Aisea 26
26
Na Kinera Vina Lavata
1Koasa rane asa si kote kera nia ari pa Ziuda sa kinera hie:
Gami si ṉiṉirana mami vasileana nomana;
sa tinaharupu te Tamasa asa si na gobana sa.
2Mi tukeli sari sasadana sa goba
pude nuquru sa butubutu toṉotona,
sa butubutu sapu soto va nabu pa rinaṉeraṉe.
3Kote kopu nia Goi pa binule ṉoṉona
si asa sapu nabu nana binalabala koa Goi,
sina raṉe Igo sa si Agoi Zihova.
4Mi raṉea se Zihova ninae rane,
ura e Zihova sa Patu toa holana.
5Va pepekae i Sa sarini pu va ululae,
va eko gore ia Sa sa vasileana nomana sapu va sage pule nia;
va gore la nia Sa koasa pepeso
meke va kamo la nia pa kavuru.
6Ta neti gore si asa;
pa nenedia ri na tie ta ṉoṉovaladi meke na tie malaṉadi.
7Sa siraṉa tadi na tie toṉoto si memehe;
Agoi pu toṉotomu, Agoi tavetia sa inene tanisa tie toṉoto pude bule nodolo.
8Uve, Zihova, gami si ene pa siraṉa tanisa Mua tinarae,
meke koa aqa koa Goi;
sa Pozamu ta avosaena
si sa inokoro pa bulo mami.
9Sa buloqu si ehaka Nigo pana boṉi;
pana munumunu si aqa Nigo sa maqomaqoqu si Agoi.
Totoso mae pitua Goi sa popoa pepeso,
si tiqe tumae nia ri tie pa kasia popoa sa tinoṉoto.
10Vea ta tatarue koa Goi sari tie kaleadi,
ba lopu kaqu tumae nia rini sa tinoṉoto;
ura pa popoa tadi tie toṉoto ba tavete va kaleana lamo sari kasa,
meke korodia gilanigo rini si Agoi Zihova sa Baṉara Tolavaemu.
11Zihova, sa Limamu si ta ovulu sage pude seke,
ba lopu hite dogoria rini.#Hib 10:27
Mu va dogoro ni sa tataru Tamugoi koari Mua tinoni
pude va kurekure i;
Mu va sulu i koasa nika pu va nama nia Agoi pude tadi Mua kana.
12Zihova, Agoi tavete poni gami sa binule;
doduru pu vata evaṉi gami si Agoi tavete poni gami.
13Zihova, mami Tamasa, ari kaiqa tie baṉarani gami si gami
ba sa Pozamu mo si va lavatia gami.
14Kamahire si ele mate si arini, na lopu kaqu toa pule;
sari maqomaqodi sapu ele taloa si lopu kaqu pule mae.
Agoi raza i meke va kilasi,
meke va murimuri pani Goi sari doduru binalabaladi.
15Zihova, Agoi ele va toqolia sa butubutu;
Agoi ele va toqolia sa binaṉara.
Sa vina lavata si ele vagia Goi telemu;
Agoi hoda ia sa volosona sa pepeso pa doduru vari kalina.
16Zihova, mae si arini koa Goi pa dia tinalotaṉa;
totoso va kilasi Agoi si arini
si varavara atu si arini pa korapana sa dia tinasigiti.
17Kei Zihova, guana barikaleqe aritiana sapu nama pude vagi koburu,
sapu kabo vura pa nana tinasigiti,
si gua asa si gami pa kenumu Goi.
18Gami si aritiamami, gami si ta sigiti meke hani lamae,
ba na givusu mo si podo vura nia gami.
Lopu hite paleke mae nia gami sa tinaharupu pa popoa pepeso;
lopu hite va podo tie si gami koasa kasia popoa.
19Ba sari na Mua tie pu mate si kote toa pule;#Dan 12:2
sari tinidia si kote tekulu sage pule.
Gamu pu koa koasa kavuru pa lovu,
mu vaṉunu, mamu kukili qetuqetu.
Sa Mua puni kote va masiqara ia sa popoa pepeso;
meke kote va toa pulei Agoi sarini pu ele mate.
Vinaripitui meke Va Vaqura Pulea sa Tinoa
20Mi nuquru la pa mia lose, gamu na qua tinoni,
mamu rotoi sari mia sasada!
Mi tome pule ni gamu pa totoso hite mo
osolae hola sa tinaṉaziri te Zihova.
21Doṉo la, se Zihova si vura pa Nana vasina pa Maṉauru
pude mae va kilasi sari na tie pa popoa pepeso koari na dia sinea.
Sa popoa pepeso, si kaqu vata gilana vurani saripu tava mate;
kote vata gilana nia sa ehara sapu ele zoloro pa pepeso.
Currently Selected:
Aisea 26: ROV
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
