Dwakam 5
5
Takida daalke n ti Be Kwane
1N ku takida daalke we kang ki̱yilang wu a swe we ki̱di̱ng mati̱nange. A ri ki̱ni ti̱mwalantu kasi no ki̱ki̱le ba̱la̱ng, a tal ki̱ni dukan kale. 2Yinu n ku nabwe ti naba di̱tumbi̱ri Kwama ki̱ma di̱mwar ki̱ni ker di̱dun ko, “N wure a lwe ka wudu kale dukane n ti takida daalke?” 3Aya a ne nii we ti̱ti̱nitu ka a bwa diye wu a lwe, ka a ni̱r di̱ti̱ne, ka wudu takida daalke ka ka yidu ko ka da̱ngde. 4N ki wii a tiibwi di̱ne a ne ni a lwe wu a dakan ka wudu takida daalke ka ka dangde we. 5Yinu wuka we seli̱bu a ya̱i ko, “Kidu wii we.” Turum wu a chire a kuu Yafuda a ki̱fi̱ku Dauda a chau ki̱la, n ki̱n ka wudu kali dukan yidibiniyu yinu ka wuduti̱ takida daalke.
6N da̱ng, n ku Kwanu a ti ki̱do n ti fiswe maiye. Bi̱kuri̱m bi̱bi baanamu a kan ki̱n a tibe n ti seli̱bu. Ki̱ni ki̱sumi yidi̱bin n ti kwa̱langi yidi̱bin, nang fi̱ki̱m Kwamami yidi̱bin a tume we ti̱ti̱nite.
7N ki̱n a be a da̱u takida daalke we kang ki̱yilang wu a swe a ki̱di̱ng mati̱nange. 8Yo n ki̱n a da̱u takida daalke, bi̱kuri̱m bi̱bi baanamu n ti Seli̱bu wan taana chiri baanamu, a sungeni kukus we kakku Kwanangu. Kanang wuwule ki̱ni kwa̱l a tabati̱ kutai sinariyai a ri ki̱ni ki̱nung ki̱ki fi̱rfi̱ra̱ng, ka nang chikiye twa̱ba̱ku ni̱bu Kwamam. 9N chi ki̱kau te wu fwiye ko,
“N lwe mwang da̱u takida daalke
n lwe mwang wudu kale di̱kwane
di̱ne a no chi̱ne,
n ta̱n ni̱bu Kwamamu we ka nang ki̱ki̱le ki̱kuwange
n ti ka nang wuwule yiiye,
n ti ka nang wuwule kuuti ye
n ti ka nang bi̱bi̱le ni̱be ki̱ni ki̱tuum mum.
10M muni̱n yo chi a kau yaa fansetiye a nang sii Kwama
n chi ka ma mati̱n ti̱ti̱nitu.”
11Yinu n da̱ng, n ki̱la nwe di̱kan ker di̱da nabwe tuule ni̱bu ti̱tumbi̱ri Kwamam, kuniritu a ne kiku we, n chi a di̱bi̱l ki̱di̱ng mati̱nangu n ti bi̱kuri̱m bi̱bi baanamu n ti seli̱bu bi̱bu. 12A kau teniyu ki̱ni ker di̱dun ko,
“Kwang di̱du ni̱bu a chi̱bi̱nu a lwe,
ka yiu dukan Kwaman n ti kulitu
n ti kasantu n ti dukanu
n ti ri̱kaki̱ku n ti dwiyentu n ti delaku!”
13Yinu n nwe ka nang wuwule wukure we twiye n ti ti̱mu n ti mure ni̱r di̱ti̱ne n ti mweti yiduyu n ti kwali̱n chitu we fanti kwang ki̱kau teniyu ko,
“Ni ki̱n delaku n ti dwiyentu n ti dukanu,
n ki̱n wu a swe we ki̱di̱ng mati̱nange
n ti Kwanu ki̱diya kwadu!”
14Bi̱kuri̱m bi̱bi baanamu a yi ko, “Amin,” yinu seli̱bu a sung we ti̱mu a sii ki̱n.
Currently Selected:
Dwakam 5: Tula
Highlight
Copy
Compare
Share
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
