, i stap wetem olgeta, be gud nius ya i no blong olgeta ya nomo, i blong olgeta man long wol.
Matiu i putumgud ol haf blong buk ya i stap olsem. Fastaem, hem i tokbaot we Jisas i bon, mo i gohed blong talem stori we Jon i baptaesem hem, mo we Setan* i traem hem. Mo biaen, hem i tokbaot we Jisas i statem wok blong hem long distrik ya Galili*, i stap talemaot gud nius long ol man, mo i stap tijim olgeta, mo i stap tekemaot sik blong ol man. Mo biaen bakegen, hem i tokbaot we Jisas i aot long Galili i wokbaot i go long Jerusalem*, mo hem i tokbaot ol samting we Jisas i mekem long las wik blong wok blong hem. Mo laswan, hem i tokbaot we Jisas i ded, mo i laef bakegen.
Matiu i tokbaot we Jisas i wan nambawan tija we hem i gat paoa blong talemaot mining blong Loa* blong God, mo i tokbaot fasin we God i kam King* blong ol man blong hem. Plante long ol samting we Jisas i tijim ol man long hem, Matiu i seraot long faef haf.
1. Jisas i tijim ol man blong hem antap long hil. Long tijing ya blong hem, hem i talemaot fasin we ol man oli mas mekem, blong oli kam we God i King blong olgeta. Mo hem i talemaot wok blong olgeta, mo ol raet blong olgeta, mo ol samting we bambae oli kasem long en blong laef blong olgeta long niufala wol ya we God i King long hem. Ol tijing ya blong hem i stap long japta 5 go kasem japta 7.
2. Jisas i tijim ol twelef man blong hem, mo i givim paoa long olgeta blong oli go talemaot gud nius blong hem long ol narafala man. Ol tijing ya i stap long japta 10.
3. Ol parabol we Jisas i talem blong tokbaot ol man we God i King blong olgeta, mo niufala wol we bambae oli go stap long hem. Ol parabol ya i stap long japta 13.
4. Jisas i tijim ol man blong hem long fasin we man i mas mekem blong i biaen long hem. Ol tijing ya i stap long japta 18.
5. Jisas i tijim ol man blong hem, i tokbaot ol samting we bambae i kamtru long lasdei, mo we niufala wol we God i King long hem, bambae i kamtru. Ol tijing ya i stap long japta 24 mo japta 25.
Ol haf blong buk ya
Ol bubu blong Jisas mo Jisas i bon 1.1—2.23
Wok blong Jon Baptaes 3.1-12
Jon i baptaesem Jisas, mo Setan i traem hem 3.13—4.11
Jisas i mekem wok blong hem long distrik ya Galili 4.12—18.35
Jisas i aot long Galili i go long Jerusalem 19.1—20.34
Las wik blong Jisas we i mekem wok blong hem long Jerusalem mo ol ples klosap long Jerusalem 21.1—27.66
Jisas i laef bakegen mo ol man blong hem oli luk hem 28.1-20
Currently Selected:
Matiu Sotfala stori blong buk ya: BBR
Highlight
Share
Copy
Want to have your highlights saved across all your devices? Sign up or sign in
Bislama Revised Bible © Bible Society of the South Pacific, 2012.