Yibraniyam 13
13
Chitu n Kwama ki̱badditu
1Ti̱chakakku ti̱mi̱la yichiyu yinang kebu. 2Ti̱yiu rungko we loni chiyu fa̱li yurau, di̱ne bi̱kam a wi a ma yiko, a kuten kiku n chi a yiu rungko a yimbu ko ni̱bu ti̱tumbi̱ri Kwamame. 3Ti̱kuri ki̱ni ni̱bu bi̱bu a di̱bi̱nti̱li̱mu, we ni̱r chi̱nu yinangu ni̱bu a kwau chi̱n wareng. Ti̱kur ti̱n ki̱ni bi̱bu ki̱nwe riyemu, ti̱kire chimi̱n yinangu riye n wu chinang.
4Ti̱madu ti̱kali we ki̱ni ki̱na, naye n ti kwarta a tau dutu chi̱ntu. Di̱ne n Kwama ka mwata ni̱bu ki̱ma ki̱kulbu mi̱nu n ti bi̱bu ki̱ma yarimu. 5Ti̱ma kutan n ti mi̱laku ka̱mbi̱rangu, ti̱ma bwanu ki̱ni chi chi ta yange. Di̱ne n Kwama a yi ko,
“A ne mang dunu ki̱diya kwadu.
A ne mang mari̱nu ko bayim.”
6Nang chi a yo a ne kamaku we nang fwa ko,
“N Kwama we ware n ti mi̱n
A ne mang nwe tayi,
ni ka mami wureni?”
7Ti̱kur seli̱bu chimu a fwa chimi̱n ya̱m Kwamamu. Ti̱da̱ng yinangu a ya yayu chiyangu, n ti bwanu n chi a ngan dure. Ti̱ya yayu ki̱ni keku bi̱yili̱mang yinangu n chi a mangu.
8N Yesu a Masiya a sutenbuwe, n ki̱n nang wu dare n ti wu diye n ti wu ki̱diya kwade, we yiko ti̱nti̱n ki̱diya kwadu. 9Ti̱kedu ni̱bu a buti̱du chin we ki̱ni duum miyaku ta yim mi̱nbu wengu. A le ni̱tu chiretu ka ya ruku ki̱ni li̱me ke ya̱mi chabtu wu a ne maka bi̱bu ki̱chaddi̱mu.
10Chini ki̱ni se wu bi̱bu ki̱ma nangangu we di̱kuri̱mu a ne da we ka chade. 11Tikake Fanse ni̱bu Yafudam ki̱yadu ki̱ni ki̱tuum naiyimu a fi a mure a la chi ki̱ni wauwade, ke a ma niku ki̱tuumang di̱ne ki̱letiye, aya nam wu a naiyiye ki̱twidu a kuteng bi̱nang.
12Nang tiyangu n Yesu a nwe riye a bwa a kuteng bi̱nangu, ko ke ki nura ni̱bu ki̱leti̱m ki̱ni bi̱ki̱mu ki̱tuum. 13Di̱ne yiko ni chir ni yika bwa di̱Yesuwe a kuten bi̱nangu, ke ni mu ni̱ru yinangu n ki̱n a mu ni̱ru we riye a wuko ki̱swingu. 14Aya we finu n chini newe ki̱ni bi̱n ki̱diyan, aya niin da̱ng di̱du kabedi̱nu.
15Di̱ne yiko ni chakakku we di̱n Yesunu niya sii Kwama yinangu a dakanang, ni dela ki̱n ki̱ni ben chi̱renu nang ki̱chireng niku, ko n ki̱n nang Tewuduwe chire. 16Ti̱tabduwe ti̱na ma chi a leetu ti̱na maka ni̱bu ti̱na kera chitu a fi wiine, di̱ne nang duum niku n Kwama ki̱baddi̱mu.
17Ti̱ma tikakketi ni̱bu Kwamayu mi̱n kwa̱mbi̱r, ti̱bunti̱ chi ki fwaditu. Di̱ne n chi ki̱to chi̱nu yinang bi̱bu yaka fwa nangi̱n chitu a kakku Kwama. Ti̱ma chimi̱n kwa̱mbi̱r ke nangi̱n chitu a kau chimi̱n ki̱ni furi mwemwen, n ke kaiyan ni̱re, ti̱tu we di chi̱ne ka kau chimi̱n li̱mangu.
Baki̱ twa̱ba̱ku buniyang
18Ti̱twa̱ba̱ nimi̱n buni, n ni̱n, ni̱n yim we ni̱ru nang mabu wuka ni mi̱nbu ki̱le. We ti̱kuran ni̱ntu ni̱n ke nang ma chi a dakan a kakku Kwamangu. 19Mi̱n wana chi̱nu ti̱twa̱ba̱ bunitu di̱ne ke Kwama a yo n ki̱la bwa di̱chine a tidu ke we.
Swanki̱ya̱ma̱ng
20-21N Kwama a kuki̱ Tewuduwe Yesu we furu a ki̱tuum bwa̱ki̱ ki̱diya kwadi̱mu. We yiko, n Yesu a kau naba toke wuduwe wu a Kwantiye. Mi̱n twa̱ba̱ chimi̱nu mi Kwama wu ki̱ni li̱mange a ri chi̱ni ki̱ni ka nang ti̱ti̱le chi ti̱yiliye ke a ma ki̱ke ko, ke a nang ma chi ki̱badditu we di̱chine a di̱n Yesu Masiyan. Dwiyentu n ti̱u Masiya ki̱diya kwadu. Amin.
22Kebu mi̱m, mi̱n wana chi̱nu, ti̱ma bwanu ki̱ni ki̱kure mi, di̱ne mang mwalbu nabwe ti ya̱me.
23Mi̱n baddu tayi̱ndu tiko ni̱bu a mare ke chire n Timoti we di̱bi̱nti̱lu. Ka a be date, nang bungadu ware n ti ki̱n yo be mang ku chi̱ne.
24Ti̱sii ti̱n bi̱seli̱m chimu n ti ni̱bu bunti̱ki̱mi kwang. Ba Yitaliyamu ki̱siite chinu.
25Li̱me Kwama a swe n ti chi̱ni kwang.
Currently Selected:
Yibraniyam 13: Tula
Highlight
Copy
Compare
Share
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
