2 Biti̱re 3

N Yesu a bwa̱u ka ki̱ladu

1Di̱du nang lwangi̱n di̱robi̱nu mi̱n mwal chimi̱ndi̱nu n ti̱n bi̱bu mang mi̱lani̱mu, we lwangi̱n ti̱tu mi̱n kur chimi̱nu di̱ne ke n su chi̱n ti̱ma ti̱kuran ti̱yili. 2Mi̱n baddu ta kuru ta swaati̱ chi fandubu Kwamami wauwadi̱mu a fwa fereditu n ti chi Tewuduwe n ti Naba Yuke a fwa yii fa̱kube. 3Mi̱n baddu ta mwedu ta swaan bi̱bu, we diti swan kutengu ni̱bu ki̱fiyem ka chiredu bi̱bu ka nura chi̱nu nurane. N chi ka chakakku ki̱ni kubeku chi ti̱bwilatu. 4N chi ka ni̱n fwadi ying, “A n Yesu a bwa̱u ko ki̱ki̱ladu, a ki̱lawenga? Feredi ki̱dangu tukebu chi̱remu a du ti̱ti̱nitangu, kanang ti̱ti̱le chiye a sutebu yinangu ni̱bu a yo mi̱ne ti̱ti̱nitangu.”

5N chi a mwenti̱ki̱ti a tabu ko feredi n Kwama a yo dii ki̱ni ya̱m a fwa yiikom, ki̱ni mwe n ki̱n a chake ti̱mu, a kana ti̱mu ki̱ni mwe. 6N Kwama a ma nangangu ki̱ni mwe bambi̱lake a wur ti̱ti̱nitu we ki̱dang kangu. 7Ka ya̱m bi̱biini̱m, dii n ti ti̱mu a yang di̱ne ki̱range. Ki̱yo chidu di̱ne di mwatake, yo ni̱bu bi̱bu a bunti̱bu Kwamamu ka twiyade.

8Aya n ti̱n kebi̱ bi̱bu mi̱n mi̱ladi̱mu, ti̱tabi̱duwe tiko di wiine yinang swa̱tu kuneng we kakku Kwamangu, ti̱nti̱ne swa̱tu kunengitu yinang dii wiin we kakku kangu. 9N Tewuduwe a ti̱kabu we bwa̱ki̱ kangu a yi ko ka bedangu yinangu bi̱kamu ki̱kuradangu. N ki̱n ki̱ma bwanu di̱ne mune, n ki̱n a babu wuka ni ka twiyadu. N ki̱n a ni ki̱swi nabwen ke n kawure a wo ki̱ti̱m. 10Aya di Tewuduwe ka bedu yinang daaku. Yinu dii ka twiyadu ki̱ni nabwe ker, yinu chitu we mureti kwang ki̱rang ka twidu, yinu ti̱ti̱nitu n ti chitu we mureti kwang ka twiyadu.#3:10 Ka twiyadu: Ti̱kantu ti̱mwalang ti̱ fereditu ko “Ka twidu” we finu.

11Kangu ti̱tu chi kwang ka twiyadu a wa̱re wangu, bi̱bi̱le ki̱dum daam a dakan ni madumu? Ti̱ya yayu wu wauwade, ti̱ni dur chi̱nu we di̱Kwama, 12ti̱kur kwalangi chiyu a di̱Kwama wu ki̱bede, ti̱funti̱ bwi ti̱yo diwu a be daatu. Diwu ki̱rang ka twi dii, n ti chi a muretu kwang ka yubadu we ben ki̱rangi̱n. 13Aya ni yam twiye wu fwiye n ti ti̱m bi̱fwimu n ki̱n a bwa̱umu, bwako ni̱bu kani̱n tum ka yile.

14Di̱ne yiko kebu bi̱bu mi̱n mi̱ladi̱mu, we yo ti̱yam Di we, ti̱funti̱ bwi ti̱ya yayu wu wauwade wu a ne di̱tuur we, ti̱ma fiswe li̱mange. 15Ti̱kur tiko, n Tewuduwe chire ki̱ni bwanu di̱ne a ni ni̱bu ki̱swi ko ke n chi a ya a swimi̱n. A ti we yinangu ke chire m Bulus a mwal chimi̱n ki̱ni kasan ti̱tu n Kwama a ni ki̱nitu. 16N ki̱n a fwa ya̱mi yiyu we lwangi̱n kitu. Ti̱kantu chi ti̱tu a fwatu ki̱ni bwar swaan ki̱n. Nang chi bi̱kam bi̱bu ki̱ni kwalan swaangke bi̱bu a tibu yinang we keku bi̱yili̱mange ki̱sute chi n ki̱n a fwa a muretu. Nang kangu ki̱mandu ki̱ni ti̱kantu ti̱mwa̱lan yam Kwamamitangu. Ki̱wu dutu chitu mi̱ne riye.

Ya̱mu m Biti̱r a swami̱ni̱m

17Di̱ne yiko kebu bi̱bu mi̱mi̱ladimu, yo ta tu tayim ti̱te, ke ti̱kabi ki̱ni ki̱yolang, ke ti̱yaruwe ti̱kubbi ni̱bu bi̱bwilamu, ke ti̱yaruwe fi ta timi̱ne. 18Aya ti̱chakakku ti̱nang dwiyedu we li̱me n ti yingku Tewuduwe chire n ti Naba Yuke Yesu Masiya. Dwiyentu n ti̱ki̱n a mwetuwe ki̱ka̱ngu ki̱diya kwadu. Amin.

Currently Selected:

2 Biti̱re 3: Tula

Highlight

Copy

Compare