Dwakam 3
3
Di̱tumbi̱ru a yika Sardisi̱nu
1Mwal naba di̱tumbi̱ri Kwama wu a kan Kwamanu a ni̱bu Sardise mi̱n mwi:
Bi̱bu nang ya̱m nii wu ki̱ma mati̱n Fi̱ki̱m Kwamami bi̱dibiin bi̱bu ki̱ma Kwamam mi̱n nanganmu, wu a tau ki̱switiyi yidibiiniye.
N yim daamo. Mun yadu yinang wu a tau bunti̱ku yinange aya n yar we bunti̱ki̱ku! 2Kun we yare! Do ti̱tu a du we ni̱r a mwatan ka bwaditu. Di̱ne wa̱remo a tibebi deer we kakku Kwama miyangu. 3Di̱ne yiko, kuri ki̱ni chi mwang mwe mwang nwe, tabbi ki̱ri̱ng, wo ki̱ti̱m. Aya ka mwang kunbe, mang bedu bi̱nabi̱na a ne mwang yindu, yinang beku daaku.
4Aya bi̱kam we n chi bayim we Sardis bi̱bu a kaiyabu we bunti̱ki̱mu. N chi ka bungadu n ti mi̱n ki̱ni kuli̱ni mwe di̱ne n chi ki̱ni da ka madi yiko. 5N ki̱n wu a chau ki̱la, a ne lakadu n ti chi, ka do kuli̱ni mwe. A ne mang chi̱u di̱n ki̱nu we ti̱kuriye. Aya mang ni Temi di̱n ki̱nu n ti ni̱bu ti̱tumbi̱ri ki̱mu we dimwatake.
6Wu ki̱ni ki̱teliye a nwe chi Fi̱ki̱m Kwamamu ki̱fwa ni̱bu a kambi Kwamatu mi̱nde.
Di̱tumbi̱ru a yika Fi̱ladelfiyanu
7“Mwal naba di̱tumbi̱ri Kwama wu a kan Kwamanu a ni̱bu Fi̱ladelfiya mi̱n mwi:
“Bi̱bu nang ti̱kwa̱li yii kitu n ki̱n Kwama n ti wu ki̱fwa bi̱yili̱me, wu a tau mangsoli Fa̱ku Dauda. Chi n ki̱n a wude, a ne wu ka yingede we. Chi n ki̱n a yingene a ne wu ka wudude we. 8N yim nangi̱n mwiti kwang. N yim mun n ne dukan we. m Bunti̱ ti̱kwa̱li yii mitu, mwang ki̱labu kuteng. N wudu mi̱n kwa̱ru we kakku mwangu di̱du a ne ni ka yingede wenu.
9“Mang ya bi̱bu ki̱bunti̱ kan muraki̱ Setan mu, bi̱bu ki̱mwe ti̱kwanimu, bi̱bu ko n chi ni̱bu Yafudam aya n ke ki̱ni̱mu ka bedu ka sung ti̱nu a nani mwi. N chi kwang ka yindu ko m mi̱la mun. 10Di̱ne mwang tau ki̱kure mi wu mang ya̱n mi mu ni̱ri kwinge. Ti̱nti̱ne a ne mang dudu chi ka twaiyinu we ki̱dang ki̱kume wu yaka bedu we ti̱ti̱niti kwange ke a swa̱ka̱ bi̱bu we ti̱ti̱nimu. 11A ne tike, mang bedu. Tau chi muni ki̱n a ni̱re ke ni a yiti̱nu di̱ki̱ri̱n mati̱ni̱n munu we. 12Bi̱bu ka chau ki̱lamu, ka kau chi ki̱ni we Kan Kwama di̱dun Teminu. Nii wu a ne dumi̱n fiko we. Mang mwal ki̱mi̱n di̱n Kwama mi̱nu n ti bi̱n di̱dun Kwama mi̱nu, Wurchalima wufwiye, wu ka suwe ti̱mu, ki̱bedu a bwa di̱Kwama. Ti̱nti̱ne mang mwal ki̱mi̱n di̱n di̱fwin mi̱nu.
13“Wu ki̱ni ki̱teliye a nwe chi Fi̱ki̱m Kwamamu ki̱fwa ni̱bu a kambi Kwamatu mi̱nde.
Di̱tumbi̱ru a yika Laudukiyanu
14“Mwal naba di̱tumbi̱ri Kwama wu a Lawudukiya mi̱n mwi:
“Bi̱bu nang ya̱mu a chire a wu ni̱bu ki̱yalu ko Amin ne, n ki̱n wu ni̱ri diin ki̱ni bi̱yili̱me, wu ki̱ma mati̱n chi ki̱ni ti̱kuriye kwange. 15N yim nangi̱n mwitu, mun n ke nii ki̱ma kwa̱mbi̱re mwe n keti̱ wu a mabu kwa̱mbi̱re mwe, no n ke mwang kadi wiin, ka wukange.
16“Aya yo mwang yimbu fi mun we mi̱ne, mun n ke nii ki̱ma kwa̱mbi̱re mwe n keti̱ wu a mabu kwa̱mbi̱re mwe, mi̱n yadu mang ti̱bi̱nu a bwa. 17Mun ri̱kadu mwi m mun ya, mwi muni ki̱ni kuli̱n, a ne chi mun badditu we. Aya mwang yimbu mwi m mun fula wu kuse, chi ki̱bunei, m mun bune, m mun ki̱du, m muni twatwad.
18“Di̱ne yiko, mang fwa mi̱nu, ta̱n si̱nariya a di̱mi̱ne, wu a ya swa̱ku a ki̱range, ke n ya kuli ti̱tu a ni̱ritu ke n yati̱ kuli̱n di̱di mwe mwang dodu mwang swen dibwi bwi mwiye wu twatwadu. Ta̱n yinangu we di̱mi̱ne ke n fwal we nuyu n kudi. 19Mi̱n kwabi̱du, mi̱n wela bi̱bu mang mi̱lani̱mu. Di̱ne yiko, mwang funti̱bwi, mwang wo ki̱ti̱m.
20“Da̱ng! N ti a fi we kwa̱ru mi̱n yal chi. Ka n nwe di̱yal mi̱nu n wudi̱mi kwa̱re, mang le ni̱r munu, ni kera chitu ware yinang fati̱bu. 21N ki̱n wu ka chau ki̱la, mang ni ki̱n da ka swedu n ti mi̱n we ki̱di̱ng mati̱nangu, a ne lakadu yinang mang chau ki̱la mang swe ware n ti Temi we ki̱di̱ng mati̱nangu.
22“Wu ki̱ni ki̱teliye a nwe chi Fi̱ki̱m Kwamamu ki̱fwa ni̱bu a kambi Kwamatu mi̱nde.”
Currently Selected:
Dwakam 3: Tula
Highlight
Copy
Compare
Share
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
