Yibraniyam 6

1Di̱ne yiko, ni chakakku ki̱ni di̱mwar Kwamanu niyang mwe mi̱n nangangu we a dur Masiya Yesun we tile bi̱rkenu, ke ni kau ni̱bu a swan chi yinangi̱mu. A dakabu ni wite ya̱mu ko ni chirmi̱n a ki̱letimu we, bi̱bu a yung ni ti we keku bi̱yili̱mang chirengu a Kwamangu. 2A dakabu ta chakakku ki̱ni yikku di̱mwar we ya̱m nura ku batismamu n ti yoku kangangu n ti ya̱m kunku kwa̱miyangu n ti ya̱m mwataku ki̱diya kwadi̱mu. 3Di̱ne yiko ka Kwama a kenge, ni chakakku ki̱ni swaanki̱ku.

4Nangki̱n, bi̱bu a ki̱lani kuteng we keku bi̱yili̱mang chiyamu, ka ma bwar yinangu ni̱bu ka yo chi ka wo ki̱ti̱mangu. Ni̱bu bi̱bu a ku yiiku Kwamangu, yinu a ya yayu we ki̱li̱mang Kwamangu dangtidangti a yati̱ li̱mang chiyangu we Fi̱ki̱m Kwamamu. 5N chi a twai li̱mang ya̱m Kwamangu n ti dukan ki̱dangu ki̱bedangu. 6Ka n chi a ki̱la kutenge, ka ma bwar yinangu n chi ka ki̱ladu ka wo ki̱ti̱mangu, di̱ne n chi ki̱kukati̱n Bwe Kwama ki̱da, yinu ki̱mi ki̱nu ki̱niti̱n ki̱n dibwi.

7Ti̱mu ki̱ no mwe twiye ki̱yo swa̱ki̱ku n ti chabti̱tu ki̱ledu yinangi̱mu, n Kwama ki̱yo delaku we ti̱m bi̱ki̱mu. 8Aya ka ti̱mu ki̱ki kwa̱da n ti swa̱ku ki̱bwilange, ti̱m bi̱ki̱mu a lebu, a yung n Kwama a mwatan ka ma ki̱mi̱n yii, ka a kaiyane, ka le ki̱rang.

9Kebu mi̱m, kasi ki̱ku mi̱n fwa ki̱duum ya̱m bi̱bangu, n yim ti̱funti̱ bwi we nangi̱n chi̱ntu. 10N Kwama naba yile, a yim nangi̱n chi̱ntu ta maatu n ti yinangu ta mi̱la ki̱nangu we yo yati̱maka ni̱bu bunti̱ki̱me, yinangu n we ti̱madu ki̱ka̱nganu. 11Ni̱n baddu ka wure ka yung dum kwa̱mbi̱ri̱mu, ka swan ti̱ni bil, ke yo ni̱re mo a ti ki̱ri̱ng. 12Bwiti chiyu a fwidu we bubbuku, aya ti̱bunti̱ nani bi̱bu a ke bi̱yili̱mi̱mu, a ma bwanu a lami̱nti̱ ki̱dangu a yiu chi Kwama a bwa̱u ka ni chide.

Bwa̱ki̱ Kwamang.

13Ki̱dangu n Kwama a bwa̱u n ti Yibrayim mangu, a bwa̱u ki̱ni di̱twa̱mbi̱r. N ki̱n a ma di̱twa̱mbi̱ru ki̱ni di̱n ki̱n di̱ne a ne di̱nu a lwe n ki̱n ka twa̱mi̱n chi̱nu we.

14N ki̱n a twa̱m ko, “Bi̱yili̱m mang yo mi̱n delaku nabwen, ti̱nti̱ne mang yo bwebwiyeti mwiyu ka bwidu yinang ki̱switiyu a dii.” 15A kuteng ki̱ku n Yibrayim a ma bwanuwangu, a ya chi ni̱bu a bwa̱u ka ni ki̱nitu.

16Ka ni yaka ma di̱twa̱mbi̱re, ki̱twa̱ndu ki̱ni chi a la ki̱ne, di̱twa̱mbi̱r di̱du ki̱ kau di̱yili̱n. 17We yiko, n Kwama a kwau dur ki̱nu ki̱ni di̱twa̱mbi̱r ke bi̱bu a yiu li̱me bwa̱kemu, ka yindu ko bi̱yili̱m n Kwama a sutebu ya̱m ki̱mu. 18Ti̱me chite yurau, wu neka sutedu sutene, wu n Kwama a ne kedu ka ma ti̱kali ki̱ne, n ki̱n a bwa̱u ka yo nimi̱n delaku yinu ko ka a newe yiko, a yung n ki̱n naba ki̱le. Di̱ne yiko, n chir bi̱bu niyang yika bwa di̱ki̱ne ke ni ya rukku ni laituwemu, ni tidu we bwa̱ki̱ kangu ki̱ni dukan.

19Yo ni̱re chire wu nang chi ki̱bedu ki̱ni bwa̱ki̱ ni̱rang we tiku chi̱renagitu. Ki̱yikadu ki̱ni chi̱ni we kwa̱r Kwamanu ki̱ ledu ki̱ni chi̱ni a mure wu a ki̱di̱ng kangi wauwade. 20We bi̱bu, n Yesu a tu a le fiko di̱ne chiniye, n ki̱n nang tikake Fanseti ki̱diya kwade yinang Melkisedek.

Currently Selected:

Yibraniyam 6: Tula

Highlight

Copy

Compare