Yibraniyam 8
8
N Yesu nang Fanse Wuduwe
1Di̱kwa̱l ya̱mi̱nu n di̱u. N chi̱ni ki̱ni tikake Fanseti, wu a swe a fi wuduwe wu mati̱n a kang ki̱yilang Kwamang. 2Fanse wuduwe wu ki̱ma nangang kangu a kan di̱du a murenu, di̱du a la chi ki̱ni wauwadenu. A finu Kwama siine we mi̱ne wu Tewuduwe n ki̱fwan a don ke nangang niyange.
3Ka nang wuwule fanse, nangang kangu ka ma niku n ti niku ki̱tuumang, a mwintuwe tikake Fanseti chire ka ma ti̱ni yiko. 4Ka n ki̱n a no we ti̱ti̱nite, a no ne ka kau fanse, di̱ne bi̱bu a ki̱kuwang fansetimu n we, bi̱bu ki̱bunti̱n ti̱bokani yili̱n musamu. 5Fansetiyu ki̱ma nangange kimadi chitu a kan di̱du a kabbi wauwadi̱n di̱ne a kau ki̱swerang we kasi sweki̱ku wu a diye. Nangki̱n, yo m Musa yaka ru kan muraki̱n di̱du a Kwamane, n Kwama a wu ki̱mi̱n ki̱tele ko, “Tabi̱du chi we, ma yinangu mwang ku mang yungi̱n we dii a kunangu.” 6Aya ki̱ka̱ngu n Yesu Fanse Wuduwe ki̱ni nangang ki̱duwang ki̱ku a la bi̱kamu fansetiyu a ma nangangu ki̱ni yili̱n Musamu. N ki̱n nang wu a tibe a ni chi̱ni da wu ni ya yayu wa bwa̱ki̱ n ti Kwama ka ni ma chi a dakane. 7Ka no bwa̱ki̱ ki̱kakkangu a ne der wenge, a no niyang babu kang.
8Aya yo n Kwama ki̱fwan a ya der we ni̱be, a fwa ko,
“Ki̱swi ki bedu,
yo mang chiredu ki̱ni bwa̱ki̱ ki̱fwiyangu
n ti ni̱bu Yisrelamu n ti bi̱bu a Yafudamu.
9Ki̱ku bwa̱ki̱ a ne kadu yinang ki̱ku
mang bwa̱u n ti tukebu chimangu,
yo mang ta chi a fa̱la̱nge
mang chaku chi we ti̱m Masar,
n chi a tibu we bwa̱ki̱ mangu yinanga dakanang.
Di̱ne yiko n sabi̱r kuteng n ni chi.
10“N Tewuduwe a fwa ko, Bwa̱ki̱ku mang madu dikongu,
n ti ni̱bu Yisrelamu nang kiku:
‘Mang yo chimi̱n yili̱ntu we ti̱kuran chitu,
di̱ne ke n chi a swaan.
Ti̱nti̱ne mang mwalu we ni̱tu chitu
ke n chi a nang bunti̱nu.
Mang kau Kwama chi,
n chi ka kau ni̱bu mi̱m.
11N chi a ne baddu ko chi
miya kebu chimu mi̱nu,
ka wuka ka yi keko ko,
yim Kwama.
Nangki̱n n chi kwang ka yim mi̱nu,
ka nang wuwule niye ka yim mi̱nu,
ka mwe ti̱nu we bi̱ti̱ri̱mu ka ka swan ti̱nu we bi̱duumu.
12Nangki̱n, mang du chimi̱n ki̱letiyu
a ne mang kur ti̱nu we ki̱dang.’ ”
13Yinangu n Kwama ki̱fwa ya̱mu ko bwa̱ki̱ ki̱fwiyangu, a yung ki̱ku a mwe mi̱nangu a ka̱ra̱ng. Chi a ka̱ra̱ka̱ra̱netu, a ri ki̱ni ying.
Currently Selected:
Yibraniyam 8: Tula
Highlight
Copy
Compare
Share
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
