1 Biti̱re 4

Yayu ni̱bu bunti̱ki̱m Masiyame

1Yiko ti̱n yinangu m Masiya a nwe riye we a bwiye, n ti̱n fal ti̱ mu ni̱ru ti̱bunti̱ da ko we nwe riye, di̱ne ka nang wuwule niye wu a nwe riye a bwiye, ka du maku ki̱letiyangu. 2We ki̱swi a du ta swedu we ti̱ti̱nite, ne ta ki̱lati̱nu we da chi̱n wa kubeku bwiyange, aya ti̱ bunti̱ ki̱ke Kwama. 3Ti̱kai ki̱swi chi̱n feredi ti̱ma chi kuu ni̱bu a yimbu Kwama ki̱maditu. Ti̱lekan we ti̱kulitu, n ti kubeki̱ bwiyangu dangtidangti, n ti ti̱tosantu, n ti ki̱fi̱bti n ti ti̱noran ta mabwi n ti siiku di̱yor.

4Yinu ki̱kangu fati̱bu chimu feredimu ki̱ya̱r yii yo ta kunkabu n ti chi we maku chi ti̱bwilatu yinangu no kwadangu, n chi ki̱ swa̱ba chi̱nu. 5Aya n chi ka fwa ki̱leti chiyu we kakku Kwamangu, wu ka mwata bi̱bu ki̱ni ti̱kurimu n ti bi̱bwari̱mu mi̱nu. 6Nang chi a yo ni̱bu a ma bi̱bwari̱mu mi̱n di̱mwar ya̱m bi̱li̱me, kasi ki̱ku ni̱bu a mwata chimi̱n we a bwiyangu yinangu a fwe ti bi̱kamu ni̱bangu, ni̱bu n chi ka medu ka swedu we Fi̱ki̱mu yinang Kwama.

Da wu a dakan ni̱bu ki̱bunti̱ Masiyame

7Ti̱ti̱nitu a mwatan ki̱ridu, di̱ne yiko ti̱ti ki̱ni ki̱yolang, n ka wure a tau dur ki̱nu, ke ti̱yim tiwe twa̱ba̱ku buningu. 8Chi a la chiye nang ti̱tu, ti̱ mi̱la yichiyu ki̱ni ni̱ri diin, di̱ne mi̱laki̱ku ki̱yo duku ki̱letiyangu nabwen. 9Ti̱yiu kal chi̱nu a chau chitu we loni chiyu a ne kungakunga we. 10N Kwama a ni ka wure wakili ki̱ti̱me wu ka mang chiye dangti dangti, wu a li̱me ko, di̱ne ke ni ma nangangi ki̱n ke ni maka kal chi̱renu. 11Nii wu ki̱ti̱me ko wu a di̱mware, a mwintuwe ka ma di̱mwar ya̱m bi̱bu a chire a di̱Kwamam. Bi̱bu ki̱ti̱me chi nangange, a chakakku a nang ma nangangu ki̱ni dukan di̱du n Kwama a ni chi̱nu, ke we chiti kwang n Kwama ka ya delaku we di̱Yesu Masiya, wu dwiyentu n ti dukanu n ti̱ki̱n ki̱diya kwadu. Amin.

Riye di̱ne bunti̱ke

12Kebu bi̱bu mi̱n mi̱ladi̱mu, ti̱yaru yii we riye ti̱nwedi budde di̱ne sweku change, ti̱da̱du we ti ti̱kan chi ti̱fwi ki̱fwedu n ti chi̱n. 13N ti̱ki̱ki yikongu, ti̱ri ki̱ni ti̱mi̱lan di̱ne ti̱nwe riye tiyangu m Masiya nwengu, ke ti̱ri ki̱ni furi mwe mwen nabwen yo n ki̱n ka bedu ki̱ni dwiyen kite. 14N ti̱n ni̱bu delaki̱m ka ni̱bu ki̱tu chi̱nu di̱ne ti̱bunti̱ Masiya, ti̱tu ki̱yung Fi̱ki̱m Kwamam bi̱bu ki̱ni dwiyeni̱m we ware ti chi̱n. 15Nwe riye chi̱n a kaduwe di̱ne ti̱kau dute, ka kute, ka ti̱ma chi ti̱bwilaiye, ka ti̱ yo dur chi̱nu we chitu a ne lwangang chang we. 16Aya ka wuka we tibe chi̱n ki̱nwe riye di̱ne ki̱bunti̱ Masiya, a nwedu dibwi we, aya a nang wana Kwama di̱ne ni̱bu ki̱yal ki̱nu ko naba bunti̱ke.

17Ki̱swi a lam di̱ne mwatake, ka mwedu we ni̱bu bi̱bu m bi̱u Kwamamu. Ka a mwetuwe di̱chi̱niye, kanodu bi̱bu a kebu ya̱m bi̱li̱m Kwamamu ka kadi yire? 18A mwalmwale ko,

“ka ni̱bu yilemu ka swidu bawiye,

ka kadi yire we bi̱bu a yimbu Kwamamu

n ti ni̱bu ki̱letimu?”

19Di̱ne yiko, bi̱bu ki̱nwe riye di̱ne ki̱ke Kwama, a chakakku a nang ma chi a leetu. A ni dutu chitu a di̱Kwama wu a mu chi kwange, n ki̱n wu a kwiyabu bwa̱ki̱ kange.

Currently Selected:

1 Biti̱re 4: Tula

Highlight

Compare

Copy