Aisea 30
30
Sa Vinariva Egoi Loke Laena koari pa Izipi
1Zama vura guahe se Zihova,
“Madi talotaṉa sari koburu tasunadi,
koa rini pu tavete vurani sari dia binalabala pu lopu Taqarau,
pu tavete vinariva egoi sapu lopu goto pa Maqomaqoqu,
meke vari tomotomoe ni sari dia sinea;
2pu gore la pa Izipi
meke lopu nanasa nia rini sa Qua hiniva;
pu hata tinokae koe Pero pude lavelave ni,
la aqorae koe Izipi pude ta tokae.
3Ba sa lave te Pero si na kinurekure tamugamu,
sa aqoro te Izipi si na vina goremia gamu.
4Ele la koa dia pa Zoani sari mia palabatu paleke inavoso
meke tiqe hogoto la pa Hanesi si keke puku tie vivinei tamugamu,
5ba doduru tie Ziuda si kote tava kurekure beto
sina loke laedi sari na tie Izipi koa gamu
loketoṉa si kote paleke mae nia rini pude tokani gamu.
Ke kote tava kurekure meke va gore puleni gamu si gamu.”
6Hie sa kinorokorotae te Tamasa pa guguadi rina kurukuru ṉame pa Neqevi:#30:6 Sa Neqevi si pa vari korapana sa soloso qega meke sa popoa toqetoqere pa Ziuda.
“Ene nuquru gua pa popoa tasunana meke koa ia tinasuna,
siṉi ia na laione,
vasina koa ia soku votivotiki noki variva mate,
si keke puku tie, paleke tinagotago pa mudi doṉ'ki,
dia tinagotago vinariponi si pa podu mudidi rina kameli,
la koasa butubutu sapu lopu kote ta tokae nia rini,
7la pa Izipi, sapu loke laena sa nana tinokae.
Gua ke poza nia,
‘Rehabi Udapelu’ Arau si asa.
Na Tinoni Seke Tinarae
8Mu la, mamu kubere goreni sari zinama hire,
gasi goreni pa pepa ta viqusuna,
pude koari na rane pu korapa mae
si kote na vina sosode loke vina betona si asa.
9Hire sari tie lopu luli zinamadi, na koburu sekesekeidi,
koburu sapu korodia va avoso la koari na vina turu te Zihova.
10Zama i arini sari na tie dodogorae,
‘Mi lopu dodogoro pule!’
meke koari na poropita si,
‘Mi lopu mae totoli va toṉoto puleni gami!
Tozini gami mo sari tiṉitoṉa leanadi,
mi tozini gami mo sari sinekesekei gua pu hiva avosi gami.
11Rizu taloa,
vura taloa koasa siraṉa hie,
meke lopu mae zama nia koa gami
si Asa sapu Hopena pa Izireli!.’ ”
12Gua asa ke, hie si zama nia sa Tamasa Hopena pa Izireli:
“Sina kilua gamu sa inavoso hie,
meke na ṉinovaṉovala si kalavarae ia gamu,
na kinohakoha si ronua gamu,
13ke sa sinea hie
si kote guana goba ululuna, sapu viqala meke potele,
meke ilasa gore va hodaka, pa totoso hite mo.
14Kote poraka umumu guana raro patu,
sapu ta inete lopu ta tatarue hokara,
meke sari na videvidena si lopu noma
pude boka paleke ni motete pa nika
babe pude siovo ni kolo pa berukehe.”
15Ke hie si zama nia sa Baṉara Zihova, sa Tamasa Hopena pa Izireli:
“Pana kekere pule mae mo gamu koa Rau, meke magogoso koa Rau si kote ta harupu si gamu,
sa mia ṉiniraṉira si pa kinoa noso mo meke pa rinaṉeraṉe,
ba lopu hiva tagoi gamu si arini.
16Zama si gamu, ‘Lokari, kote koi mami pa hose meke govete mami.’
Ke kote govete mia tu!
Zama si gamu, ‘Kote koi taloa mami pa hose reregedi.’
Ba sari tie hadu luli si kote rerege hola la tu!
17Keke tina si kote govete
sapu keke tie mo hadu i;
pana ka lima tie hadu gamu
si kote doduru mo si govete,
osolae sapu koa hola koa gamu si
guana keke pitipiti pa batu toqere,
guana poko koa ia kubekubere pa toqere.”
18Gua ba okoro sisigiti nia e Zihova pude vata dogoro nia sa Nana tataru koa gamu;
ke gasa turu si Asa pude va dogoro ni gamu sa Nana tataru variva tukana.
Ura se Zihova si na Tamasa vilavilasa pa tinoṉoto.
Tamanae sari doduru pu koa aqa koa Sa!
Kaqu Mana ni Tamasa sari Nana Tinoni
19Gamu na tiena sa popoa Zaione, pu koa pa Zerusalema, kote noso kabo si gamu. Na kote tataru hola si Asa pana kabo hata tinokae si gamu! Pana avoso gamu Sa si kote olaṉa mo si Asa. 20Na bereti tinasuna tugo si vatu nia e Zihova meke na kolo tinasigiti, gua ba kamahire si lopu kote ta tome sari na mia tie va tumatumae; kote dogoroni mata mia soti gamu si arini.
21Be taliri la si gamu pa kali matao babe pa kali gede ba sari taliṉa mia si kote avosia mo si keke mamalaiṉi pa mudimia sapu zama guahe, “Hie tu sa siraṉa; mae ene gua tani.”
22Totoso asa si kote huara pani gamu sari na mia beku sapu ta pokoe siliva meke sari mia kineha ta peqodi sapu ta pokoe qolo; kote gona pani gamu, guana oki palae poko variva malederedi, meke kote zama, “Taloa koa rau!”
23Kote garunu poni gamu ruku Sa pude tadi na kiko pu letei gamu pa pepeso, meke sari ginani pu vura pa pepeso si kote tolavaedi meke soku. Koasa rane asa si kote nomana sa pavasa duduli tadi na bulumakao. 24Sari na bulumakao meke na doṉ'ki pu geli pepeso pa inuma si kote hena va leana duduli sapu tava tanadi va leana. 25Koasa rane sapu tava mate sari na mia kana, totoso ta huara gore sari dia vetu hakehakei ululudi, si kote totolo gore sari na kolo koari doduru toa na doduru toqere ululudi. 26Sa sidara si kote keana guana rimata, meke sa rimata si kote zuapa totoso bakala, gua tugo sa kalalasadi ka zuapa rane dodurudi. Hie si kote evaṉa totoso pusi e Zihova sari bakora tadi Nana tinoni, meke salaṉi Sa sari dia tinasigiti.
Kaqu Va Kilasia Tamasa sa Popoa Asiria
27Doṉo la, sa pozana e Zihova si mae gua pa seu,
turaṉae tinaṉaziri maṉinina meke moatana sa tuṉaha korapa sage;
sari beruna si siṉi na binugoro,
meke sa meana si na nika halalana.
28Sa siniṉo Tanisa si guana naqe sapu ṉiṉira sigiti gorena,
meke odu sage kamo pa rua.
Niu i Sa sari na butubutu meke vizata vagi Sa sarini pu kote tava kilasa;
va soto ni Sa pa ṉuzudi rina tie
sari iku meke turaṉa taloa ni la pa tina huara.
29Meke kote kera si gamu
gua koasa boṉi sapu qetuqetu nia gamu si keke inevaṉa hopena;
kote qetu sari bulomia
gua totoso ivivu meke sage sari na tie
la koasa toqere te Zihova,
koasa Patu heheda te Izireli.
30E Zihova kote va avosoni koari na tie sa Nana mamalaiṉi pa paka maṉauru,
meke kote va dogoro ni Sa sa sekena sa Limana
turaṉae tinaṉaziri meke na nika halalana,
turaṉae na paka maṉauru, na lovua meke na ruku kokoreo.
31Sa mamalaiṉi te Zihova kote va matagutu ia sa popoa Asiria;
koasa Nana kolu binaṉara kote seke goreni Sa.
32Pana ta seke va bakora sari pa Asiria
koasa Nana kolu vari kilasi
si kote peka sari Nana tinoni koari na dia tabarini meke na mike,
totoso raza i Sa meke seke ni Limana Sa.
33Pukerane si ele tava nama sa vasina, sapu halala ia na nika,
pude sulu ia sa baṉara tadi pa Asiria;
sa pou sapu koa ia nika si labe meke lohi,
na katu va leana hola sina soku sa hudana;
sa siniṉo te Zihova,
sapu guana zoloro gorena sa patu lera pa nai,
kote va huruṉuna.
Currently Selected:
Aisea 30: ROV
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
