Terethiinit 21
21
ꞌJeruꞌthalẽm ꞌcĩ ĩĩn ngeju
1Ma ngaati, hudtuuha hẽẽtkujjieen ꞌcĩ ĩĩn ngeju hĩ looc ꞌcĩ ĩĩn ngeju buúk, hĩnĩngĩtĩ baa iꞌngittõõthĩ hẽẽtkujjieen hĩ looc baag ũnũũhĩtõ. Nẽ iꞌnginõõthĩ bũlũc buúk. 2Ma ho, hudtuuha ꞌtaaũn ꞌcĩ ẽllẽẽmĩth, ꞌJeruꞌthalẽm ꞌcĩ ĩĩn ngeju, ngaatĩ alluuccianĩ hĩ Nyekuc hẽẽtahujjieen, haau hĩ bũhẽẽcĩ ꞌcĩ ahimti hẽllẽẽm ꞌcĩ aꞌngiddiaak maac.
3Nẽ hĩthĩha molook ꞌcĩ ẽggẽrꞌnya dtaabawaa cĩ Nyekuci aĩ, “Nẽ ꞌyioko ĩꞌthõng ũdũt, ikia õlõ cĩ Nyekuci ũrũmtĩ hĩ eet cĩgĩnnĩg. Ĩĩn hatĩ eeta, eet cĩgĩnnĩg nẽ ĩĩ Nyekuci, Nyekuc cĩnĩĩng. Nẽ dĩdĩ aarĩk hatĩ Nyekuci õlõ cĩnnĩ hõrggẽẽnaa cĩ eet cĩgĩnnĩg. 4Attũmũny hatĩ Nyekuci tilaalõ vẽlẽk hẽbẽrẽẽnnĩĩ cĩggĩĩng. Nẽ hatĩ iittiõõ ẽẽtĩ ꞌcĩ nga ommoꞌthi, hode accananni hode alu hode adaahĩ tarĩ tõõ, hĩnĩngĩtĩ iꞌngittõõthĩ hẽlẽggĩ cieeg baag oou ho vẽlẽk ũdũt.”
5Ma ho, ikia õthõõthahaa Nyekuci ꞌcĩ iccioloongan dtaabawa ho ĩnnĩhaa, “Haaꞌnyihi hatĩ naa hẽlẽggĩ vẽlẽk hĩĩtõ ngeju!” Nẽ tarĩ, õthõõthahaa ĩnnĩhaa, “Tẽhẽẽd thõõth ꞌcĩ haduhaakii naa ho loota, hĩnĩngĩtĩ haduhaakii thõõth ꞌcĩ ĩĩn dĩdĩ, ꞌcĩ occa elemi niina.” 6Nẽ õthõõthahaa tarĩ ĩnnĩhaa, “Edeccia dtiici! Iꞌthianaanĩ hẽlẽggĩ vẽlẽk hĩ nganĩĩta nẽ adtuurnik hĩ nganĩĩta. Haaꞌnyihi hatĩ naa eet ꞌcĩ aam kõrra hũhũd maam cĩg rũgẽt ꞌcĩ aalla ooo, hõllõngaa ũũta thõng buúk. 7Aggatanni hatĩ eeta vẽlẽk ꞌcĩg ẽmmẽẽthĩ ꞌcannan nicci nẽ hĩĩnĩ hatĩ naa Nyekuc cĩnĩĩng nẽ ĩĩtõ nẽẽg eet cĩgannĩg. 8Haduhaakii hatĩ naa ꞌgii ꞌcĩ edeeꞌnyiak eet ꞌcĩg ĩĩn teelliak hĩ eet ꞌcĩg hõllõngaa ẽlẽmĩ thõõth caannĩ hĩ ꞌthẽccanniook hĩ eet ꞌcĩg aruk ꞌgõõnõgĩ hĩ eet ꞌcĩg adĩman thooꞌthiok ꞌcĩg ĩĩn ꞌriiring, hĩ ꞌcĩg adtican thooꞌthiok cĩg ngaritu hĩ eet ꞌcĩg ala hẽlẽggĩ ꞌcĩg aar eeta hĩĩtõ nyekuꞌnya hĩ oloꞌngiaak vẽlẽk. Adhuhoothĩk hatĩ nẽẽg ꞌgelemit cĩ ꞌgwoo ꞌcĩ aalla ooo. Nẽẽthĩ, ĩĩn niccia daahĩth ꞌcĩ ĩĩn ꞌramma.”
9Ma nĩngaata, ikia aajĩlõ umwaa ꞌgoonoginnii ĩbaag ĩĩn tũkĩramma, baag aꞌnyak lohilihilit ꞌcĩg abbĩꞌthĩĩ ꞌthereeni ꞌcĩg abathĩ gẽrrẽẽt nẽ ĩnnĩhaa, “Ijjia da ngaati! Hadiimi heterꞌtheekii ngaa cĩ nyattaraanõ ꞌcĩ hatĩ ĩĩn ngaa cĩ Mĩꞌnyoono.” 10Ma ho, ũũka aajĩlõ nicciee Loriiaa ꞌcĩ Ẽllẽẽmĩth, ĩꞌthõng muur umwa ꞌcĩ uuni gẽrrẽẽt nẽ ũũk eteretheeha ꞌtaaũn cobbi ꞌcĩ ẽllẽẽmĩth cĩ ꞌJeruꞌthalẽmĩ, ꞌcĩ alluuccia õlõõ cĩ Nyekuci hẽẽtahujjieen aku loota. 11Baa attũhũl bulẽẽnĩtĩ cĩ Nyekuci ꞌtaaũn. Baa alanyĩt ꞌtaaũnĩ haau hĩ bẽẽ ꞌcĩ ẽllẽẽmĩth ꞌcĩ haĩ ꞌJatheper nẽ attaal haau hĩ gĩlaathĩ. 12Baa maka dilat cĩ araanõ nẽ ĩĩ uun nẽ aarrihoothĩk hattũũgẽta õmmõtõ hĩ ꞌramma, ꞌcĩg obbitẽẽgĩ ꞌcĩg ẽbẽk aajĩlẽẽta õmmõtõ hĩ ꞌramma buúk. Nẽ baa eheeddi ꞌthaarrioha cĩg habuccieeꞌnya cĩg Ĩꞌthĩraẽlĩ ꞌcĩg ĩĩn õmmõtõ hĩ ꞌramma hattũũgẽtĩĩ nĩĩcĩg vẽlẽk hõdẽĩ hõdẽĩ. 13Baa eꞌngerri hattũũgẽta cieeg hoti, aarĩhoothĩk iyyio ĩĩcĩ uruto nẽ aarrihoothĩk iyyio ĩĩcĩ õkõlõõthĩkĩ kõrra nẽ aarrihoothĩk iyyio ĩĩcĩ hujjieen nẽ iyyio ĩĩcĩ holooc. 14Baa ẽhẽnytĩ dilat cĩ araanõ biyyiẽẽnĩĩ ꞌcĩg ĩĩn õmmõtõ hĩ ꞌramma. Nẽ baa eheedothoothĩk ꞌthaara cĩg ꞌthooyyiak cĩg Mĩꞌnyõõnak biyyiẽẽnĩĩ cĩg hõdẽĩ hõdẽĩ.
15Baa aꞌnyak aajĩlõ ꞌcĩ othoothĩkaa ho ꞌgiimwa ꞌcĩ ĩĩn ꞌdaab ꞌcĩ attĩmanĩ ꞌtaaũn nicci hĩ hattũũgẽt hĩ dilat cĩ araanõ buúk. 16Baa ẽhẽnytaa ꞌtaaũnĩ nicciee haꞌnyak dhooriꞌnya ꞌwec ꞌcĩg aduhõõ thõng, ma baa attĩmanni ho, ammuddiaa hinnia dhooriꞌnya cieeg vẽlẽk hõdẽĩ hõdẽĩ aꞌnyak maaĩlꞌnya#21:16 Maaĩlꞌnya: Occa õvvõ ẽẽtĩ maaĩlꞌnya iyyio ꞌthaa hõdẽĩ. ꞌcĩg uuttethaak dioo, aalib hõdẽĩ hĩ ꞌmiiaꞌnya ꞌwec (1,400) nẽ ma appiimanni hẽẽtkujjieen cĩ ꞌtaaũnõõ buúk, baa aduhõõ thõng. 17Ma baa appiimanni dilat cĩ araanõ ho, ammuddiaa hinnia dtikiri cĩ dilaatõ dioo ĩĩn mĩĩtĩrꞌnya hẽẽn tõrkõnõn hĩ ꞌtur. Baa appiimaniini aajĩlõ hẽẽt ꞌthẽk ꞌcĩ aaĩ hĩ gõõng hattĩmanaanĩ naag ꞌcieeth ꞌcĩ attĩmanniaa ꞌthõõnĩ.
18Baa ẽhẽnytaa dilat cĩ araanõ, biyyiẽẽnĩĩ ꞌcĩg attalĩth haĩ ꞌJatheper nẽ ẽtẽhẽnyĩ ꞌtaaũnĩ ꞌdaaba hattaal haau hĩ gĩlaathĩ. 19Nẽ baa ẽhẽnytaa uruto cĩ dilat cĩ araan nicci loota biyyiẽẽnĩĩ ꞌcĩg attalĩth cũũmõ cũũmõ, ĩcĩg ĩĩn õmmõtõ hĩ ꞌramma nẽ ũkũmanĩ biyyiẽẽnĩĩ ꞌcĩg ẽllẽẽmĩth gẽrrẽẽt. Baa haĩ bẽẽ ꞌcĩ oou ꞌJatheper nẽ hĩĩtõ bẽẽ ꞌcĩ ĩĩn ꞌramma thavire nẽ hĩĩtõ ꞌcĩ ĩĩn iyyio calcedoonia nẽ hĩĩtõ ꞌcĩ ĩĩn ꞌwec ẽmẽral, 20nẽ hĩĩtõ ꞌcĩ ĩĩn ꞌtur thardonik nẽ hĩĩtõ ꞌcĩ ĩĩn tõrkõnõn karnelia nẽ hĩĩtõ ꞌcĩ ĩĩn tũkĩramma kiriꞌtholait nẽ hĩĩtõ ꞌcĩ ĩĩn turkiyyio beril nẽ hĩĩtõ ꞌcĩ ĩĩn tũrkũwwec tõpath nẽ hĩĩtõ ꞌcĩ ĩĩn õmmõtõ kirithoparia nẽ hĩĩtõ ꞌcĩ ĩĩn õmmõtõ hĩ hõdẽĩ ꞌJacith nẽ hĩĩtõ ꞌcĩ ĩĩn õmmõtõ hĩ ꞌramma amethit. 21Akũmanni hattũũgẽta ꞌcĩg ĩĩn õmmõtõ hĩ ꞌramma ho, pẽalꞌnyannĩ. Nẽ arũũbĩ ꞌgõõl ꞌtaaũnatõõ ꞌdaaba hĩtĩttĩl haau hĩ gĩlaathĩ.
22Baa aitiõõ hõllõngaa hacini ꞌCieeth cĩ Nyekuci ꞌcĩ alaiini eeta, hĩnĩngĩtĩ ĩĩtõ Makayyioohiti Nyekuci ꞌTirriannioohiti ꞌcĩ ĩllõõan vẽlẽk hĩ Mĩꞌnyõõn cĩnnĩ, ꞌCieeth cĩ Nyekuci. 23Nẽ aara ꞌtaaũnĩ vẽlẽk thõng. Aitiõõ eeta hõllõngaa atab kõr hode nyĩlõk, hĩnĩngĩtĩ aara bulẽẽnĩtĩ cĩ Nyekuci ꞌtaaũn vẽlẽk nẽ Mĩꞌnyõõn ꞌcĩ ĩĩn lanyit. 24Õvvõ hatĩ eeta cĩg lootu vẽlẽk lanyitaa ꞌcĩ aara ho nẽ au hatĩ habuẽẽta cĩg lootu vẽlẽk, aꞌnyaha baliinit cĩnĩĩng nĩngaata. 25Nẽ ꞌtaaũna nĩĩcĩ, aitiõõ hattũũgẽta hõllõngaa aꞌnyũũgĩ waath hode baal, hĩnĩngĩtĩ aitiõõ baalini tõõ, aara lõõcĩ ooo haaga. 26Aꞌnyahaak hatĩ eeta loonyini vẽlẽk Nyekuc baliinit hĩ bulẽẽnĩt cobbi ꞌtaaũna nĩĩcĩ. 27Aitiõõ hatĩ hõllõngaa ẽlẽmaakĩ Nyekuci ꞌgii ꞌcĩ abathĩ huduhun ꞌtaaũn nicci. Nẽ aitiõõ hatĩ hõllõngaa ẽlẽmaakĩ eet ꞌcĩ ala hẽlẽggĩ ꞌcĩg aar eeta hĩĩtõ nyekuꞌnya hĩ eet ꞌcĩg ĩĩn oloꞌngiaak huduhunit. Nẽẽthĩ, aduhun hatĩ eeta ꞌcĩg eteheeddi ꞌthaara cĩggĩĩng ꞌBuuhaa cĩ Rũgẽtõ ĩcĩ Mĩꞌnyoono dioo.
Currently Selected:
Terethiinit 21: did
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.