Dwakam 17

Naye n ti neti Soo wuduwe

1Wuka we ni̱bu ti̱tumbi̱ri Kwamami bi̱dibini̱mu ki̱ni kutai ki̱fwini Kwamayi yidibiniyu a be fi a di̱mi̱ne ko, “M be, mang yungi̱nu yinangu mang madu ki̱ni naye wu ki̱ma ti̱kuliyengu. Wu ki̱sweda fanti mweti nabweniyu.#17:1 Babila. 2Mati̱m bi̱bu a ti̱ti̱nimu a ma yaritu n ti ki̱n. A yo ku ti̱ti̱niye ki̱tosadu ki̱ni mwe yinabi wu a yarikiye.”

3Yinu naba di̱tumbi̱re Kwama a dai a Fi̱ki̱m a yika di̱chilachangi̱n. We bwako, n ku naye a swe a nam di̱kire wu wure, wu ki̱ni duti̱ti ti̱dibiin n ti ki̱sumiyi kube. A bwal bwikiyu ki̱ni di̱mbiti kwebekwebe ti̱tu a swa̱ba ku we dur Kwamanu. 4Naye wu a do kuli̱ni bungbungi̱n n ti di̱di wurwuri̱n. Ki̱yiladu yinang si̱nariya n ti kali yiyu a lelei n ti chi ki̱lbuki̱lbe. N ki̱n a tau kwa̱se wu a si̱nariya we fa̱la̱ngu, kanang chikiye ki̱yung ya̱mi yibwilai n ti dutu ti̱tu a yari kitu.

5We tikabe ko a mwal di̱n di̱lairi̱mwu a ne nii ka kide we, “Babila wuduwe, ne ti̱baniye kwang, ne wu a chi ti̱bwilaiye we ti̱ti̱nitu.” 6N ku naye wu a ri fur ki̱nu ki̱ni ki̱tuum ni̱bu Kwamam, kanang chikiye, ki̱tuum ni̱bu Kwamam bi̱bu a mibani bobu ki̱mwa di̱n Yesuni̱mu.

Kangu mang ku ki̱nangu a yari yii yinang yinang. 7Yinu naba di̱tumbi̱ri Kwama a bi̱u mi̱n ko, “A mayire mun ya̱r yiiye? Mang fwami̱n ya̱m bi̱lairi̱m naye wu mu n ti bi̱bu a nam di̱kiremu wu n ki̱n a fi̱l ki̱ni dututi ti̱dibiin n ti ki̱sumiyi kube.” 8Nam di̱kire mwang kuwe, a no wukure, aya a newe ki̱ni ti̱kuri ki̱ka̱ngu. N ki̱n ka chiredu a bwang ki̱swa̱ma̱ng, ka yika bwanu n ki̱n ka twiyande. Aya ni̱bu ki̱bunti̱ da ti̱ti̱ni ti̱ti̱mu, bi̱bu ni̱bu a no a mwalbu di̱nbi chitu we taki̱da ti̱kuriye a yo no a tibu yo ti̱ti̱niye, ka ya̱r yii yo ka ku nam di̱kire wu a no bwa a chirtewe.

9Ti̱tu ki̱bau kasn n ti ti̱kuran ti̱yili ti̱dui. Dututi ti̱dibinitu, yinang beti̱ kuni yi̱di̱bi̱n yiyu naye wu ki̱mang mati̱niyu. Ki̱yung mati̱m mi bi̱dibiin. 10Ti̱nti̱ne, dutu ti̱ti ti̱dibinitu yinang mati̱m bi̱bi bi̱dibiini̱m, bi̱bi bunu we bi̱bi bi̱dibiini̱m a bwarani̱mu, wuka n we ki̱ma mati̱ntu, wuka a bebu didiin. Ka a benge, a mwintuwe ka ma mati̱n kitu a ne tike.

11Nam di̱kire wu a no ki̱ni ti̱kuriye ki̱ka̱ngu a ne ti̱kuri we, nang wu nari̱be, aya a chire we yi yidibiniyu, ti̱nti̱ne a tau wa̱re ki̱yika bwa ka twiyande. 12Ki̱sumiyu mwang ku kubiyu, yinang mati̱m mi kubu, bi̱bu a tibu mwe mati̱ni̱mu. Aya n chi beka yiu mati̱ntu ka madu a awa win n ti nam di̱kire wu.

13N chi ki̱ni kwang ti̱kuran chitu kanodu a fiwiine, ka kedu ka ni nam di̱kire wu dukan n ti mati̱n chi̱ntu. 14N chi ka ma kunnu n ti Be Kwane, aya Be Kwane ka chau ki̱la di̱ne n ki̱n Tewuduwe wu a Tewuduwe n ti Mai wu a mati̱me. N ki̱n kanodu n ti bi̱yali̱li̱mu n ti bi̱suti̱ri̱mu n ti bi̱bu ki̱bunti̱ ki̱nu ki̱ni ni̱ri dini̱mu.

15Yinu naba di̱tumbi̱re a ya̱i ko, “Mwetiyu mwang kuyu, n nang fanti sweri di̱baniyu we ka nang bi̱bi̱le ni̱bi n ti muraku ni̱bang n ti kuuti n ti kanang wuwule yiiye. 16Nam di̱kire wu n ti ki̱sumiyi kubu mwang kuyu ka ko di̱bannu. N chi ka wur ki̱nu, ka wo kuli̱nu ka du ki̱ni twatwadu. N chi ka wu nam ko, ka twidu a ki̱rang.

17“Mati̱mi kubumu ka madi ying di̱ne n Kwama a yo chi a kur chi n ki̱n ki̱baddu n chi ka made. Di̱ne yiko n chi ka kekadu ka ni nam di̱kire wu dukan mati̱ni̱nu. N chi kani̱n ma nam di̱kire wumi̱n kwa̱mbi̱r ka lami̱nti̱ yo ya̱m Kwamamu ka ride. 18Naye mwang kuwe ki̱yung bi̱n di̱dunu ka ma mati̱n mati̱m ti̱ti̱nimu.”

Currently Selected:

Dwakam 17: Tula

Highlight

Copy

Compare