Titus 1

Di̱siir

1Mi̱na Bulus naba nanga Kwama Fandu Yesu Masiyane. A suti a twiye di̱ne ke n yo keku bi̱yili̱mang we ni̱bu n Kwama sutumu a ru, ke n maka ti̱chi a swaan bi̱yili̱mu we bunti̱ki̱ chirengu. 2Keku bi̱yili̱mangu, n chi a yo ni̱ru we ti̱kuri ki̱diya kwaditu. N Kwama a ne mwe ti̱kwanitu, ti̱tu n Kwama a bwa̱u ka ni chi feredi we tile bi̱rketu. 3Aya yo ki̱swi ko a lame, n ki̱n a yung ya̱m bi̱li̱mi kwa̱rikwa̱ri, n ni̱n fal ni̱n mwa ni̱bu. N Kwama naba yuke chire a yoi mi̱n da̱ng ki̱mi̱n nangang ki̱ku. 4M mwal Titus mi̱n bwe nanga mi wu yile we keku bi̱yili̱mangu ki̱ku n chi̱ni ki̱ni kwangangu. Li̱me n ti fiswe li̱me a di̱Kwama Te n ti Yesu Masiya naba yuke chire a swe ware ti mun.

Nangang Titusangu we Korinti

5Di̱ne titte n dun we kunna Kirite mi ke n swang nangangu niyang dubbangu, mwang yo seli̱bu we ka di̱di̱le bi̱ne, yinangu mang fwami̱nangu 6Sele a kaddu wu ni̱bu ki̱fwara ya̱mi yiyu a lebi̱lei we dur ki̱ne we, a wu ki̱ni naye wiine, ti̱nti̱ne sele a kau wu bwesi̱m ki̱mu a ke bi̱yili̱mu n ke bi̱bu a ne kwa̱mbi̱r we. 7Wakili tikake ni̱bu bunti̱ki̱me, a kedu ya̱m bi̱bwilamu we dur ki̱nu di̱ne nangang Kwamangu n ki̱n ki̱madangu, a kaddu wu n kawure ki̱ ku ki̱le ko we, a kaddu wu ki̱kukku dur ki̱ne we, ka wu ki̱ma ki̱fwini date, ka naba nori̱ne, ka naba muli̱n ne, ka wu ki̱ni ki̱dwanki ka̱mbi̱re. 8A kau nii wu ki̱yiu rungko, wu ki̱mi̱la maku chi a leleye, n ke ni wu kulangkulange, naba yile, nii wu wauwade, wu ki̱tau dur ki̱ne. 9Tikake n ki̱n nang wu ka tidu we bi̱yili̱m ya̱m Kwamamu kangu n ki̱n a ya mi̱ne miyakangu, ke n ki̱n a ru bi̱kamu we di̱mwaru ti miyaku ki̱yilangu, yinu n ki̱n ka medu ka kwa̱l ti̱lairi bi̱bu a kebu ki̱ni miyaki̱ kangi̱mu.

10Aya ni̱bu nabwen we bi̱bu ka kwila miyaki̱mu, ka ni̱n fwara ya̱mi yi kusi, ki̱butu bi̱kamu ni̱bu, ka kwa̱l di̱du ki̱yidu ko ka ni a bibu laare a ne ya yuku. 11A mwintuwe ni wela chidu ke a yinge yii chi. N chi ki̱kai loniyu nabwen ki̱ni miyaku ti̱kwaniyang chiyangu ki̱yoti̱ ni̱r we ko chi yaan di̱dibi̱rangu. 12A lanti̱n wuka fa̱ku wu n ki̱n naba ki̱retan a fwa ko, “Ni̱bu a Ki̱retamu ki̱mwera ti̱kwani, nai yi kwani yiyu bwitiyi bubbuku ki̱chau ka chi.” 13Ya̱m bi̱bu bi̱yili̱m. Di̱ne yiko, a ma ti̱welantu yinang, ke n chi a tiwe keku bi̱yili̱mang ki̱yilangu.

14Di̱ne ke n chi a lekaduwe ya̱mi seli̱bu ni̱bu Yafudamu bi̱bu a ko bi̱yili̱mu . 15Kanang ti̱ti̱le chiye yi wauwadu we bi̱bu ki̱ni wauwade ni̱remu. Aya a ne chi wauwade we bi̱bu a ne bi̱yili̱m wemu n ti keku bi̱yili̱mangu, di̱ne ti̱kuran chitu n ti da bunti̱ke chi a kaiyan. 16Ni̱bu bi̱bu ki̱fwadu ko chi yim Kwama, aya we da chi ki̱kwila Kwama. N chi a kau ni̱bu ti̱bwitani̱m, a ne kwa̱mbi̱r we, a mebu a mabu chi ti̱yili.

Currently Selected:

Titus 1: Tula

Highlight

Copy

Compare