Yakubu 5

Ki̱kure a naba kuli

1Ki̱kangu ti̱nwe n ti̱n kuli̱mu! Ti̱ki wii ki̱ni keme di̱ne riye ki̱be chimi̱nedu a kake. 2Kuli chi̱ntu ka fwidu, rwa̱ti ka wu ki̱yili̱n kuli̱n chi̱nu. 3Si̱nariya chi̱n n ti Asurfa chi̱n ka ma sa̱ngre. N Kwama ka ku Sa̱ngre wu, nang chi ka mwata chi̱n mi̱n ti̱ni ki̱ne, wu ka twi chi̱nu yinang ki̱rang. N ti̱n ti̱ mur yichiyu mi̱n kulitu we diti yiyu, a kau diti swan kuteye. 4Nangki̱n, sure ta dang ni̱bu nanganmu a kuuni chiyimu di̱ne ke ti̱sul chi̱nu, wii chi a lam kakku Tewuduwe Kwama chire. We yiko ti̱n, ti̱ful bi̱bu ki̱chaku chimi̱n kuli̱n kuunu, ta febu chi. Wii chi a lam kakku Kwama Tewuduwe Kwange. 5Ti̱ma fiswe nwe ta̱ma̱ng ti̱ti̱nitangu, yinu ti̱ma chi ta kudiye, ki̱ka̱ngu ni̱tu chinti a fwiyeni mwe ki̱ni nwe ta̱me ti̱ti̱niye, aya ta yimbu tiko dimwatake a mwatawenge. 6Ti̱yo ni̱bu mi̱n mwataki̱ku ke ti̱chibe ni̱bu Kwamam, aya n chi a katabu n ti chi̱n.

Ti̱ma nangangu ki̱ni bwanu n ti twa̱ba̱ku

7Di̱ne yiko kebu mi̱m, ti̱swe ki̱ni bwanu ka lami̱nti̱ yo n Tewuduwe ka bede. Ti̱da̱ng ki̱dum bwanumu naba kuwe ki̱madu ki̱ lami̱nti̱ yo chabti̱tu a biye. We nabwe bwanuwe, ki̱yam mwe wu ka fin chame n ti wu ka tali̱nde. 8N ti̱n ti̱n ti̱mu ni̱ru ti̱ti ki̱ri̱ng, di̱ne di ki̱lake Tewuduwe a mwatawe ki̱dwan. 9Ti̱du ti̱lurantu a dutu kebu chimitu, ke Tewuduwe chire a mwata chimi̱nu we. Da̱ng naba mwatake a mwatawe ki̱dwan, a ti̱ya kwa̱r. 10Kebu mi̱m, ti̱kur fa̱kubu Kwama feredimu bu a fwa ya̱m ki̱ni di̱n Tewuduwe, yinu n chi a nwe riye, aya n chi a mu ni̱ru a ti ti̱ni ki̱ri̱ng. Ki̱bunti̱n wa̱ri chiyu ki̱miyadu tiyangu ka ru ni̱ru we riyengu. 11Kangu ta yim ni̱bu ti̱yim ti̱ kuradu tiko ki̱ni ki̱siyange nang ni̱bu a mu ni̱rumu. A ta tu ta yim yinangu we muku ni̱ran Ayuba, yinu ta ku yinangu n Tewuduwe a yo kuten kangu a lengu. Bi̱yili̱m n Tewuduwe chire ki̱ni ni̱r ki̱bunen nabwen we ni̱bu ki̱mu.

12Kebu mi̱m chi a la chiye we ti̱tu kwangentu we chitu mang fwa, ti̱twandu chi we ko “Bayim ka ti̱bwa̱u ya̱me, ti̱twandu chi we ki̱ni dii, ka ti̱me, ka a ti̱kan chiye. Ya̱m chimu a subu ‘ngo’ ka ‘ngango’ ke ti̱yaruwe mwataki̱ Kwamangu.”

Dukan twa̱ba̱ki̱nu

13Kano wuka nii we tibe chi̱n wu ki̱nwe riya? A twa̱ba̱ buni a di̱Kwama ke a maka ki̱n. Wukane nii we ki̱ni furi mwemwen na? A kaba teni ke ki̱dela Kwama. 14Wukane nii we wu a bubuwa? A yale seli̱bu ni̱bu bunti̱ki̱mu a twa̱ba̱ ki̱mi̱n buni a wa nii wu a bubuwe mi̱n ki̱nungu a di̱n Tewuduwe. 15Duum twa̱ba̱ki̱mu ki̱ni keku bi̱yili̱mangi̱mu ka be naba burange. N Tewuduwe ka beti̱ ki̱nu, ka ya ki̱ni ki̱lenge n Tewududuwe ka du ki̱mi̱n ti̱n ki̱letiyu.

16Di̱ne yiko, ti̱nang fwa yichiyu mi̱n ki̱leti chiyu, ti̱nang twa̱ba̱ dutu chi̱ntu mi̱nu ke ti̱ya beki̱ku. Twa̱ba̱ku naba yilengu ki̱ni dukan ki̱ma nangangu yinang yinang. 17Ti̱da̱ng Yiliya ni yinang chi̱ni, a ki̱twa̱ba̱ bunitu ki̱ni ni̱r ki̱ni di̱n ko a swidu mwe we, a mwintuwe a swibu mwe swa̱ti̱ti ti̱ta ki̱ni di̱mwatar. 18A kuteng ki̱ku a ki̱la twa̱ba̱ bunitu, mwe twiye a swiye we twiye, chabti̱tu a ki we ti̱mu.

19Kebu mi̱m, ka wuka chi̱n a chir we wa̱re wuyile Kwama, yinu ni̱bu a ki̱lawe ki̱ni ki̱n a wa̱re, 20niwu a ki̱la ki̱ni ki̱n we wa̱re a yim ko, niwu a ki̱langi ki̱ni naba ki̱le a yu ki̱n we bwa. Yinu a yo n Kwama a da̱ng ti̱bu ne bwila n ki̱n a mange.

Currently Selected:

Yakubu 5: Tula

Highlight

Copy

Compare