Terethiinit 20
20
Irkiꞌnyia aalib hõdẽĩ
1Ma ho, hudtuuha aajĩlõ umwaa ꞌcĩ alluuccia hẽẽtahujjieen, ꞌcĩ aꞌnyaha mũhũta cĩ ꞌlook ꞌcĩ uuthik hiꞌthihi dtuurnanĩt, hĩ nyerikooc ꞌcĩ adĩddĩngĩĩ gẽrrẽẽt. 2Ma nĩngaata, ikia aggam aajĩlõ tĩho ꞌbuuk ꞌcĩ aꞌthĩlan ko, nẽ ẽcẽb irkiꞌnyia aalib hõdẽĩ. Baa haĩ ꞌbuuk ꞌcĩ aꞌthĩlan ko baa ĩĩcĩ oou, hũkaat baa ꞌrẽẽnĩ, ꞌcĩ ĩĩn ꞌThĩttaan, nẽ ĩĩ habu cĩ loriẽẽt ꞌcĩg abathĩ. 3Ma ho, udhuheek aajĩlõ ĩnõõnnõ ꞌloohatõõ nẽ ũꞌnyũũgĩk haala nĩngaata, irkiꞌnyia aalib hõdẽĩ, hátĩ hiittiõõ hõllõngaa aku ĩggõõl eet ꞌcĩg lootu tarĩ. Nẽẽthĩ, aku hatĩ õõga aajĩlõ ĩnõõnnõ tarĩ, hikia nõõ hiyyioman hĩdĩhĩdĩĩc.
4Ma nĩngaata, hudtuuha dtaabĩt ꞌcĩg aattiyyi eeta ꞌcĩg aaꞌnyĩhoothĩk makaaꞌthĩt ꞌcĩ ẽttẽẽdĩ thooꞌthiok cĩg eet cĩg lootu. Nẽ tarĩ, hudtuuha eet baag aruhi, hĩnĩngĩtĩ irrioon thõõth cĩ Yeesu hĩ thõõth cĩ Nyekuci. Baa nga halaacõ nẽẽg nyaharahaak hode ꞌthooura cĩnnĩ nẽ abũrĩ ngaatĩ amacaaranĩ athĩn hĩ muumti cĩggĩĩng. Arũgna hatĩ nẽẽg hiita haggamit looc hõdẽĩ hĩ Yeesu Krĩstõ irkiꞌnyia aalib hõdẽĩ. 5Eet ꞌcĩg arũgna ĩĩcĩ oou cieegi. Nẽ lothippiti vẽlẽk cĩ daakiahu, aitiõõ hõllõngaa arũgna ĩꞌthõng hũttũbattoothĩk irkiꞌnyia ꞌcĩg ĩĩn aalib hõdẽĩ ho. 6Aggatan Nyekuci eet ꞌcĩg ẽllẽẽmĩth ꞌcĩg arũgtha nẽẽ daahĩthaa ꞌcĩ oou. Aitiõõ daahĩthĩ ꞌcĩ uruto hõllõngaa aꞌnyak ꞌtirrian hĩ ĩhõõggõ. Nẽẽthĩ, au hatĩ ĩĩn nẽẽg paadĩrꞌnya cĩg Nyekuci hĩ cĩg Krĩstõ, aggam hatĩ nẽẽg looc hõdẽĩ hĩ ĩnõõnnõ irkiꞌnyia aalib hõdẽĩ.
Ĩllõõan Nyekuci ꞌThĩttaan
7Ooggiaa hatĩ ꞌThĩttaanĩ baabuuthatõõ, hatĩ ũttũbattoothĩk irkiꞌnyia ꞌcĩg ĩĩn aalib hõdẽĩ ho. 8Õkõ hatĩ ĩggõõl nẽẽ eet cĩg loonyin cĩg ꞌGoogĩ hĩ cĩg Magõgĩ ꞌcĩg aattĩg dtuurnattaa cĩ lootu nẽ ũlũta ĩhõõggõ ũũhĩ jora. Mẽẽlĩg hatĩ eeta niccieeg gẽrrẽẽt, haauto hĩ hathaac cĩ dẽmẽt cĩ bũlũcõ. 9Õvvõ hatĩ nẽẽg looc vẽlẽk nẽ irriamatteek eet cĩg Nyekuci, hĩ eet cĩg ꞌtaaũn cobbi ꞌJeruꞌthalẽm, ꞌcĩ ammĩnan eeta cĩgĩnnẽẽgĩ. Nẽẽthĩ, baa hinnia adhukiaa ꞌgwaa hẽẽtahujjieen, hikia hũtũũth mĩrõk tĩko hĩĩ ꞌthĩĩ. 10Nĩngĩtĩ adhuhõõthĩkĩ habuui cĩ loriẽẽt ꞌcĩg abathĩ baa ĩggõõl ĩhõõggõ ho, ꞌgelemit cĩ ꞌgwoo ꞌcĩ aaburii padtahac, hõõt hutuuꞌthi hõdẽĩ hĩ nyaharahaak hĩ põrõvẽtaac cĩnnĩ baa ĩĩn oloꞌngiaahit. Accananni hatĩ nẽẽg ĩĩca waathĩn hĩ baalin ooo.
Ukẽẽnĩt cĩ Nyekuci ꞌcĩ adtuurna
11Nẽ hudtuuha dtaaba cobbi gẽrrẽẽt ꞌcĩ õõrĩ, hĩ eet ꞌcĩ iccioloonganĩ dtaaba tĩho. Baa aireek lõõcĩ hĩ hẽẽtkujjieen dtaaba nicci, aitiõõ hinnia nĩngĩtĩ õõ aguꞌthẽẽnĩ nẽẽg tõõ. 12Nẽ tarĩ, hudtuuha eet baag adaahito ꞌcĩg hidicig hĩ ꞌcĩg obbitig, abĩlĩ muumaa cĩ dtaaba nicci. Nẽ ubbuukti ꞌbuuhẽta ꞌcĩg mẽẽlẽẽgĩ nẽ ikia ubbuuhi ꞌbuuhi cĩ rũgẽtõõ, nĩngĩtĩ etteedini thõõth cĩ eet baag ĩĩn daakiak, hĩ baa ꞌthẽk adtican nẽẽg ꞌgõõlaa ꞌcĩ eheeddi ꞌbuuhatõõ. 13Ma ho, aꞌnyaha bũlũc daakiak cĩgĩnnĩg nẽ aꞌnyaha daahĩthĩ hĩ habuccieet cĩnnĩ buúk, daakiak cĩgĩnnĩg. Ma nĩngaata, iita etteeddi thooꞌthioha cĩggĩĩng vẽlẽk ꞌgõõlaa cĩ thooꞌthiok ꞌcĩg baag adĩman nẽẽgĩ. 14Ma ngaati, udhuheek Nyekuci daahĩth hĩ looc cĩ daakiahu ꞌgelemtaa cĩ ꞌgwoo ꞌcĩ aalla ooo. Nẽ bũlũc cĩ ꞌgwoyyio ho, ĩĩn daahĩth ꞌcĩ uruto. 15Nẽ eeta vẽlẽk ꞌcĩg baag hõllõngaa eheeddi ꞌthaara cĩggĩĩng ꞌbuuhaa cĩ rũgẽtõ, iita udhuktoothĩk ꞌgelemtaa cĩ ꞌgwoo ꞌcĩ aalla ooo ho.
Currently Selected:
Terethiinit 20: did
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.