Malakae 4
4
Dei blong Hae God i stap kam klosap
1Nao Profet Malakae i talemaot we Hae God i talem se, “I gat dei i stap kam, we mi bambae mi bonem ol praod man mo ol man nogud long faea, olsem we man i bonem gras, we i bon we i bon olgeta, i no moa save gru bakegen. Long taem ya, bambae mi bonem olgeta evriwan, we bambae i no moa gat wan i stap. 2Be yufala ya we yufala i stap ona long mi, bambae paoa blong mi blong sevem man mo blong mekem hem i stret man long fes blong mi, bambae i kavremap yufala olsem san we i girap, nao laet blong hem i saen, i kavremap olgeta samting, nao bambae yufala i kam gud bakegen. Bambae yufala i fri, yufala i glad, olsem smol buluk we man i tekemaot long fenis, i letem hem i gofri, i stap jamjam. 3Long dei ya, taem we mi mi jajem ol man, bambae yufala i winim ol man nogud, nao yufala i stap purumpurumbut long olgeta i godaon long graon. Mi mi Hae God, mi gat olgeta paoa, mo hemia tok blong mi.
4“Bambae yufala i no fogetem ol loa mo ol tok, we Moses, man blong wok blong mi, i tijim yufala long hem. Ol tok ya, mi bin givim long hem long Hil ya Sinae#4.4: Sinae. Long Oltesteman long lanwis ya Hibru, i gat narafala nem blong hil ya Sinae long ples ya se Horeb., blong yufala ol laen* blong Isrel* i folem.
5 #
Mat 11.14; 17.10-13; Mak 9.11-13; Luk 1.17; Jon 1.21 “Bambae mi sanem Profet Elaeja i kamtru long yufala fastaem, nao biaen, bigfala Dei blong mi, bambae i jes kamtru we olgeta man bambae oli fraet long hem. 6Taem profet ya i kamtru, hem bambae i mekem we ol papa wetem ol pikinini blong olgeta we oli stap seraot, oli joen gud bakegen, oli stap gud. Sipos i no olsem, bambae mi mas kam spolemgud ples blong yufala.”
Currently Selected:
Malakae 4: BBR
Highlight
Share
Copy
Want to have your highlights saved across all your devices? Sign up or sign in
Bislama Revised Bible © Bible Society of the South Pacific, 2012.