2 Biti̱re 1
1
Di̱siir
1M mi̱na Simun Biti̱r, bwe nanga n ti fandu Yesu Masiya. Mi̱n mwal bi̱bu a ya keku bi̱yili̱mang ki̱yilang yinangu n ni̱n nang ya ti̱nangu, we yile Kwama chire n ti naba yuke chire n Yesu Masiya.
2Li̱me n ti li̱mangu burtu we di̱chine di̱ne ta yim Kwama n ti Yesu Tewuduwe chire.
Di̱yal Kwaman n ti suti̱ku
3N Kwama we a dukan ki̱nu a ni chi̱ni chi no ni yaditu kwang ke ni ma duum fiswe wu a ni̱bu ki̱nwe tayi kiye. Ki̱chitu wu kwang ka ti̱chirei di̱ne niyang yim Masiya yinange. N ki̱n a yal niye ke ni ma fiswe lwekake ware n ti ki̱n we dwiyen kitu n ti da wuyile ko. 4Di̱ne dwiyen kitu n ti da wuyile ko, n ki̱n a bwa̱u ka ma nimi̱n chitu nabwen ti̱tu a lelei. We ti̱tu, ta kadu ki̱ni da Kwama, yinu ta swidu we muli̱nu a ti̱ti̱nitu ki̱bunte kubeku ki̱kusangu.
5Di̱ne yiko, ti̱funti̱ bwi yinang, ti̱su ti̱tu ta mwemi̱netu ki̱nitu, ti̱su keku bi̱yili̱mang changu ki̱ni yile, we yile ti̱n, ti̱subi ki̱ni yingku, 6we yingki̱ku, ti̱subi ki̱ni takku durang, we takku durangu, ti̱subi ki̱ni muku ni̱rang, we muku ni̱rangu, ti̱subi ki̱ni da wu a bunti̱ki̱ Kwamange, 7we da wu a bunti̱ki̱ Kwamange, ti̱subi ki̱ni maku chi a lele we ka wuwule niye yinang kebu, we maku chi a leletu, ti̱subi ki̱ni mi̱laku.
8Yiyu nang datiyu a dakan ta kadi ki̱niyu. Ka n ti̱ni ki̱ni burte, ka yodu ta kadu ki̱ni funti̱ku bwiyang n ti bi̱bu ki̱ni ki̱kwi we yinku Tewuduwe chire n Yesu Masiya. 9Di̱ne ka nang wuwule niye wu a kwala datiye, a yung n ki̱n a kubu di yinang, n ki̱n ki̱du yinu a tabu ki̱ni nuraki̱ku ni̱bu a ma ki̱mi̱n we ki̱leti kiyu ferediye.
10Di̱ne yiko kebu mi̱m, ti̱su funti̱ku bwiyang changu, ti̱yungi siin kasi di̱yal n ti sutuki̱ku n Kwama a ma chimi̱nangu. Ka ti̱maye, a ne ta yari̱nduwe ko bayim. 11Nang ki̱swi n Kwama ka niin chi̱n nabwe da wu ta le mati̱n Tewuduwe chire n ti Naba Yuke Yesu Masiya wu ki̱diya kwade.
12We yiko, manni̱n kur chimi̱n ki̱chitu wu kwadu, kasi ki̱ku ta tu ta yim yinu tati ki̱ri̱ng we ya̱m bi̱yili̱mu ta yi̱bi̱mu. 13We da̱ngki̱ mangu, a da, manni̱n kur chimi̱n ti̱tu chi ka m mi̱n we ki̱ni ti̱kuriye. 14Di̱ne n yim diti miyu we ti̱ti̱nitu a dubu nabwen, kangu n Tewuduwe chire Yesu Masiya a yungyangu. 15Di̱ne yiko, mang funti̱bwi, ke ti̱swaan ki̱chitu wu, ta tadu we ni̱tu chi̱ntu kasi no a kutengu mang du ti̱ti̱nitangu.
Ni̱bu a ku dwiyen Masiyantu
16We ya̱m dukan n ti beki̱ Tewuduwe n Yesu Masiya nang fwa chimi̱nangu n ke di̱buti̱r ka ki̱si̱nni kasani nang kaba ni̱ri, aya ni̱n ku dwiyen kitu ki̱ni nui ni̱n. 17Di̱ne n ki̱n a yiu ri̱kaku n ti dwiyentu we di̱Kwama Te, yo ker a chir ki̱mi̱ne we dwiyen Kwamatu ki̱ni dukan ki̱fwadu ko, “Wu nang Bwemi, mi̱n mi̱lade, wu mi̱n nwe ta̱ma̱ng n ti ki̱n yinang.”
18N ni̱n ni̱n fwan ni̱n nwe ker di̱du a chire a dii, yo ni̱n we ware n ti ki̱n we kun di̱di wauwadi̱nu. 19Ti̱chitu wu kwang a yo ni̱n yim ko bi̱yili̱m chi fa̱kubu bi̱bu feredimu a fwaatu. A dakan ta madi daan daan we ya̱m bi̱bu di̱ne a kau yinang ki̱yiiye wu ki̱yiidu a ki̱liye a lami̱nti̱ yo ti̱mu ka kwiyade, yo m Masiya wu n ki̱n nang Di̱turmi̱ne kama yiiku we ni̱tu chintangu.
20We ti̱ti kwang, a dakan ta swaanu tiko ya̱mi fa̱kuyi bi̱bu a mwalang we ya̱m Kwamamu ni̱bu a mwalbu ki̱ni swaanku ki̱ku a Fa̱kubang. 21We ya̱m fa̱kuyimu, a bebu a ki̱ke niye, aya Fi̱ki̱m Kwamamu a le ni̱tu ni̱bitu a yo n chi a fwa chi n chi a yiuwe a di̱Kwamatu.
Currently Selected:
2 Biti̱re 1: Tula
Highlight
Copy
Compare
Share
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
