আছমানি কিতাব: সুলাইমানি ছিল্লেখ 25
25
বাদশা সুলাইমানর আরো নছিয়ত
1অতাও বাদশা সুলাইমানর ছিল্লেখ, এহুদা দেশর বাদশা হিজকিয়ার মানষে ইতা লেখিয়া থইছলা:
2আল্লায় কুন্তা বাতুনি রাখলে, গৌরব অয় আল্লার,
বাদশায় কুন্তা তুকাই পাইলে, সুনাম অয় বাদশার।
3আছমান যেলা আছে উচা, যেলা গইন জমিন,
বাদশার অন্তর মাপা অলা, আরো বউত কঠিন॥
4রুপা থাকি আলগাও খাদ, পাইবায় খাটি রুপা,
তেউ ইতা দিয়া বানিয়ায়, নিখুত জিনিস বানাইবা।
5বাদশার দরবার থাকিয়া, খেদাও নাফরমানরে,
তান গদি মজবুত অইবো, পাক-পরেজগারিয়ে॥
6বেটাগিরি দেখাইও না, বাদশার ছামনে আইয়া,
দামি আসন তুকাইও না, মানির মাজে গিয়া।
7দামি মানষর ছামনে তো, শরম পাওয়া থাকিয়া,
অলা কইলে আরো ভালা, “অখানো বও আইয়া॥”
নিজর চউখে দেখছো করি, মামলাত যাইও না,
8জলদি করি মামলাত গেলে, লাভ অইবো কিতা?
আরি-ফরি জনে বাদে, শরম দিলে তুমারে,
জুয়াপ কিতা দিবায় তুমি, লোক-সমাজর ছামনে?
9আরি-ফরির বিপক্ষে তো, নিজর মামলা করলে,
তার লুকাইল মাত কইও না, অইন্য জনর গেছে।
10নাইলে যারা হুনবো ইতা, তুমার বদনাম গাইবো,
এতে তুমার দুর্নাম তো, কুনুদিন না হরিবো॥
11রুপার থাল-বাসনো থওয়া, সোনার আয়ফল যেলা,
সঠিক সময় বুজিয়া হারি, সঠিক বুলিও অলা।
12সোনার বানাইল নাকর ফুল, সোনার গয়না যেলা,
গিয়ানির হেদায়তর বুলি, হুনরার গেছেও অলা।
13গরম দিনো ফসল কাটাত, ঠান্ডা পানি যেলা,
মালিকর লাগি বিশ্বাসি, ভালা খবরিয়া অলা;
অউ খবরিয়ায় তার মালিকর, খবর পৌছায় যেলা,
নিজর মুনিবর জানরে তো, নিচিন্তাত রাখে অলা।
14বাতাস আর কালনির লগে, মেঘ না অইলে যেলা,
বড় গলায় ওয়াদা করিয়া, দান না দিলে অলা॥
15ছবর করলে হাকিমর দিল, গলিযিতো পারে,
নরম জিফরার বুলি হুনলে, শক্ত আড্ডিও ভাংগে।
16হিসাব করি খাইও তুমি, খাটি মউ পাইলে,
নাইলে তো বমি অইবো, বেশি করি খাইলে।
17আরি-ফরির ঘরো তুমি, হামেশা না যাইও,
নাইলে হে বিরক্ত অইয়া, তুমারে ঘিন্নাইবো॥
18চুখাইল তীরর ফলা আর, তলোয়ার, গদা যেলা,
আরি-ফরির বিপক্ষে মিছা সাক্ষি দিলেও অলা।
19ভাংগা দাত, লেংড়া পাওত, নির্ভর করা যেলা,
বিপদর সময় বেইমানরে, বিশ্বাস করলে অলা।
20শীতর দিনো ফিন্নর কাপড়, খুললে লাগে যেলা,
কাটা গতরো নুন ছিটাইলে, বাড়ে যেলা জালা;
মন ভাংগা জনর গেছে, খুশির গানও অলা,
অউ লাখানউ দুখি জন, ইতা হুনতো চায় না॥
21তুমার দুশমনর ভুক লাগলে, তারে দেও খানি,
পানির পিয়াছি অইলে হে, তারে দেও পানি।
22অলা করলে থইবায় তার, মাথাত জালাইল আংরা,
মাবুদে দিবা তুমারে, ইতার সঠিক বদলা॥
23উতরে থাকি বাতাস আইলে, ইতার লগে মেঘ আয়,
চুকলখুরর মাত হুনলে, গুছায় মুখ লাল অইযায়।
24কাইজ্জাখুর বউর লগে করা, ঘর-সংসার থাকিয়া,
ছাতর কুনাত গিয়া একলা, রওয়াউ তো ভালা।
25পানির পিয়াছি মানষর গেছে, ঠান্ডা পানি যেলা,
বিদেশ থাকি ভালা খবর, পাওয়াও তো অলা।
26ঘোলা ময়লা পানির ঝরনা, খাল ইন্দারা যেলা,
নাফরমানর কথাত রাজি, পরেজগারও অলা।
27মানষর লাগি ভালা নায়, বেশি মউ খাওয়া,
বেশি তারিফ পাওয়ার আশা, মোটেউ নায় ভালা।
28চাইরো গালার ওয়াল ভাংগা, টাউনর হালত যেলা,
নিজরে সামলাইতো পারে না, হউ জনও অলা।
Currently Selected:
আছমানি কিতাব: সুলাইমানি ছিল্লেখ 25: sylB
Highlight
Copy
Compare
Share
Want to have your highlights saved across all your devices? Sign up or sign in
© Ahle Kitab Society. All rights reserved.
