Dwakam 18
18
Yare nabwe bi̱n Babilane
1A kuteng ki̱ku n ku wuka naba di̱tumbi̱ri Kwama ki̱suwedu we bwa diye ki̱ni nabwe dukane, ti̱nti̱ne dwiyen kitu a yii ti̱ti̱niti kwangi wa̱liwa̱li. 2A fwa ya̱mu ki̱ni dukan ko,
“A yar, Babila bi̱n di̱dunu a yar!
A kau lo wu a ki̱fi̱bti yibwilaye,
n ti kanang bi̱bi̱le ki̱duum ki̱ni̱bi yibwilai yiyu a lebi̱ da̱ngke.
3N ki̱n a yo kuu ti̱ti̱niye kwang a yar di̱ne dwadi ko wu a lebe.
Mati̱m bi̱bu a ti̱ti̱nimu a ma yaritu n ti ki̱n.
Ni̱bu ki̱feku kuli̱ni̱mu a kul we chi n ki̱n ki̱chidu di̱ne nwe ta̱me ko.”
4Yinu n nwe di̱kan ker a chire we bwa diye ki̱fwadu ko,
ti̱chir mi̱ne we di̱ki̱ne ni̱bu mi̱m,
ko ke ki̱leti kiyu a bwitadu chi̱n we,
ko ke ni̱bu a weladi̱ chi̱n we ware.
5Di̱ne swa̱n ki̱leti ki̱nu a bukan a lam twiye,
n Kwama a tabi̱bu ka wela ki̱nu.
6Ti̱ma ki̱mi̱n chi a lebitu yinangu n ki̱n a ma bi̱kamu mi̱nangu.
Ti̱ma ki̱yerangu ki̱da yurau we chi n ki̱n a maatu.
Ti̱ri ki̱mi̱n kwa̱se ki̱ni mwe yinabiye
wu dukan ki̱nu a la wu n ki̱n a niye ni̱be ki̱da yurau.
7Ni ki̱n riye n ti kaiyan ni̱re yinang nabwe dwiyentu n ti nwe ta̱me n ki̱n a ni dur ki̱ne.
We ni̱r ki̱nu n ki̱n a kuku duru ko,
M mi̱n Cheba mai naye, m mi̱n n ke nabune
A ne mang mang furi ki̱linu we ki̱diya kwadu.
8Di̱ne yiko, di wiin burang
n ti bwa, n ti furi ki̱lin ka lum ki̱nu.
ki̱rang be ka twi ki̱nu,
Di̱ne n Kwama wu a da̱ng yinangu ka wela ki̱nange n nang Tewuduwe kwang.
9Mati̱m ti̱ti̱nim bi̱bu a ma yari waremu, bi̱bu a nwe ta̱ma̱ng ware n ti ki̱ni̱mu, ka kira wiini ki̱ni kemi we dur ki̱nu yo n chi ka ku ywa̱n kirangi̱nu ki̱chiredu we fi ki̱twin ki̱ne. 10N chi ka tidu kutan di̱ne tayu ko ke chi leti̱nu ki̱rangu we n ti ki̱n kani̱n yidu ko,
A no mun! nabwe bi̱n Babilanu.
Wo, Babila, bi̱n dwiyeni̱nu!
Yaremo a be a awa wiin.
11We yiko, ni̱bu ki̱feki̱ chimu ka kirati̱ wiini ki̱ni furi ki̱lin di̱ne a ne ni ka ta̱n chimi̱n kuli̱ne we. 12Kuli̱nitu yinang
si̱nariya,
asurfa,
kali yi ki̱lbi̱ki̱lbi n ti yidoriyu kali,
kuli̱n di̱yili̱nu,
di̱di bungbungi̱nu,
fi̱bi̱n di̱di wusi̱ni̱nu n ti di̱di wuri̱nu,
kuli̱n n ti kanang wuwule ki̱dum katakome
n ti kuli̱n num nakami̱n
n ti kuli̱nu a swa̱swa̱be ti̱ti̱niye
n ti kuli̱n ka̱mbi̱r di̱ribi̱nu
n ti di̱kusi̱nu
n ti kuli̱n kaliyu ki̱yiladu yilaneni kwang.
13N ti kuli̱n;
sinamon
n ti kuli̱n kwekwen
n ti kuli̱n ki̱rangi̱n di̱di fi̱rfi̱ri̱n
n ti mur
n ti luban
n ti mwe yinabi
n ti ki̱nung
n ti miim alkamam
n ti ki̱nuti alkamam
n ti tanti̱kai
n ti kwanti
n ti siti
n ti keti̱kei kwerei
n ti ka̱bi kanang chikiye ti̱kuri ni̱bi.
14Ni̱bu ki̱feki̱ chimu ka yi ki̱nu ko,
“Nabwe ti̱kulan tiyilintu mwang yotu ni̱r we ka twiyadu,
ti̱nti̱ne kuli mwitu n ti kuli̱n leran mwinu a twiyan.
A ne mwang ya ti̱nu we ki̱da.”
15Ni̱bu ki̱feki̱ chimu, bi̱bu a ya kuli chitu we kuli̱n di̱du ki̱feku ki̱mi̱ndi̱nu, ka tidu kutan, di̱ne riye naye wu ki̱nwede a ya̱r chi yii. 16Kani̱n yidu ko,
“A no mun! Nabwe bi̱n Babila
a no ki̱do ka sa̱ni wu a fi̱bi̱n di̱di wusi̱ne
n ti luke wu ki̱ni di̱mwali wure
ki̱dosa bwi kiyu ki̱ni kuli̱n si̱nariyan,
n ti kali yiyili n ti kali yiyu ni̱bu a swa̱swa̱be.”
17A ki̱twalangi kiin, kuli chiti kwang a twiyan.
“Ki̱ni bi̱bu ki̱si kwa̱mbi̱re mwemu n ti bi̱bi kwadu ki̱ya chidu we fikomu,
n ti bi̱bu ki̱ya chabtu chitu we mwemu lamu, ka tidu kutan.”
18Yo n chi ka ku ywa̱n ki̱ran di̱du ki̱twi Babilanu ki̱chiri wulakwulake, n chi ka yidu ko, “Nang di̱di̱le bi̱nu a no lam di̱ki̱nu?” 19N chi a fwal kur ki̱ti̱n di̱du a furi ki̱lin we bwi chiyu, ki̱kirati̱ wiini ki̱bwa̱kati̱ kemiyu ki̱ni furi ki̱lin ko,
“A no mun! Bi̱n di̱dun,
Bwa ni̱bu kwa̱mbi̱re mweti kwang
ki̱mang kuli di̱ne nabwe kuli̱n ki̱ne.
A awa wiin, kuli̱n di̱di kwang a twiyan.”
20Ti̱ma furi mwen, n ti̱n bi̱bu a twiyemu!
Ti̱ma furi mwen,
ni̱bu Kwamam n ti fandubi̱bu n ti fa̱kubu.
N Kwama a ma ki̱mi̱n yinangu n ki̱n a ma chimi̱nangu.
21Yinu wuka naba di̱tumbi̱ri Kwama a da̱u nabwe ti kale yinang ner a mar we nabwe ti laa, ki̱yidu ko.
“Nang ki̱swi ni̱bu ka mang Babila ki̱ni dukanu nabwenabwen,
ka twiyadu ki̱diya.”
22A ne ti̱kan kwa̱ri̱n ngaki we,
kono bi̱bu ki̱kaba tenim, ka bi̱bu ki̱kura chime,
ka bi̱bu ki̱ku sumimu we di̱mune.
A ne wuka nii we wu ka feku chi a di̱mune.
A ne di̱kan diir di̱du a kwaku chiyan we.
23A ne ni ku ti̱n wuka fiti̱la wa di̱mune we.
A ne di̱kan ker bwele ki̱yiu naye,
ka fwa̱n di̱du ki̱ naden we di̱mune.
Di̱ne yo ferediye, ni̱bu di̱bem mumu,
nang bi̱bu ki̱ma mati̱n we ti̱ti̱ni kwangi̱mu,
kuuti kwang a ki̱tan di̱ne yimarichi mwiyu.
24Ki̱tuum fa̱kubu Kwamamu n ti ni̱bu Kwamamu n we bi̱n Babilanu.
n ti bi̱bu ni̱bu a chiben we ti̱ti̱nimi kwangi̱mu.
Currently Selected:
Dwakam 18: Tula
Highlight
Copy
Compare
Share
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
