Tourat 1: Foyda Nama 48

Iakub (a:)e dui natire dua dila

1Erbade Iusufe ḳobor faila, tan baf bemar, ou tan duio fua Manosha ar Afraimre loia bafre deḳat aila. 2Iakube zebla hunla, tan fua Iusuf aisoin, ou tain shorilor hoḳol bol ḳaṭaia, uṭia bisnat boila. 3Ar tain Iusufre ḳoila, “Shorbo-shoktiman Allae Kenan deshor Luz ṭauno, amare didar dia borkot dan ḳoria ḳoisla, 4‘Huno, ami tumare foldar ḳormu ar bout aolad dimu, tuma tone bout gusṭiala eḳ zati foyda ḳormu ar tumar oarish oḳolre, hameshakur lagi i deshor malikana dimu.’ 5Ami tumar gese Mishoro aibar age, tumar ze duio fua Mishoro zonmisoin, tara amar-u. Ruben ar Shimion zela amar, oula Manosha ar Afraim-o amar oiba. 6Oile erar bade tumar zeta hurutta oisoin, tara tumar-u roiba, ar tarar bair name-u erar malikana ḳaim oibo. 7Ar Foddon taki amra aoar shomoy, Kenan deshor Ifrat taki tuṛa duroi taḳte-u, Rahela mara gela. Teu ami honor Ifrato, Betelhamor fotor daro tanre dafon ḳorlam.”

8Bade Iusufor fuaintor bae saia Israile zikaila, “Era ḳe?” 9Iusufe tanre ḳoila, “Era amar fuain, Allae ou desho-u erare disoin.” Tain ḳoila, “Erare amar ḳasat ano. Ami tarare dua ḳortam.” 10Murobbi boyosho souḳor zuti komi zaoae Israile bala ḳori deḳta na. Teu era ḳasat aile, Israile tarare ainja ḳori doria hunga dila. 11Tain Iusufre ḳoila, “Babare, ami mono ḳorslam tumar muk ar kunu din deḳtam nae, oile Allae tumar aolad oḳolre-o deḳailila.” 12Teu Iusufe tan bafor ges tone, fuaintore horaia maṭit soizda ḳorla. 13Ar Iusufe tan duio fuare loia, ḍain at dia Afraimre doria Israilor bau galat, ar bau at dia Manoshare doria Israilor ḍain galat ania azir ḳorla. 14Oile Israilor nizor aḳole, tan at aṛa-aṛi koria, ḍainor at huru fua Afraimor matat ar Iusufor boṛo fua Manoshar matat toila tan bau at. 15Bade tain Iusufre dua ḳoria ḳoila, “Hou Alla, zan morzie amar baf-dada, Ibrahim ar Isʼhake solta, hou Alla, zein foyla taki aiz forzonto amare falia aira, 16hou firista, zein amare hoḳol mosibot taki basaisoin, tain-u ou duio fuare borkot nazil ḳoroukka. Erare dia-u Ibrahim ar Isʼhak ar amar nam zinda taḳouk. Duniair maze tarar bout gusṭi ouk.” 17Bafe tan ḍain at Afraimor matat raḳla ḳori Iusuf bezar oigela. Ar Afraimor mata taki horaia, Manoshar matat deoar lagi, tan bafor at usa ḳorla. 18Tain ato doria ḳoila, “Baba, i laḳan nae. Ounu amar boṛo fua, te afnar ḍain at tar matat raḳoukka.” 19Oile tan bafe na-kush oia ḳoila, “Babare, ami ita zani, ami ita zanire fut. Tar-o eḳ zati oibo ar mohan oibo, oile tar huru bai tar saite-o mohan oibo, ar tar aolador bout gusṭi oibo.” 20Israile erbade ou duio natire dua ḳoria ḳoila, “Boni Israile kunu manshore dua ḳorle oula ḳoiba, Allae tumare Afraim ar Manoshar laḳan ḳoroukka.” Oula tain Manoshar saite Afraimre boṛo banaila. 21Heshe Hozrot Israile Iusufre ḳoila, “Deḳo, amar moronor oḳt aichche. Alla tumrar loge roiba, ar tumrare hirbar tumrar baf-dadar desho nichchoy firaia niba. 22Tumar baiaintor saite tumare eḳ baṭ beshi dilam. Ou baṭ to Shikim elaḳa, ita amar toluar-donuk dia Amuri oḳlor ges taki anslam.”

Currently Selected:

Tourat 1: Foyda Nama 48: sylL

Highlight

Copy

Compare