Terethiinit 22
22
Hidioo cĩ rũgẽtõ
1Ma ho, eteretheeha aajĩlõ hidioo umwa ꞌcĩ ariha maama dtaabawaa ꞌcĩ aayyi Nyekuci hĩ Mĩꞌnyõõn. Lĩĩl ꞌcĩ attalĩth maama nẽ ĩĩtõ tẽllĩg thõng. Ĩĩn maama tĩko maam ꞌcĩg aaꞌnyeet rũgẽt. 2Ariha hidiaa nicciee hõrggẽẽnaa cĩ ꞌtaaũnõõ nẽ ũnũ ꞌgõõl cobbi cĩ ꞌtaaũn nicci. Dẽmẽtwaanĩĩ cĩg hidioo nicci, aaĩ hẽẽt cĩ rũgẽtõõ, ꞌcĩ õddõngõt nyĩlõhẽẽnnĩ vẽlẽk. Õddõngta hẽẽt nicciee hẽẽn ꞌcĩg abbiiri õmmõtõ hĩ ꞌramma nẽ bõllõõha cĩgĩnnĩg buúk ĩĩn ẽgẽrnaac ꞌcĩ ahũd eeta loonyini vẽlẽk hũbũttaathõ ũdũt, hátĩ hiittiõõ mõõrĩthĩ tõõ. 3Aitiõõ hatĩ ꞌcĩĩnẽnĩtĩ hõllõngaa aaꞌnyĩk ꞌgiimwa ꞌcĩ abathĩ, haggam eet cĩg ꞌtaaũn nicci. Aalla hatĩ Nyekuci dtaabawaa nĩĩcĩ hĩ Mĩꞌnyõõn buúk nẽ iita eeta vẽlẽk ꞌtaaũnaa nĩĩcĩ, idticattoothĩk ĩnõõnnõ. 4Au hatĩ acĩnõõ eeta hĩ Nyekuc muumtini nẽ hatĩ eteheeddi ꞌthaara cĩgĩnnĩg muumtinii cĩggĩĩng. 5Iittiõõ hatĩ hõllõngaa adiim eeta kõr, hode ꞌgiimwa ꞌcĩ attũllẽẽnĩ, hĩnĩngĩtĩ iittiõõ hatĩ baalini tõõ. Makayyioohit Nyekuc dioo ꞌcĩ hatĩ ikia ĩĩ lanyit cĩnĩĩng nẽ hatĩ ĩĩtõ nẽẽg makayyiook hĩ Nyekuc ooo.
6Nĩngĩtĩ anneeka aajĩlõ nẽẽ, “Ẽbẽan thooꞌthioha ꞌcĩg haduhaakii naa ho nẽ ĩĩn dĩdĩ nẽ aitiõõ ẽẽtĩ ꞌcĩ abũrĩ tõõ, Makayyioohit Nyekuc cĩ loriẽẽt cĩg põrõvẽtaaꞌnyanu diooni ꞌcĩ ĩꞌthõ aajĩlẽẽt cĩgĩnnĩg huduktaak dticcianniook cĩgĩnnĩg thooꞌthiok ꞌcĩg hatĩ au irkiꞌnyiaannĩ hĩdĩĩkoothong.”
Õbõda hatĩ Yeesu hĩdĩĩkoothong
7“Ĩcĩnĩt nõõnĩ! Haini naa hakuu hatĩ hĩdĩĩkoothong! Aggatan hatĩ Nyekuci eet ꞌcĩg athĩhĩ nẽ uꞌthuutti thõõth ꞌcĩ aduha ꞌbuuhi ciee ho!”
8Baa nganĩĩt Yõaannẽ ꞌcĩ hathihi nẽ hĩcĩna thooꞌthiok iccig. Ma baa hĩthĩha nẽ hĩcĩna thooꞌthiok iccig, hakata huruꞌnyia nẽ halaõ muumaa cĩ aajĩlõ ꞌcĩ aku eterꞌtheeka thooꞌthiok iccig ko. 9Anneeka hinnia nẽẽ, “Ma halayyaa nganĩĩta, laa Nyekuc, hĩĩnĩ naa dticciannioohit cĩ Nyekuci haaga hĩ nii buúk nẽ hĩĩnĩ dticciannioohit hĩ ꞌgotoonogu põrõvẽtaaꞌnya cĩgĩnnẽẽgĩ, hĩ eet vẽlẽk ꞌcĩg athĩhĩ nẽ elemit thõõth ꞌcĩ eheeddi ꞌbuuhaa cĩ ho.”
10Nẽ uduhaaha tarĩ ĩnnĩhaa, “Ma hammiꞌthẽẽnĩ thooꞌthiok ꞌcĩg aduha ꞌbuuhi cieeni, hĩnĩngĩtĩ edeeꞌnyia hatĩ hẽlẽggĩ cieeg vẽlẽk hĩdĩĩkoothong. 11Ẽẽtĩ ꞌcĩ adĩman thooꞌthiok ꞌcĩg abathĩ, aꞌnyĩĩk haala hĩdĩman thooꞌthiok ꞌcĩg abathĩ noho nẽ ẽẽtĩ ꞌcĩ ara ꞌthẽccan, aꞌnyĩĩk hara ꞌthẽccan. Nẽ ẽẽtĩ ꞌcĩ adtican thooꞌthiok ꞌcĩg abũnnaa, aꞌnyĩĩk haala hĩdĩman thooꞌthiok ꞌcĩg abũnnaa nẽ aꞌnyĩĩk eet ꞌcĩ ẽllẽẽmĩth haala hẽllẽẽm ũdũt.”
12“Cĩĩn nõõnĩ, hakuu naa hĩdĩĩkoothong! Hakuu hatĩ hadũmani eet vẽlẽk hĩ baa adtican nẽẽg thooꞌthiok ꞌcĩg abũnnaa. 13Nganĩĩt ꞌcĩ huwwatta nẽ Nganĩĩt cĩ hadtuurna, Nganĩĩt ꞌcĩ hiꞌthianaanĩ hẽlẽggĩ vẽlẽk nẽ Nganĩĩt ꞌcĩ hẽdẽcaahi hẽlẽggĩ vẽlẽk.”
14“Aꞌnyĩĩk haggatan Nyekuci eet vẽlẽk ꞌcĩg ũũny ceremwa cĩggĩĩng biyyiẽẽtĩĩ cĩg Yeesu.#22:14 Eet vẽlẽk ꞌcĩg ũũny ceremwa cĩggĩĩng biyyiẽẽtĩĩ cĩg Yeesu: Occa aduhun eeta ꞌcĩg ũtũũnyĩtõ ceremwa cĩggĩĩng biyyiẽẽtĩ cĩg Yeesu ꞌcĩ ammaannĩk ꞌthẽccanẽẽt cĩggĩĩng, ꞌJeruꞌthalẽm ꞌcĩ ĩĩn ngeju. Aanytĩk biyyieeta cĩg Yeesu ceremwa cĩggĩĩng hĩĩtõ õõrĩg nẽ ĩĩ tẽllĩg. Tigiil ꞌBuuk cĩ Terethiitto 7:14. Ẽlẽmaakĩ hatĩ nẽẽ ĩhõõggõ huduhunit hattũũgẽt cĩg ꞌtaaũn cobbi nẽ aaꞌnyĩk huduhit hẽẽt ꞌcĩ abbiiri cĩ rũgẽt ꞌcĩ aalla ooo. 15Ma battaala ꞌtaaũna, baa aattĩg eeta ꞌcĩg aattĩg hĩ ũthũrẽẽta ꞌcĩg adĩman thooꞌthiok ꞌcĩg ĩĩn ꞌriiring, hĩ buuyyiak hĩ ngarĩta hĩ eet ꞌcĩg adtican thooꞌthiok ꞌcĩg ĩĩn ꞌriiring, ꞌcĩg ooginni hĩ ngaaĩ ꞌcĩg eetuk tahatak, hĩ eet ꞌcĩg aruk ꞌgõõnõgĩ, hĩ ꞌcĩg ala hẽlẽggĩ ꞌcĩg aar eeta hĩĩtõ nyekuꞌnya, hĩ eet ꞌcĩg accamana ngaatĩ õthõõthĩ õlõng ooo haaga nẽ otongomit ꞌgõõnõgĩ.
16“Nganĩĩt Yeesu! Nẽ nganĩĩt ꞌcĩ hĩꞌthõõakii nganiit aajĩlõ caannĩ ho, hikia huduhaahi thooꞌthiok iccig, hátĩ hĩthĩhĩt lothippiꞌnya cĩg lemmioohu vẽlẽk. Hĩĩnĩ naa habuccieet cĩ hattũũg cĩ õlõ cĩ Daavide. Nẽ Hĩĩnĩ coobooc gõõng aara ngerrenita.”
17Nẽ othoothito Lorii ꞌcĩ Ẽllẽẽmĩth hĩ lothippit cĩ lemmioohu ĩĩtõ, “Ijjia!” Aꞌnyĩĩk eet ꞌcĩ athĩhĩ thõõth icci hĩĩ, “Ijjia!” Má atab ẽẽtĩ umwaa maam ꞌcĩg ahũdĩ, aꞌnyĩĩk hũhũd maam ꞌcĩg rũgẽt ꞌcĩ aalla ooo.
18Nẽ naa Yõaannẽ, hiloottuung ngagiit vẽlẽk ꞌcĩg athiknu ꞌrioon cĩ ꞌbuuk icci ho. Má ĩttoorĩk ẽẽtĩ umwaa thõõth umwa cĩnnĩ, uuk hatĩ Nyekuci ĩnõõnnõ ꞌtheretwaanĩĩ ꞌcĩg abathĩ gẽrrẽẽt eheeddi ꞌbuuhatõõ cĩ ho. 19Nẽ má udhuheek ẽẽtĩ thõõth umwa tuu, hõllõngaa hatĩ ẽlẽmaakĩ Nyekuci eet tĩho, huduk hẽẽt ꞌcĩ abbiiri ꞌcĩ aaꞌnyĩk rũgẽt ꞌcĩ aalla ooo ho nẽ ẽdẽnẽẽkĩ hatĩ nẽẽ ĩnõõnnõ ngaatĩ adukni ꞌtaaũn cĩnnĩ ꞌcĩ ẽllẽẽmĩth adukiaa ꞌbuuhaa cĩ ho.
20Nẽ ẽẽtĩ ꞌcĩ ĩĩn hebereec cĩ thooꞌthiok iccig vẽlẽk aĩ, “Eei, hakuu naa hĩdĩĩkoothong!”
Aamẽn! Ijjia Makayyioohit Yeesu!
21Aꞌnyĩĩk bũnnai cĩ Makayyioohit Yeesu haau hĩ eet ꞌcĩg ẽllẽẽmĩth cĩg Nyekuci.
Currently Selected:
Terethiinit 22: did
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.