1 Biti̱re 5
5
Ti̱to ki̱ran kwanti Masiyanu
1M mi̱n wu mang kau sele mi̱n fwan, mi̱n mwa chi̱nu n ti̱n seli̱bu kanbi Kwamamu. M mi̱n wetuwe bi̱bu a ku riye Masiyame. M mi̱n wetuwe bi̱bu ka ya delaku kangu we di ki̱lake ko. Mi̱n wana chi̱nu mi, 2ti̱ to ki̱ran kwanti di̱du n Kwama a ni chini̱nu. Ti̱nang da̱ngdu ki̱ni ki̱ ke chi̱n, n ke yinangu ni̱bu ki̱yo chi̱nu yong. Ti̱maduwe di̱ne ni̱bu ka fee chi̱ne, aya ti̱ma di̱ne ti̱ badu siin ta ma nangang Kwamang. 3Ti̱yungdu dukan we ni̱bu bi̱bu n Kwama a ni chini̱mu, aya ti̱yung da wuyile we kwanti n chi ka miyade. 4Yinu yo Naba Toke Wuduwe ka fwadede, taya di̱ki̱ri̱n di̱yili̱n di̱du dwiyen kitu a ne ridu riye ki̱diya kwadunu.
5Bwelemu ti̱n, ti̱bunti̱ ya̱m seli̱bu. N ti̱ni ki̱ni kwang, ti̱kuki̱du dutu chi̱ntu we, ti̱maka yichiyu we nangangu, di̱ne ya̱m Kwamamu a fwa ko,
“N Kwama ki̱ko ni̱bu ki̱kuki̱ duti̱mu,
aya ki̱yung ni̱bu bi̱bu a kuki̱bu dutu chiti̱mu mi̱n li̱me.”
6Di̱ne yiko, ti̱kuki̱du dutu chi̱ntu we kakku Kwama naba dukane, ke we ki̱swi a dakane ka ni chi̱n dwiyentu. 7Ti̱du ti̱kuran chi̱ntu kwang a di̱ki̱ne, di̱ne n ki̱n nang naba tore chi̱n.
8Ti̱do bwi, ti̱swe ki̱ni ki̱yolang! N Setan ki̱bwa̱ladu yinang turum wu ki̱kii wii chune, ki̱bau wu ka wude. 9Ti̱nidu ki̱n da we, ti̱ti ki̱ri̱ng we keku bi̱yili̱mang changu, di̱ne ta yim kebu chimu ni̱bu bunti̱ki̱m ka nang bwa̱le we ti̱ti̱nitu, n chi ti̱n ki̱nweti̱ riye wu yiko. 10A kutengu ta nwe riye a baku ki̱swi bayimangu, n Kwama naba li̱me kwang, wu a yal chi̱ne a di̱ Yesu di̱ne ke ti̱ya dwiyenkitu ta ki̱diya kwadi, n ki̱n ka yodu ta kadi di̱mbi̱ri̱m, ka ni chi̱n dukan yinang, yinu ka ru ti̱chinu. 11Mati̱nti kwang n ti̱ki̱n ki̱diya kwadu! Amin.
Di̱siiru a swan mi̱ni̱n
12M mwal chimi̱n lwangi̱n di̱du ki̱ni makaku Sila,#5:12 We yii Yeliname a mwal ko Silbanu. wu ki̱n naba bunti̱ki̱ke mang ke. N ke mang ru chi̱nu, mang fwa chimi̱n ti̱ni kwa̱rikwa̱ri bi̱yili̱m li̱me Kwama kangu wemi̱nangu. Ti̱ti ki̱ri̱ng we mure.
13Ni̱bu bunti̱ki̱mu a fi a Babilamu,#5:13 Babila we wuka ki̱swi ki̱yung Roma. bi̱bu Kwama a sutu ti̱n yinang chini̱mu, ki̱sii chi̱n tedu, bwemi m Markus ki̱siite chi̱nu ti̱n. 14Ti̱siikan ki̱ni kwarkaku ki̱yung mi̱laku ni̱bu bunti̱ki̱me. Li̱mangu a swe ware n ti chi̱ni kwang, n ti̱n bi̱bu m bi̱u Masiyamu.
Currently Selected:
1 Biti̱re 5: Tula
Highlight
Copy
Compare
Share
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
