Yibraniyam 7

Fanse yinang Melkisedek

1M Melkisedek Mai wu a ti̱m Sali̱me n ti wuduwe Fanseti wu Kwama Tewuduwe. N ki̱n a tekan n ti Yibrayim, a yo ki̱mi̱n delaku yo a yaki̱ ki̱ladu we ki̱la n ki̱n a mawe a bi̱kam mati̱me. 2N Yibrayim a ni ki̱n ki̱ti̱me wiin we kube, we chi n ki̱n a beki̱n we kunnu a chane. Di̱n Melkisedeki̱nu a yung n ki̱n, “Mai wu ki̱ mwata ya̱m bi̱yili̱me. N ki̱n ti̱n Mai wu a li̱mange di̱ne Sali̱me ki̱yung li̱mang.” 3Aya n Melkisedek a newe ki̱ni ne, a netuwe ki̱ni te ka fi n ki̱n a fumi̱ne. A ne di bi̱bbe ko we ka di bwange, aya n ki̱n yinang Bwe Kwama, n ki̱n fanse ki̱diya kwadu.

4Ti̱da̱ng dwiyen Melkisedekitu, kono nang Yibrayim, tuke tukebu chi̱reme a yim dwiyen kitu we yo n ki̱n a ni ti̱ni wu wiine we kube we kuli̱nu n ki̱n a yuwe a kuni̱nu. 5Aya we yilangu, ki̱kuwang lawi̱yawangu n nang fansetiyu bi̱bu ki̱yiu wu wiine a di a kube we ni̱bu mu, ka nang chikiye we kebu ki̱mu, kasi ki̱ku n chi wetuwe ki̱kuwang Yibrayim mangu. 6Aya m Melkisedek wu fi a fumi̱ne a lakan n ti chiye, a yiu wu wiin a di a kube we di̱Yibrayime. Yinu a yo Yibrayim mi̱n delaku n ki̱n wu a yiu bwa̱ki̱ke.

7A ne kamakuwe, wu ki̱yo delake a la wu ki̱yiu delaku ki̱ni dwiyentu. 8We ya̱m fansetimu a ki̱kuwang lawimu, kasi ki̱ku n chi ki̱bwadubwangu, ki̱yiu wu wiin a di a kube we fa̱li ni̱biyu, aya m Melkisedek, wu a yiu wu wiin a di a kube we fa̱la̱ng Yibrayimanage, ni̱bu a ma di̱mwaru ko wukure. 9Ni medu ni fwadu ko n lawi n ki̱fwan wu ki̱kuwang kangu ki̱yiu wu wiin a di a kube, a ni wuko ki̱swi a fa̱la̱ng Yibrayim. 10Ni medu ni fwadi yiko di̱ne ki̱dangu n Yibrayim a tekan n ti Melkisedek, aya ni̱bu a tibu bi̱u Lawi, n we bwi tuke ki̱niyu didiin.

Wuka fanse yinang Melkisedek a chire

11N Kwama a ni ni̱bu ki̱mu yilangu we ka ki̱swi wuko a ni ti̱n ti̱bokanitu fanseti kani̱n yaditu. Ka no nangang fansengu a ki̱kuwang Lawiyangu ka yo dukku ki̱letiyange a no ne chi ka yodu wuka fanse dang ka bede we. Wu ka bedu yinang Melkisedek, a buntebi̱ ti̱bokani Aruna. 12Di̱ne ka ti̱bokanitu a sutene, a mwintuwe yilangu ka sute ti̱nu. 13N ki̱n wu ni̱bu ki̱fwa ya̱m a dur ki̱ne, ka nang chikiye, Tewuduwe chire, a chire a ki̱kang ki̱kuwang dang, a ne niwe ko wiin wu a ma nangan Fanseti we ki̱kuwang kange we.

14N Yesu a chire a ki̱kuwang Yafudangu, wu m Musa a fwa bu ya̱m we dur chi̱nu yo a yaki̱ fwa ya̱m fansetingu. 15Yinu chi nan fwange a chire fi̱langi kwa̱rikwa̱ri, ka wuka fanse yinang Melisedeke a benge. 16N ki̱n a kau fanse n ke ko a bunte kaang yilang ka di̱kan di̱bokane di̱du a ki̱kuwangi̱ne, aya a bunte dukan ti̱kuri ki̱diya kwadi̱nu. 17Nangki̱n ni̱bu a ma di̱mwaru we dur ki̱nu ko,

“M mun mwan kau wuduwe fanseti ki̱diya kwade,

wu yinang Melkisedeke.”

18Ki̱kumang ti̱bokanitu ni̱bu a no ki̱bunti̱nu fereditu a ki̱la ki̱ti̱ku di̱ne a ne dukan we ka ti̱kusi. 19Ki̱kumang yilang Musangu a mebu a dalbu ni yinangu Kwama ki̱badangu, ki̱ka̱ngu wu wa̱re yo ni̱re a be, wu nang wa̱re ni yadu ki̱dwan n ti Kwama.

20N Kwama a tituwe ya̱m bi̱bu ki̱ni di̱twa̱mbi̱r. Yikayu fanseti ki̱le nangang ki̱ku a ne di̱twa̱mbi̱r we. 21Aya Yesu a kau fanse ki̱ni di̱twa̱mbi̱r Kwamangu a fwa ko,

“Tewuduwe a twa̱n chi,

a ne sute ya̱m ki̱mu.

M mun mwan kau wuduwe fanseti ki̱diya kwade.”

22We bi̱bu ya̱m, n Yesu a yung ko bwa̱ki̱ ki̱fwiyangu a le a la ki̱ka̱ra̱ngu.

23Ki̱kangu duum fansetimu nabwen bi̱bu bwa a dang chi chakku kakkang ki̱ni nangangu. 24Ki̱kangu duum fansetimu nabwen bi̱bu bwa a dang chi chakku kakkang ki̱ni nangangu. 25Di̱ne yiko n ki̱n a lwe, diti ki̱da̱ng ka yu ka nang wuwule niye wu a ki̱bau Kwama a di̱n ki̱ne. N ki̱n wukure ki̱diya kwadu ki̱ twa̱ba̱du we kakku Kwamangu di̱ne chi̱ni ki̱diya kwadu.

26N ki̱n nang wuduwe fanse ni baddi̱mu, a ne ya̱m we dur ki̱nu, a ne der we bwikiyu. N ki̱n a newe ki̱kuwang ni̱bu ki̱letimu. Ni̱bu a ni ki̱n fi wuduwe wa dwiyene we bwa di̱Kwama. 27N ki̱n n ke wu ka ni̱n ma niku ki̱tuumang ditiyu ki̱da̱ng yinangu bi̱kamu wuduwe fansetiye yiduyu a no ki̱madangu. N chi ka a ma di̱ne dutu chitu ki̱da kiine, yinu ki̱madu di̱ne ni̱be. Aya n Yesu a ma wuko ki̱da kiin we bwa wu n ki̱n a ma a ki̱tiyang bwange. 28Ni̱bu a kau tikake Fanseti we yilang Musamu, a ki̱tan di̱ne ni ki̱ni ki̱taku. Aya a kutengu yilangu a chirengu, n Kwama a yo bwe ko ki̱ni di̱twa̱mbi̱r a ki̱ke Kwama ki̱diya kwade.

Currently Selected:

Yibraniyam 7: Tula

Highlight

Copy

Compare