Tourat 1: Foyda Nama 47

1Iusufe Feraunor gese gia ḳoila, “Amar baba ar baiainte, tarar goru-sagol ar tarar hokkolta loia, Kenan desh saṛia aisoin. Tara aia Gushono fosi gesoin.” 2Baiaintor maze fas zonre nia tain Feraunor samne azir ḳorla. 3Feraune tarare zikaila, “Tumra kita ḳam ḳoro?” Tara ḳoila, “Afnar i gulam oḳole baf-dadar amol taki-u foshu fali.” 4Tara hirbar ḳoila, “Amra i desho musafir oia taḳar lagi aisi. Kenan desho oḳon bezuita nidan soler ḳori, hino amrar foshur falor kuraki nae. Erlagi doya ḳori afnar i gulam oḳolre, Gushono roibar shuzug deukka.” 5Feraune Iusufre ḳoila, “Tumar baf-baiain tumar gese aisoin; 6asta Mishor desh-u to tumar samne foṛi roise. Deshor hoḳol taki bala zagat tarare roite deo, tara Gushono-u taḳouk ar erar maze zoiggo manush faile, tarare amar foshur falor saloḳdar banailao.”

7Bade Iusufe tan baf Iakubre Feraunor samne anaila ar Iakube Feraunre dua dila. 8Feraune Iakubre zikaila, “Afnar boyosh ḳoto oise?” 9Iakube ḳoila, “Duniait amar musafirir ayu eḳ-sho tish boros oise, ita to beshi nae, ar kub toklife-u i din ḳaṭse; amar baf-dadar musafirir ayur homan oḳono oise na.” 10Heshe Iakube Feraunre dua ḳoria bidae loila. 11Teu Iusufe Feraunor hukum moto, tan baf-baiainre Mishor deshor hoḳol taki bala zaga, Ramashesh elaḳat roita dila. 12Iusufe tan baf-baiain ar tarar foribarre zarzir dorḳari, ḳani-kuraki hoḳolta zugai dila.

Mishor desho nidan baṛse

13Bade aḳal aro betaya oilo, deshor kunu zagat ḳanir kunta asil na. Teu Mishor ar Kenan desh ekkebare ḳahil oigelo. 14Mishor ar Kenan deshor manshor zoto ṭeḳa-foysha shuna-rufa asil, itadi tara dan ḳorid ḳorae, Iusufe ota dola ḳoria Feraunor banḍaro zomaila. 15Mishor ar Kenan deshor hoḳol shuna-rufa zebla fuṛai gelo, teu Mishori oḳole aia Iusufre ḳoila, “Amrare ḳanir kunta deukka. Amrar shuna-rufa fuṛai gese ḳori afnar souḳor samne morizitam ni?” 16Iusufe ḳoila, “Taile tumrar foshu oḳol ania deo, shuna-rufa fuṛai gele-o foshu oḳlor bodla ami tumrare ḳani-kuraki dimu.” 17Teu tara zarzir goru-sagol, guṛa-meṛa, gada-gadi Iusufor gese anla ar Iusufe er bodla tarare dan dila. Ou laḳan tarar hokkol foshur bodla, hi bosoror kuraki salaila.

18Ar hi boros gelo, er bador boros manshe aia Iusufre ḳoila, “Huzuror gese amra kunta-u lukaiar na, amrar hoḳol shuna-rufa shesh oigese ar foshu oḳol-o afnare dilaisi. Oḳon amrar ar kunta-u roise na, ḳali ou shoril ar zaga-zomin saṛa. 19Erlagi afnar souḳor samne zomi-zoma shoho amra kila morizitam? Te afne amrare-o ar amrar hoḳol zomi-zoma-o loilaukka, amra Feraunor gulami kormu, ta-o amrare ḳani deukka ar bis deukka, teu amra-o mora tone basmu ar zomin ḳanain-o borbad oito nae.” 20Ou Iusufe Mishor deshor hokkol zomin Feraunor name loilila, ḳaron i aḳal oula bezuita oisil zen, Mishoror hoḳole-u tarar zaga-zomin besilaila. Teu deshor hoḳol zomin Feraunor ato aillo. 21Ar Iusufe Mishor deshor eḳ mata taki aroḳ matar hoḳol manshore ṭauno far ḳorilila. 22Ḳali babon oḳlor zaga-zomin tain loila na, ḳaron erare Feraune beton dita, ar ota dia-u tara solta. 23Heshe Iusufe manshore ḳoila, “Huno, Feraunor name ami tumrare ar tumrar hoḳol zaga-zomin-o loililam. Oḳon tumra ou bis oḳol neo ar zomino bain ḳoro. 24Teu zomino zeta foshol folibo, er fas baṭor eḳ baṭ Feraunre dio ar baki sair baṭ, zominor bis, tumra ar tumrar foribar ar huruttaintor ḳanir lagi niogi.” 25Teu manshe ḳoila, “Afne amrar zan basaila. Huzure amrare doya ḳorle, amra Feraunor gulami kormu.” 26Bade Iusufe Mishor deshor zaga-zominor lagi ou ain zari korla, hoḳol fosholor fas baṭor eḳ baṭ Feraune faiba, ḳali babon oḳlor zomin bade. Ou ain oḳono soler.

Hozrot Iakub (a:)re dafonor lagi osiot

27Boni Israile Mishor deshor Gushono boshot ḳorla. Tara honor doḳoldari faia, kub folala oila ar tarar bout aolad oila. 28Mishor desho aia Iakub shotro boros zinda roila. Teu tain hoḳoltae eḳ-sho shatsallish boros basila. 29Israilor moutor din ḳasaia aile tan fua Iusufre ḳobor di anaia ḳoila, “Amar bae tumar meherbani oile ekḳan osiot ḳoraitam, tumi amar urator tole tumar atḳan harao, tumi amar bae doya ar halali deḳaio, amare Mishoro dafon ḳorio na. 30Ami zebla amar baf-dadar gese zaimugi, ou shomoy tumi amare Mishor desh taki nia, amar baf-dadar ḳobrostano dafon ḳorio.” Iusufe ḳoila, “Afne zela ḳoila, oula-u ḳormu.” 31Teu Iakube ḳoila, “Te tumi amar gese ḳosom ḳoro.” Iusufe ḳosom ḳorla. Ou Israile tan bisnar hitan bae ḳait oila.

Currently Selected:

Tourat 1: Foyda Nama 47: sylL

Highlight

Copy

Compare