Yakubu 1

Di̱siir Yakubu

1M mi̱n n Yakubu naba nanga Kwama n ti wu Yesu Masiya, mi̱n mwal ti̱fi̱ki̱ri ni̱bu bunti̱ki̱m Kwamami kub chiri turabitu a ti̱ran we ti̱ti̱niti kwang mi̱n lwangi̱n di̱du.

Keku bi̱yili̱mang n ti yinku

2Kebi̱mi̱m, yo sweki̱ku a ya chine, ti̱ma ne furi mwen. 3Di̱ne ti̱yim, yo swa̱ka̱ku changu ka ride ka ta ki̱tabu we keku bi̱yili̱mang chi̱nge, ka yo muku ni̱rang changu ka duyedu. 4Ti̱duba duyen, ta kau ni̱bi biin bi̱bi di̱mbi̱ri̱m bi̱bu a kwalabu chiim. 5Ka ni wu a kwala kasan we chitu n Kwama ki̱baddu ni madite, a bi̱u a di̱Kwama ke a miya ki̱mi̱n kasantu, n ki̱n ka ni̱n ti̱nu yi burtu. A ne kwabu wu ki̱ma di̱bi̱de. 6Aya yo ti̱ bi̱dde, ti̱yodu kamaki̱we keku bi̱yili̱m chingu a ka̱tadu chi we. Di̱ne wu ki̱kama chiye a tiwe laabi mwetu ki̱fi̱be mwe ki̱wiledi bwa ki̱tunti̱ni bwaantu. 7Duum ni̱bi̱m bi̱bu a yo ti̱nu ni̱r we ko chi ya ti̱kan chi̱n we di̱Tewuduwe. 8Niwu ti̱kuran ni̱r ki̱ni̱ntu a keran kerane, n ki̱n a tibu fiwiin we chitu n ki̱n ki̱maditi kwang.

Buni n ti kuli

9Kasi ki̱ku ni̱bu a swa̱ban nii ki̱bunti̱ Kwama, ke wuko a nang mi̱ladu ko n Kwama a ri̱ka ki̱n. 10Kasi ki̱ku ni̱bu ki̱kuradu ko naba kuli ki̱ni ki̱si̱i̱yange, a dakan n ki̱n ka yindu ko n Kwama a swa̱ba ki̱n. N fwa ying di̱ne n ki̱n ti kulikitu ka sudu yinang fili̱ntu a ne ni kuti̱nuwe. 11Yo Kuko a sii ti̱me, ki̱twi swa̱ki̱ki̱ ki̱ni chuwangu, n ti filin ti̱tu ki̱ bwadu ki̱twakati̱nu, yinu leran kitu ki̱twiyati̱nu a fi wiine ti kuli̱mu ka twiyadu ki̱ni chi n ki̱n ki̱muriti kwang.

Swaka̱ku

12N Kwama a dela ni̱bu a mu ni̱ru we swa̱ka̱ki̱mu, di̱ne yo n chi a chau ki̱la we sweki̱ke n chi ka ya ki̱ti̱me ki̱diya kwadi a di̱Kwama wu a bwa̱u ka ni bi̱bu a mi̱la ki̱ni̱mu. 13Ka sweku a be ni mi̱ne wu ka yo ki̱nu ka ma ki̱le, ni a yiduwe ko, “N Kwama a swe mi̱n.” Ti̱nti̱ne a ne ni ka swe Kwama ki̱ni bwila we, di̱ne n Kwama a swebu ni ki̱ni bwila. 14Aya ka wuwule niye ki̱ya Swa̱ka̱ki̱ku we yo ti̱kuran ti̱bwilai ki̱ntu a tau ki̱n a bututi̱ ki̱ne. 15Yinu kubeki̱ku ki̱bwilang kangu a duyene, ka swanadi ki̱le, yo ki̱le a kwa̱sane ki̱ swanadi bwa.

16Di̱ne yiko, kebu mi̱m bi̱bu mi̱n mi̱ladi̱mu ti̱ twa̱ndu wa̱re we. 17Ka nang ki̱ki̱le ki̱li̱mang ki̱yilangi di̱mbi̱li̱m ti̱me wuyile ni yadu a di̱Kwama Te wu a diye wu a yo ka nang ki̱ki̱le yiike wu diye. N ki̱n a sutebu a newe yinang yo ki̱wulang ni̱bang ki̱sutede yo ki̱yiye ki̱ ki̱re. 18We ki̱ ke ko, n ki̱n ki̱fwan a sutu ke a fwa ya̱m bi̱yili̱m ki̱mu a di̱ chiniye, ke a ni ni̱n da wufwiye bwesi̱m ki̱me yinangu a ni chi̱ni di̱kwa̱l di̱yili̱n ki̱ni̱nu. N chi̱ni we chitu n ki̱n a yoti̱ kwang ni kau bi̱suti̱ri̱m ki̱m bi̱kaki̱m.

Nwe ya̱m Kwamamu mati̱ nangangi ki̱n

19Kebu mi̱m ti̱twar ya̱m bi̱bu mang fwadi̱mu, ka nang wuwule niye a sii ki̱tele we ya̱mu ni̱bu ki̱fwadi̱mu, ti̱fadu ya̱mu we daatu, ti̱madu ki̱fwiniwengi daatu. 20Di̱ne ki̱fwini wu a niye a bebu ki̱ni da wu yile wu n Kwama ki̱badde. 21Di̱ne yiko ti̱ chakku kasi no wuwule dati yibwilai n ti muli̱nu n ti̱ni ki̱n we ni̱tu chi̱ntu. Ki̱ni bubbuke ni̱re, ti̱yiu di̱kwa̱l di̱du n Kwama a fi a ni̱tumu, di̱du ki̱ni dukwan ka yu ti̱kuri chinti̱nmu.

22Ka ki̱ki̱le ki̱dange yo di̱kwa̱l Kwamanu mwan nwenu ma nangangi ki̱n, a mwituwe ta ma chitu a fwatu, ti̱ nwedu di̱kwa̱lu we ka nweku, ka yiko ti̱bu ka dutu chi̱n. 23Di̱ne ka wuwule niye wu ki̱nwe di̱kwa̱l ya̱mi̱nu a bunti̱be a kau yinang ni a da̱ng ki̱wulang kabu kongu a mwe. 24A tiwe niwu a da̱ng kabu ko a mwe kuti̱n tiyangu n ki̱n wemi̱nangu yo a yikane a tabuti̱n yinangu n ki̱n we mi̱nangu. 25Aya ka ni a da̱ng daan we yilang Kwaman ki̱yilangu ki̱chakku niyange, ka ni a chakakku ki̱kura chi ki̱fwadite, a tabi̱bu chitu a nwetu, aya a na tundu yinu n Kwama ka yo ki̱mi̱n delaku di̱ne a ma yiko.

26Ka wuka ni a da̱u ko ki̱chi n Kwama ka nwe ta̱ma̱nge, aya mwang tabu ben mune, n ki̱n ki̱butu dur ki̱n ko ki̱fwa ti̱yili, ti̱kuran kitu ko ki̱ma chi ka li̱ma Kwama ni̱re kana ti̱kusi. 27Chitu n Kwama Techire ki̱badu ni̱bu ka made ke a li̱ma ki̱n ni̱re nang ki̱tu. Makaku bwesi̱m buni̱mu n ti nati̱m buni̱mu yo a le riye, yinu n ti woku bwiyang we a ti̱ti̱nitu.

Currently Selected:

Yakubu 1: Tula

Highlight

Copy

Compare