Dwakam 4
4
Siiku a bwadi
1A kuteng ki̱ku, n kuti̱ ti̱kan chi ti̱tu yaka fwedi, n ku kwa̱r a wuden we bwadi. Di̱kan ker di̱du ki̱chiredu yinang sumi̱n, di̱du mang wi man nwe ki̱fwamidu ko, “Fi̱le fi, mang yungi̱n chitu yaka fwedu a kuteng ki̱kitu.” 2Bi̱nabi̱na, m mi̱na Fi̱ki̱m Kwamam, n ku we bwa diye kaang ki̱di̱ng we ki̱ni wuka nii a swe we.
3Wu a swe we fiko ki̱yiladu yinang makka wu ni̱bu ki̱yalu ko chasfa n ti karneliya. Ki̱di̱ng kangu a kanani ki̱ni ki̱yang ki̱ku ki̱yiladu yinang kale ni̱bu ki̱yalu ko sumurdu. 4We ki̱di̱ng mati̱nangu, ti̱kan ti̱di̱ngri mati̱ni we wan turau chiri yana, ka nang ki̱kli̱le ki̱di̱nge we ti̱di̱ngri ti̱tu, seli̱bu nangam wan turau chiri baana a swe we ki̱ni kuli̱niti tweng n kawure ki̱ni di̱ki̱ri̱n si̱nariyan. 5We ki̱di̱ng mati̱nang ki̱ku, ki̱yileti ki̱chireduwe n ti ki̱yale, fiti̱lati yidibiin ki̱taddu. Bi̱bu nang Fi̱ki̱m Kwamami bi̱dibiin bi̱bu ki̱ma Kwama mi̱n nanganmu.
6Ti̱nti̱ne we kakku ki̱di̱ng mati̱nangu bi̱kuri̱m we ki̱ni kwalangi kakku n ti kuten, ti̱kan chi we ti̱tu yinang far di̱dun ki̱lasi̱n, ki̱yiladu yinang beti̱ kali yilli. 7We bi̱kuri̱m mu wukakke a yo bwiyu yinang turum, wurobe yinang betanka, wutare ko kabu yinang wu a niye, wunare yinang ki̱sung ki̱ku ki̱yada diyang. 8Kanang wuwule we bi̱kuri̱m bi̱bi baanamu, ki̱ni la̱biyi yurukun, bwiyu ki̱ni kwang ka nuyi a lanta mure labiye. Kum n ti kuko ki̱kau teni delaki ko,
“Wu wauwade, wu wauwade, wu wauwade,
Kwama Tewuduwe, naba dukane kwang
wu a dilewe, wu ki̱ka̱nge,
nanti̱ wu ka bede.”
9Fi̱ki̱m bi̱kuri̱m bi̱bi baanamu ki̱kau teni dwiyeni n ti yiyu a ri̱kaki n ti di̱wan a wu a swe a ki̱di̱ng mati̱nange, wu we feredi ki̱diya kwade. A kuteng ki̱ku, 10Seli̱bu nanganmu wan turau chiri baanamu a sung kukus we kakku wu a swe a ki̱di̱ng mati̱nange, a sii ki̱n wu ki̱ni ti̱kuri ki̱diya kwadite. N chi a fwal ti̱ki̱ri̱ni chitu we kakku ki̱di̱ng mati̱nagu ki̱kau tee ko,
11“N lwe Tewuduwe ni̱n n ti Kwama ni̱n!
mwang yiu dwiyentu, ri̱kaki̱ku n ti dukanu.
M mun nang wu mwang yo chiti kwange,
yinu a ki̱kemo, n chi kwang mun yo chi.”
Currently Selected:
Dwakam 4: Tula
Highlight
Copy
Compare
Share
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
