ꠀꠍꠝꠣꠘꠤ ꠇꠤꠔꠣꠛ: ꠍꠥꠟꠣꠁꠝꠣꠘꠤ ꠝꠤꠍꠣꠟ 3
3
ꠛꠣꠚꠞ ꠘꠍꠤꠅꠔ ৩
ꠝꠣꠛꠥꠖꠞꠦ ꠝꠣꠘꠤꠀ ꠌꠟꠅ
1ꠢꠥꠘꠅ ꠢꠥꠘꠅ ꠀꠝꠣꠞ ꠙꠥꠔ, ꠜꠥꠟꠤꠅ ꠘꠣ ꠝꠞ ꠔꠣꠟꠤꠝ,
ꠔꠥꠝꠣꠞ ꠖꠤꠟꠅ ꠉꠣꠕꠣ ꠞꠃꠇ, ꠀꠝꠣꠞ ꠡꠛ ꠢꠥꠇꠥꠝ,
2ꠅꠟꠣ ꠌꠟꠟꠦ ꠙꠣꠁꠛꠣꠄ ꠔꠥꠝꠤ, ꠟꠣꠝ꠆ꠛꠣ ꠢꠣꠄꠀꠔꠤ,
ꠅꠔꠣꠄ ꠔꠥꠝꠣꠞ ꠎꠤꠛꠘ ꠇꠞꠛ, ꠡꠣꠘ꠆ꠔꠤ ꠃꠘ꠆ꠘꠔꠤ।
3ꠖꠄꠀ-ꠝꠣꠄꠀꠄ ꠘꠣ ꠎꠣꠃꠇ ꠙꠥꠔ, ꠔꠥꠝꠣꠞꠦ ꠍꠣꠠꠤꠀ,
ꠢꠇ-ꠢꠣꠟꠣꠟꠤꠄ ꠜꠞꠣ ꠞꠃꠇ, ꠔꠥꠝꠣꠞ ꠖꠦꠢ-ꠇꠣꠄꠀ,
ꠔꠥꠝꠣꠞ ꠉꠟꠣꠔ ꠛꠣꠘ꠆ꠖꠤꠀ ꠞꠣꠈꠅ, ꠢꠇꠟꠦ ꠖꠦꠈꠣꠞ ꠟꠣꠉꠤ,
ꠖꠤꠟꠞ ꠝꠣꠎꠦ ꠈꠥꠖꠤꠀ ꠟꠦꠈꠅ, ꠚꠣꠃꠞꠤꠔꠣꠄ ꠘꠣ ꠇꠞꠤ।
4ꠔꠦꠃ ꠔ ꠙꠣꠁꠛꠣꠄ ꠀꠝꠣꠞ ꠙꠥꠔ, ꠀꠟ꠆ꠟꠣꠔꠣꠟꠣꠞ ꠖꠄꠀ,
ꠝꠣꠘꠡꠦꠅ ꠉꠣꠁꠛꠣ ꠡꠥꠘꠣꠝ, ꠙꠣꠁꠛꠣ ꠔꠥꠝꠣꠄ ꠜꠣꠟꠣ।
5ꠝꠣꠛꠥꠖꠞ ꠃꠙꠞꠦ ꠘꠤꠞ꠆ꠜꠞ ꠇꠞꠅ, ꠙꠥꠞꠣ ꠖꠤꠟ-ꠝꠘ ꠡꠙꠤꠀ,
ꠔꠥꠝꠣꠞ ꠘꠤꠎꠞ ꠛꠥꠖ꠆ꠖꠤꠞ ꠃꠙꠞꠦ, ꠇꠞꠤꠅ ꠘꠣ ꠜꠞꠡꠣ।
6ꠔꠥꠝꠣꠞ ꠢꠇ꠆ꠇꠟ ꠌꠟꠣ-ꠚꠤꠞꠣꠔ, ꠁꠀꠖ ꠇꠞꠅ ꠔꠣꠘꠞꠦ,
ꠍꠢꠤ-ꠡꠥꠎꠣ ꠇꠞꠛꠣ ꠔꠣꠁꠘ, ꠔꠥꠝꠣꠞ ꠌꠟꠣꠞ ꠙꠕꠞꠦ।
7ꠘꠤꠎꠞ ꠌꠃꠈꠦ ꠘꠤꠎꠞꠦ ꠔ, ꠉꠤꠀꠘꠤ ꠘꠣ ꠜꠣꠛꠤꠅ,
ꠛꠖ ꠇꠣꠝ ꠕꠣꠇꠤ ꠢꠞꠤꠀ ꠞꠁꠅ, ꠝꠣꠛꠥꠖꠞꠦ ꠒꠞꠣꠁꠅ।
8ꠅꠟꠣ ꠌꠟꠟꠦ ꠔꠥꠝꠣꠞ ꠡꠞꠤꠟ, ꠘꠤꠌ꠆ꠌꠤꠔ ꠜꠣꠟꠣ ꠞꠁꠛ,
ꠔꠥꠝꠣꠞ ꠀꠒ꠆ꠒꠤ-ꠉꠥꠒ꠆ꠒꠤꠄꠅ, ꠀꠞꠣꠝ-ꠡꠇ꠆ꠔꠤ ꠙꠣꠁꠛ।
9ꠔꠥꠝꠣꠞ ꠗꠘ-ꠖꠃꠟꠔ ꠖꠤꠀ, ꠁꠎ꠆ꠎꠔ ꠖꠦꠅ ꠝꠣꠛꠥꠖꠞꠦ,
ꠙꠄꠟꠣ ꠖꠣꠅꠀ ꠚꠟ-ꠚꠡꠟꠖꠤ, ꠡꠝ꠆ꠝꠣꠘ ꠇꠞꠅ ꠔꠣꠘꠞꠦ,
10ꠔꠦꠃ ꠔꠥꠝꠣꠞ ꠃꠉꠣꠞ ꠅꠇꠟ, ꠚꠄ-ꠚꠡꠟꠦ ꠜꠞꠤꠛ,
ꠈꠂꠟꠣ ꠕꠣꠇꠤ ꠀꠋꠉꠥꠞꠞ ꠞꠡ, ꠛꠣꠁꠀ ꠛꠣꠁꠀ ꠙꠠꠤꠛ।
11ꠡꠥꠘꠣ ꠙꠥꠔ ꠝꠣꠛꠥꠖꠞ ꠡꠣꠡꠘꠞꠦ, ꠅꠝꠣꠁꠘ꠆ꠘ ꠇꠞꠤꠅ ꠘꠣ,
ꠔꠣꠁꠘ ꠔꠥꠝꠣꠞꠦ ꠢꠦꠖꠣꠄꠅꠔ ꠇꠞꠟꠦ, ꠄꠟꠣ ꠇꠞꠤꠅ ꠘꠣ।
12ꠛꠣꠚꠦ ꠎꠦꠟꠣ ꠗꠣꠝꠇꠤ ꠝꠣꠞꠂꠘ, ꠝꠣꠄꠀꠞ ꠙꠥꠀꠞꠦ,
ꠝꠣꠛꠥꠖꠦ ꠅꠟꠣ ꠗꠣꠝꠇꠤ ꠖꠦꠁꠘ, ꠝꠣꠄꠀꠞ ꠀꠡꠤꠇꠞꠦ॥
ꠉꠤꠀꠘ ꠝꠥꠁꠟ꠆ꠟꠛꠣꠘ
13ꠘꠦꠇ-ꠇꠙꠣꠟꠤ ꠢꠃ ꠎꠘ, ꠎꠦ ꠙꠣꠁꠟ ꠉꠤꠀꠘ ꠗꠘ,
ꠡꠥꠛꠥꠖ꠆ꠖꠤ ꠎꠦ ꠙꠣꠄ ꠢꠦ-ꠅ ꠇꠙꠣꠟꠤ।
14ꠉꠤꠀꠘ ꠔ ꠞꠥꠙꠣ ꠕꠣꠇꠤ, ꠟꠣꠜ ꠖꠤꠛ ꠛꠃꠔ ꠛꠦꠡꠤ,
ꠡꠥꠘꠣ ꠕꠣꠇꠤꠅ ꠀꠞꠅ ꠖꠣꠝꠤ।
15ꠝꠘꠤ-ꠝꠥꠇ꠆ꠔꠣ-ꠞꠔꠘ, ꠉꠤꠀꠘ ꠛꠠ ꠖꠣꠝꠤ ꠗꠘ,
ꠔꠣꠁꠞ ꠢꠝꠣꠘ ꠇꠥꠘꠥ ꠌꠣꠅꠀꠃ ꠘꠣꠁ।
16ꠢꠣꠄꠀꠔꠤ ꠒꠣꠁꠘ ꠀꠔꠅ, ꠗꠘ-ꠝꠣꠘ ꠛꠣꠃ ꠀꠔꠅ,
ꠔꠣꠁꠞ ꠖꠥꠁ ꠀꠔꠞ ꠁꠔꠣ ꠖꠤꠔ ꠌꠣꠄ।
17ꠔꠣꠁꠞ ꠢꠇꠟ ꠙꠕꠦ, ꠈꠥꠡꠤ-ꠡꠣꠘ꠆ꠔꠤ ꠝꠤꠟꠦ,
ꠉꠤꠀꠘꠦ ꠌꠣꠟꠣꠄ ꠜꠣꠟꠣꠁꠞ ꠙꠕꠦꠖꠤ।
18ꠉꠤꠀꠘꠞꠦ ꠔ ꠗꠞꠦ ꠎꠦ, ꠞꠢꠝ-ꠛꠞꠇꠔ ꠙꠣꠄ ꠢꠦ,
ꠔꠣꠁꠃ ꠎꠤꠘ꠆ꠖꠦꠉꠤ ꠉꠣꠍ ꠔꠣꠞ ꠟꠣꠉꠤ॥
19ꠝꠣꠛꠥꠖꠦ ꠅꠃ ꠉꠤꠀꠘꠖꠤ, ꠉꠣꠠꠤꠟꠣ ꠖꠥꠘꠤꠀꠞ ꠜꠤꠔ꠆ꠔꠤ,
ꠀꠈꠟꠖꠤ ꠀꠍꠝꠣꠘ ꠛꠅꠀꠁꠟ ꠇꠞꠤꠟꠣ,
20ꠝꠣꠐꠤꠞ ꠝꠥꠞꠞ ꠙꠣꠘꠤꠞꠦ, ꠛꠣꠞ ꠇꠞꠟꠣ ꠔꠣꠘ ꠀꠈꠟꠦ,
ꠙꠠꠦ ꠚꠥꠐꠣ ꠚꠥꠐꠣ ꠀꠍꠝꠣꠘꠞ ꠈꠥꠀ॥
ꠛꠣꠚꠞ ꠘꠍꠤꠅꠔ ৪
ꠀꠞꠤ-ꠚꠞꠤꠞ ꠜꠣꠟꠣꠁ ꠇꠞꠅ
21ꠗꠞꠤꠀ ꠞꠣꠈꠅ ꠀꠝꠣꠞ ꠙꠥꠔ, ꠘꠤꠈꠥꠔ ꠛꠤꠛꠦꠇ-ꠛꠥꠖ꠆ꠖꠤꠞꠦ,
ꠔꠥꠝꠣꠞꠦ ꠍꠣꠠꠤꠀ ꠎꠣꠁꠔꠦ, ꠖꠤꠅ ꠘꠣ ꠁꠔꠣꠞꠦ।
22ꠁꠔꠣꠃ ꠅꠁꠛ ꠛꠣꠛꠣꠎꠤ, ꠔꠥꠝꠣꠞ ꠎꠣꠘꠞ ꠐꠥꠇꠞꠣ,
ꠅꠔꠣꠃ ꠅꠁꠟ ꠡꠥꠘꠣ ꠙꠥꠔ, ꠔꠥꠝꠣꠞ ꠉꠟꠣꠞ ꠝꠣꠟꠣ।
23ꠔꠦꠃ ꠔꠥꠝꠣꠞ ꠙꠕꠦ ꠌꠟꠤꠛꠣꠄ, ꠍꠢꠤ-ꠍꠣꠟꠣꠝꠔꠦ,
ꠃꠡ꠆ꠐꠣ ꠈꠣꠁꠔ ꠘꠣꠄ ꠔꠥꠝꠣꠞ ꠙꠣꠅ, ꠇꠥꠘꠥꠛꠣꠄ ꠇꠥꠘꠥꠝꠘ꠆ꠔꠦ।
24ꠔꠥꠝꠤ ꠎꠦꠛꠟꠣ ꠢꠥꠔꠤꠛꠣꠄ ꠙꠥꠔ, ꠒꠞ-ꠈꠚꠦ ꠙꠣꠁꠔ ꠘꠣꠄ,
ꠛꠤꠍꠘꠣꠔ ꠢꠥꠔꠣꠞ ꠛꠣꠖꠦ ꠔꠥꠝꠤ, ꠀꠞꠣꠝꠦ ꠊꠥꠝꠣꠁꠛꠣꠄ।
25ꠀꠈꠔꠣ ꠇꠥꠘꠥ ꠛꠤꠙꠖ ꠀꠁꠟꠦ, ꠔꠥꠝꠤ ꠘꠣ ꠒꠞꠣꠁꠅ,
ꠘꠣꠚꠞꠝꠣꠘꠞ ꠛꠤꠘꠣꠡ ꠖꠦꠈꠟꠦ, ꠇꠥꠘꠥ ꠜꠄ ꠘꠣ ꠙꠣꠁꠅ।
26ꠝꠣꠛꠥꠖꠃ ꠔ ꠅꠁꠛꠣ ꠔꠥꠝꠣꠞ, ꠘꠤꠞꠣꠙꠖ ꠀꠡꠞꠄ,
ꠚꠣꠘ꠆ꠖꠅ ꠕꠣꠇꠤ ꠔꠥꠝꠣꠞ ꠙꠣꠅꠞꠦ, ꠛꠣꠌꠣꠁꠛꠣ ꠘꠤꠌ꠆ꠌꠄ॥
27ꠎꠦꠞꠣꠞꠦ ꠜꠣꠟꠣꠁ ꠇꠞꠣ ꠎꠞꠥꠞ, ꠁꠔꠣ ꠔꠥꠝꠤ ꠇꠞꠤꠅ,
ꠜꠣꠟꠣꠁ ꠇꠞꠣꠞ ꠡꠣꠁꠖ꠆ꠖ ꠕꠣꠇꠟꠦ, ꠢꠞꠤꠀ ꠘꠣ ꠞꠁꠅ।
28ꠡꠣꠁꠎ꠆ꠎ ꠇꠞꠣꠞ ꠈꠦꠝꠔꠣ ꠎꠥꠖꠤ, ꠕꠣꠇꠦ ꠔꠥꠝꠣꠞ ꠀꠔꠅ,
ꠀꠞꠤ-ꠚꠞꠤꠞꠦ ꠇꠁꠅ ꠘꠣ “ꠎꠣꠅ, ꠛꠣꠖꠦ ꠛꠣ ꠇꠣꠁꠟ ꠀꠁꠅ।”
29ꠔꠥꠝꠣꠞ ꠀꠞꠤ-ꠚꠞꠤꠞ ꠛꠤꠞꠥꠖ꠆ꠖꠦ, ꠇꠞꠤꠅ ꠘꠣ ꠇꠥ-ꠝꠔꠟꠛ,
ꠢꠦ ꠎꠦꠛꠟꠣ ꠔꠥꠝꠣꠞ ꠜꠞꠡꠣꠄ, ꠞꠁꠔ ꠌꠣꠄ ꠘꠤꠞꠣꠙꠖ।
30ꠛꠤꠘꠣ ꠇꠣꠞꠘꠦ ꠝꠣꠘꠡꠞ ꠟꠉꠦ, ꠇꠣꠁꠎ꠆ꠎꠣ ꠇꠞꠤꠅ ꠘꠣ,
ꠔꠥꠝꠣꠞ ꠈꠦꠔꠤ ꠘꠣ ꠇꠞꠟꠦ ꠇꠦꠃ, ꠖꠥꠡꠝꠘꠤ ꠇꠞꠤꠅ ꠘꠣ।
31ꠎꠥꠟꠥꠝꠛꠣꠎꠞ ꠗꠘꠞ ꠃꠙꠞꠦ, ꠟꠣꠟꠌ ꠇꠞꠤꠅ ꠘꠣ,
ꠢꠦ ꠎꠦꠔꠣ ꠙꠕꠦꠖꠤ ꠎꠣꠄ, ꠅꠛꠣꠄꠖꠤ ꠎꠣꠁꠅ ꠘꠣ।
32ꠔꠦꠠꠣ ꠙꠕꠤ ꠌꠣꠟꠣꠇ ꠎꠘꠞꠦ, ꠝꠣꠛꠥꠖꠦ ꠔ ꠊꠤꠘ꠆ꠘꠣꠁꠘ,
ꠅꠁꠟꠦ ꠢꠇ ꠝꠣꠘꠡꠞꠦ ꠔꠣꠁꠘ, ꠘꠤꠎꠞ ꠖꠤꠖꠣꠞ ꠖꠤꠟꠣꠁꠘ।
33ꠘꠣꠚꠞꠝꠣꠘꠞ ꠊꠞꠞ ꠃꠙꠞꠦ, ꠝꠣꠛꠥꠖꠞ ꠟꠣꠘ꠆ꠘꠔ,
ꠙꠞꠦꠎꠉꠣꠞꠞ ꠊꠞꠞ ꠝꠣꠎꠦ, ꠞꠢꠝ ꠀꠞ ꠛꠞꠇꠔ।
34ꠑꠣꠐ꠆ꠐꠣ-ꠝꠡꠇꠞꠣ ꠇꠞꠞꠣꠞꠦ, ꠔꠣꠁꠘꠅ ꠇꠞꠂꠘ ꠑꠣꠐ꠆ꠐꠣ,
ꠅꠁꠟꠦ ꠘꠞꠝ ꠖꠤꠟꠞ ꠝꠣꠘꠡꠞꠦ, ꠔꠣꠁꠘ ꠇꠞꠂꠘ ꠖꠄꠀ।
35ꠉꠤꠀꠘꠤ ꠅꠇꠟꠦ ꠙꠣꠁꠛꠣ ꠘꠤꠌ꠆ꠌꠄ, ꠡꠝ꠆ꠝꠣꠘ ꠀꠞ ꠁꠎ꠆ꠎꠔ,
ꠅꠁꠟꠦ ꠀꠝ꠆ꠝꠇꠞ ꠙꠣꠅꠘꠣ ꠅꠁꠟ, ꠡꠞꠝꠤꠘ꠆ꠖꠣ-ꠛꠦꠁꠎ꠆ꠎꠔ॥
© Ahle Kitab Society. All rights reserved.