Yakubu 2

Ti̱welan a yungku lakakang

1Kebu mi̱m, we tiku changu a ni̱bu bunti̱ki̱mu we di̱Tewuduwe Yesu Masiya, wu ki̱ni duyene, ti̱da̱udu wuka ni a ladu wuka ni we. 2Ni da̱u ka wuka ni a be muraku changu ki̱ni kuli̱n di̱yili̱n n ti keni yiyili̱n yiu ki̱ni kwa̱ti̱re, yinu wuka di̱lusan niin a lewe ki̱ni kuli̱n a lebulenge. 3Ka ti̱ni niwu a do kuli̱n kwa̱ti̱re dwiyentu yinu a yi ki̱n ko, “Fiswe wuyile nang wu.” Aya ti̱yi di̱lusan nii wunu, “Ko titiye a bwa.” Ka ta yidu ko, “Swe a ti̱me.” 4Ka ti̱ma yiko ta yimbu tiko ti̱kera dutu chi̱ntu kerana, yinu ta mabu mwataku ki̱ni ti̱kuran ti̱bwilaiya?

5Ti̱nwe kebi̱mi̱m, n Kwama a sutubu ti̱lusani ni̱bitu bi̱bu a ne ki̱ni kuli̱n ti̱ti̱ni ke n chi a ke bi̱yili̱mu we Tewuduwe Yesu Masiya, di̱ne n chi nang ni̱bu a ya kuli̱m ti̱ti̱niya? N chi nang bi̱bu ka sweduwe ki̱di̱ng mati̱n Kwama wu n ki̱n a bwa̱u di̱ne bi̱bu a mi̱la ki̱ni̱ma? 6Aya n ti̱n ti̱swa̱ba ti̱lusanitu. Yoye bi̱bu ki̱ni ni̱bu riyemu n ke kuli̱ma? N chi n ke bi̱bu ki̱wu chi̱nu ki̱yikan kan kabaki̱n ki̱ni chini̱ma?

7N chi n ke bi̱bu ki̱fwa ya̱m swa̱ba ku we di̱n di̱yili̱n Yesunu wu nang Tewuduwe chi̱na?

8Ki̱kumang ka ti̱bunti̱n yilang Mai chi̱ren m Masiyange, wu ni yadu a ya̱m bi̱mwali̱li̱m Kwamamu a fwa ko, “Mi̱la kemo ta da ware ki̱dwan yinang dur mun.” Ka ti̱bunti̱n yilang ki̱ke ti̱madi der. 9Aya ka ti̱da̱u bi̱kamu a la bi̱kamu we kangu ti̱da̱ngi̱n chiyangu, ti̱ma ki̱le. We yili̱n Musatu n ti̱n ti̱kau ni̱bu bi̱bu a ki yilangu. 10Aya ni wu a bunti̱n yili̱ntu ki̱ni kwang yinu a kii wiine, a yung a kii yili̱ntu ki̱ni kwang. 11N Kwama kawu wiine wu a yi ko, “A ne mwan ma ti̱kuliye,” Nanti̱ wu a yiko, a ne mwan chi̱u niye. Di̱ne yiko, ka mwan mabu ti̱kulye aya n chi̱u wuka niye, a yung a fi wiine mun kii yilangu. 12Di̱ne yiko, kasi no mwang fwadu ko wule, ka mwang mati̱n ti̱ti̱le chiye, tabi̱du we mwi mwang ya kabaki̱ku ki̱ni yilang ki̱ku ki̱chaku niyangu. 13Di̱ne niwu a nwebu ki̱bune keko n Kwama a ne nweti̱n ki̱bune ko ti̱n, aya ka nii wu ki̱nwe ki̱bune ni̱be, a ne ka nwe tayi we mwa̱nta̱ku Kwamangu.

Keku bi̱yili̱m a ne nangang wengu ki̱kusang

14Kebu mi̱m, a le yi bwa̱le, ka n yi mwiko n muni ki̱ni keku bi̱yili̱mangu yinu mwan yungbu we nangite? Keku bi̱yili̱mangu n we yu wuka niya? 15Ka bi̱kam kebu ni̱bu bunti̱ki̱m kwarta ka wuwiye wu a kwala kuli̱n ka chabte, 16yinu n yi ki̱n mwiko. Ya li̱mang, suitu ka chune a ni̱nu riye we. Aya mwan nibu niwu ti̱kan chabtu ka kuli̱ne, ti̱tu a lengi bwa̱le?

17We fi wiine, keku bi̱yili̱mang a di̱Yesu Masiya n ki̱kun, ka a ne nangangu ka yungdu wenge a tu a bwa. 18We fi wuka ni ka medu ka kwilayu ka yidu ko, “Bi̱kamu ni̱bu ki̱ni kana keku bi̱yili̱mang, aya bi̱kamu ni̱bu ki̱ni kana nangi̱n ti̱yili, a kaya ti̱kan chiya?” Aya n ke ki̱mi̱n mi a bwa̱le keku bi̱yili̱mangu yo a ne nangang ki̱yileng we? Mang yungi̱n keku bi̱yili̱mangu we a nangi̱n ti̱yili mitu we di̱Kwama.

19N ke bi̱yili̱mu mwiko Kwama wiin. A le, ko no nang ki̱fi̱btiye yibwilaiyu a ke ti̱ni yiko, yinu ki̱mi̱ka ti̱ni bwi di̱ne taye. 20M mun di̱ru, ka mun baddu ki̱kangu mang fwa mi̱nu tiyangu keku bi̱yili̱mangu a ne nangang wengu ti̱kusiya?

21Mwan kurbu mwi n tuke chire n Yibrayim a kau naba yile we kakku Kwamangu we chi n ki̱n a mantu, yoko n ki̱n a tau bweko Yichaku a ni di̱ne nangang niku ki̱tuumang? 22Da̱ng! keku bi̱yili̱mangu n ti nangang ki̱yileng kangu ki̱yadu a fi wiine. Chi n ki̱n a mantu a yo keku bi̱yili̱mang kangu a kabbi di̱mbi̱ri̱m. 23We fi, a ri bi̱mwali̱li̱mu ya̱m Kwaman ko, n Yibrayim a ke bi̱yili̱mu we di̱Kwama, n Kwama a kii ki̱n a niwu yile di̱ne keku bi̱yili̱mang kangu. We yiko ni̱bu ki̱yalti̱n ki̱nu ko fate Kwama.

24Ti̱da̱ng, a yung ni kau ni̱bu yile n ti Kwamam di̱ne nangang ti̱yili chi̱retu n ke keku bi̱yili̱mangu ki̱kung. 25Ni swe bi̱bu ki̱ni Rahab di̱banu. N ki̱n a kau na yile we kakku Kwamangu di̱ne chi n ki̱n a mantu. Yo a lai ni̱bu a ya ki̱ dele ti̱me, n ki̱n a maka chi a swi a wuka wa̱re daan. 26Di̱ne yiko, yinangu bwiyu ka a ne fi̱ki̱m wenge a kau wu bware, yiko ti̱n, keku bi̱yili̱mangu we di̱Kwama a ne nangang wengu kwa̱me.

Currently Selected:

Yakubu 2: Tula

Highlight

Copy

Compare