2 Timoti 4

1Mi̱n fwa ya̱m bi̱bu ki̱ni dukan Timoti, we Kakku Kwama n ti Masiya wu ka kaba bi̱kuri̱m n ti bi̱bwari̱m mi̱nde, ti̱nti̱ne di̱ne ka ki̱ladu beka ma mati̱n ti̱ti̱niye. 2Ma di̱mwar ya̱m Kwamammu, do bwi kasi no da we ko no newe. Do ni̱bu, ti ki̱ri̱ng mwi a chadu kakku we bwila a nang ma ti̱yili chi. Tau bwanu we chiti kwang nang miya ni̱bu mi̱n ya̱m Kwamamu.

3Nangki̱n ki̱siwi ki̱bedu wu ni̱bu a ne mi̱la nweku ya̱m bi̱yili̱mangu n ti miyaku ki̱yilangu. N ti ki̱ki yikongu, n chi ka mi̱la chi ni̱r chi̱n ki̱badde. N chi ka ri dutu chitu ki̱ni ni̱bu yungki̱m bi̱bu ka fwa chimi̱n ya̱mu a wa̱re ka li̱ma chi bwiye. 4N chi ka swa̱ba bi̱yili̱mu, ka bunti̱ miyaku ribang.

5Aya so yimwiyu we chiti kwang. Mu ni̱ru we riye, chakakku ki̱ni di̱mwar ya̱m bi̱li̱mi̱nu. Ma nangangu n Kwama a yo mi̱n a fa̱la̱ngu yinang.

6N tu m bwa̱u kui we wadwadu wa damiye n ti nangang Kwamangu mi̱n madangu. Di̱ne ne mang dadi yurau mang bwadu. 7M ma kun di̱yili̱n, n ri banangu, mang ki̱labi kuteng we keku bi̱yili̱mangu. 8Ki̱ka̱ngu a dumi ka di̱ki̱ri̱n dwiyeni̱nu, ki̱yaiyu we bwadi di̱ne Kwama a nwe ta̱ma̱ng mange. N Tewuduwe wu ki̱mwata ni̱bu mi̱nde, ka ni di̱ki̱ri̱n ki̱ti̱me mi̱nu we di ki̱lake ko kasi ki̱ku n ke kana mi̱n mang yiu di̱ki̱ri̱nu aya n ti bi̱bu a swe ki̱yam ki̱laku kangangu.

Ti̱kwa̱li yii mi

9Timoti funti̱bwi be bwa di̱ mi̱ne daatu. 10N Dimas wu a dui di̱ne ti̱ti̱niye, a yika Tasalonika. N Ki̱rsens a yika Ka̱latiya yinu n ti Titus a yika Dalmatiya. 11Kana Luka nang wu n we ware n ti mi̱ne. Yo kano mun bede, bunga ware n ti Markus di̱ne ka ma mi makaku we nangangu. 12N tum Tikiku a Afisa. 13Yo mwang bede, da̱mite luke chuye wu mang duwe a fa̱la̱ng Karbus a Toruwa, n ti Tatti̱ki̱da yiyu, tabedu Ti̱bali̱n ti̱mwalanitu we. 14N Aleksanda wu ki̱tu kube, a yo nangang mangu a chabu kakku. N ki̱n we ka ya ki̱ti̱me ko we Kwama. 15Di̱ne yiko, mun ti̱n ma ni wi daandaan di̱ne a kebu miyaki̱ chirengu.

16Di mang mwe mang ti a kakku ni̱bu kabaki̱m ke n ni di̱ki̱li̱n yiin we ya̱m mi̱mu n chi a kebi̱mu, a ne ni a timituwe we. N chi a yaran a dui we. N twa̱ba̱n mi Kwama a du chimi̱n di̱ne n chi a yaran a du mi̱n we. 17Aya n Kwama a timituwe a makai ki̱ni runni wu a yo mang me mang ma di̱mwar ya̱m bi̱li̱m Yesu Masiyami tasitu. Ke bi̱bu n ke kuu ni̱bu Yafudam we fikomu a nwe. N Yesu Tewuduwe a timituwe a yo n chir we fa̱li bwayu. 18N Tewuduwe ka chakiyu we kasi no a wuwule bwila, ka yodu mang lam loko we bwadi li̱mang. A le ni dela Kwama Tewuduwe ki̱diya kwadu. Amin.

Di̱siiru m Bulus a swan mi̱ni̱n

19Ti̱simi̱ti̱ Biriskila n ti Akila n ti di̱kur lon Onesiforu. 20N Yeratu we Korinti lanta di. N duwe Tarofimu a bubuwe we Miletus. 21Funti̱bwi lam fi ki̱ni didi̱be. N Yubulu n ti Fudens, n ti Lainus, n ti Kalaudiya n ti bi̱kamu kebu kwang ki̱si chinedu. 22N Kwama a swe ware n ti chi̱n. N Kwama a dela chi̱ni ki̱ni kwang.

Currently Selected:

2 Timoti 4: Tula

Highlight

Copy

Compare