Yakubu 3

Naba bunti̱ke n ti ben ki̱nu

1Kebu mi̱m ni̱bu bunti̱ki̱m, nabwen we ti̱be chi̱n a kadu bi̱bu ki̱ miya chim we, di̱ne ti̱yim tiko n chi̱ni bi̱bu ni ma miyaki̱mu n Kwama ka sii ti̱n ni̱r we mwataku chirengu. 2Ki̱kumang n chi̱ni ki̱ni kwang ni ledu nabwen. Nangki̱n ka wuka ni a twa̱nbu we chitu n ki̱n ki̱fwadite, a no ni kau ni̱bu bi̱bi di̱mbi̱li̱m, wu ka medu ka tau bwiki kwange. 3Yo ni̱n di̱ku kwere mi̱n ki̱mi̱ti̱ti̱li we yii ke a bunti̱n chi ni badde, ni mul kwere ki̱ya bwanu ni badde.

4Ti̱nti̱n ni swedu ki̱ni ne kwa̱mbi̱ri we ne la wuduwe, kasi ki̱ku a dwiyenangu, ki̱fi̱be wuduwe ki̱tungdu ki̱yikadi ki̱n, ki̱ni yiko, ni ki̱side, ki̱ma nangangu ki̱ni ki̱twalang#3:4 Nibu a da a kwati̱na mweti yiduimu ki̱sii kwa̱mbi̱re mwe ki̱ni ki̱twalang ki̱ku a do kan balangi lati̱bangang. ki̱sidu ki̱yika bwa a kudiye. 5A fi wiine benu wuka fi bayim we bwi ni, a ya ki̱ni kuki̱ku durangu nabwen. Ti̱da̱ng nabwen di̱kiru bambi̱li̱mbambi̱li̱me aya ki̱rangu bayim ki̱twi ki̱nu. 6Ben ni̱nu yinang ki̱rangi nga̱lngalang. A ri ki̱ni kana nabwe muli̱n di̱kwanang. Nang benu we bwi chi̱renu yinu ki̱kai bwi ki̱ni kwang. Ti̱nti̱n ki̱yo bwi chire kwang ka twidu a ki̱rang ke a kai ti̱kuri chi̱rentu a mwetuwe di bi̱be a lanta di bwa, yinu ki̱rangu ki̱bedu a di̱Setane ki̱twi ti̱nu.

7Ni ki̱medu ki̱la dukan naiyinu, wu n ki̱n ki̱ma mati̱n kitu ferediye kasi no nang nai di̱kiriyu n ti ki̱ni̱btiyu n ti naiyu ki̱kwa̱kada ti̱me n ti nai mwei. 8Aya a ne nii a me a tau ben ki̱ne we. Ti̱nti̱ne chi ti̱kwani̱n a kebu a tabu dur ki̱nu, a ri ki̱ni yinang ki̱kwanangu nabwen wu ki̱wuwe bwa.

9Nang chi ni dela ti̱ Kwama wu n ki̱n nang Te chire, nangti̱ chi ni turan ni̱bu n Kwama a mub yinang ki̱ni̱mu. 10Ni dela Kwama ki̱ni yii, ni turati̱ ni̱bu ki̱ni yii. Wule kebu, a dakabu a no ka kaddi ying. 11Kanodu mwe wu a li̱mbe n ti wu a li̱me we chiredu we fi wiina? 12Kebu mi̱m, tiyang yinab we tu ti̱kulan setunita? Ka tiyang yinabi ka tu ti̱kulan tiyang sinangu ta? A fi wiine, bwiru ki̱ni mwe bumenu a ne bwi mwe wu a li̱mli̱me.

Kasan ti̱yilitu ki̱chiredu a di̱Kwama

13Wuka we tibe chi̱n wu ki̱ni kasan wu ki̱ni ti̱kuran we kangu n Kwama ki̱badu ni ma fi swenga? Ya yayu wu a lele yinange, ke a yung da̱ wuyile ko we si̱ki̱ku durang kangu yinangu n Kwama ki̱badu ni ma fi swengu, yinu mwang kau naba kasane. 14Aya ka we ni̱r munu, n ri ki̱ni kubeku ki̱kusang n ti ki̱fwini n ti mi̱laku dur munange, wureni a yo ki̱kangu mun ngau kwiye mun mweti̱n ti̱kwanitu muko n muni ki̱ni kasane?

15Ki̱dum kasani̱n bi̱bu n ke bi̱bu ki̱suwedu a di̱Kwamam, ti̱tu ki̱chiredu a ti̱ti̱ni n ke ta fi̱ki̱m Kwamame, aya ti̱tu n ti̱u ki̱fi̱be wubwila. 16Nangki̱n, ka nang wuwule fiye wu ni̱bu ki̱ni kubeku n ti bi̱bu ki̱bau ka dur chinmu, a ne duum mweki̱ni̱mu n ti ka bi̱bi̱le dum da wubwila ne mwang yadu we fikomu we.

17Aya ni̱bu bi̱bu ki̱ni kasan ti̱tu ki̱chiredu a di̱Kwamatu, a kabi kwangi wa̱la̱k, ti̱nti̱ne ki̱bedu ki̱ni li̱mang we ni̱bu, ki̱ni bubbuke ni̱re, yo ki̱ma chite ki̱kurti̱nu ko bi̱kam ni̱bu we, a ri ki̱ni ki̱bune n ti nangi̱n chitu ka ti̱yili kwang, a yungbu lakaku, a kerabu ti̱kuran chitu ti̱nti yurab yinu n chi a buti̱bu ni̱bu. 18Ni̱bu ki̱bau li̱mangu a swedu we ni̱bu yinang naba kuuwe wu a fi duum li̱mang a ti̱me, yinu ki̱kau chi ti̱yili we kakku Kwamangu.

Currently Selected:

Yakubu 3: Tula

Highlight

Copy

Compare