Terethiinit 19

Taliinit cobbi õlõõ cĩ Nyekuci

1Ma uruta, hĩthĩha molook cĩ lothippit cobbi hẽẽtahujjieen ꞌcĩ ẽggẽrẽny aĩ,

“Hadihiꞌthii naag nganiita Nyekuc!

Aku ꞌtirrianĩ cobbi vẽlẽk hĩ nganiit ꞌcĩ ẽẽlanneet ngagĩĩta,

2etteedi nii thooꞌthiok ꞌgõõlaa ꞌcĩ aũlan dĩdĩ,

hĩnĩngĩtĩ uuku nii ngaa

baa ĩĩn ꞌwaaꞌngiahit ꞌcĩ ẽꞌthẽcan looc ꞌwaangĩꞌthẽẽta hĩ ngaaoniitta.

Etteedi nii thõõth cĩnnĩ nẽ aaꞌnyĩhuu hũdũman dticcianniook cugunnig baag aruk nẽẽnĩ.”

3Nẽ iita eggerenyit nẽẽg tarĩ ĩĩtõ,

“Hĩdĩhĩthĩt Makayyioohit!

Aꞌnyĩĩk bũrrẽt cĩ ꞌgwoo ꞌcĩ atũũth ngaa nicci ho,

haala ooo!”

4Ma uruta, akatit makayyiooha ꞌcĩg ĩĩn hẽẽn ꞌramma hĩ ꞌwec, hĩ hẽlẽggĩ ꞌcĩg ĩĩn ꞌwec arũgĩ ho, huruꞌnyia muumaa cĩ dtaaba cobbi cĩ Nyekuci nẽ alaacõ ĩnõõnnõ ĩĩtõ,

“Aamẽn! Hĩdĩhĩthĩt Makayyioohit!”

Karrama cĩ nyahũũta cĩ Mĩꞌnyoono

5Nẽ hĩthĩha molook umwa ꞌcĩ aku dtaabawa ꞌcĩ aĩ,

“Hĩdĩhĩthĩt Nyekuc,

dticcianniooha cĩgĩnnĩg vẽlẽk,

eeta vẽlẽk ꞌcĩg iꞌngolli ĩnõõnnõ,

iꞌthianaanĩ eetinii ĩcĩg obbitig hĩ ĩcĩg kidicig vẽlẽk.”

6Ma nĩngaata, hĩthĩha molook umwa cĩ lothippit cobbi ꞌcĩ ẽggẽrẽny hĩ tawanĩ cobbi nẽ ĩccaaõ hĩ bõrõhẽẽcĩ, ẽggẽrẽny mõlõõhĩ nicciee gẽrrẽẽt aĩ,

“Hatalit nẽ hĩdĩhĩthĩt

Makayyioohit Nyekuc ꞌTirriannioohit ꞌcĩ ĩllõõan vẽlẽk gẽrrẽẽt ũdũt.

Ĩĩn nẽẽ habu cobbi ꞌcĩ aggam looc vẽlẽk.

7Haccamattoothĩk nẽ hubuluthit ĩnõõnnõ,

hĩnĩngĩtĩ ikia kõrra cĩ nyahũũta cĩ Mĩꞌnyoono

nẽ ũkũmanoothĩk ngaa cĩnnĩ#19:7 Ngaa cĩ Mĩꞌnyoono: Ĩthakꞌthoothĩk ngaa cĩ Mĩꞌnyoono ho, eet vẽlẽk ꞌcĩg ẽlẽmĩ Yeesu Mĩꞌnyõõn cĩ Nyekuci. ẽlẽk.

8Ahimtoothĩk hatĩ ngaa nicci

ceremwaana ꞌcĩg õõppẽr ꞌcĩg anyũttĩĩ.”

Nẽ ceremwaana ꞌcĩg õõppẽr ꞌcĩg ahimit nẽẽ ho, ĩthakꞌthoothĩk thooꞌthiok ꞌcĩg abũnnaa baag adĩman eeta cĩg Nyekuci loota nĩnga.

9Ma ho, õthõõthahaa aajĩlõ ĩnnĩhaa, “Tẽhẽẽd thõõth nicciaa loota. Aggatan hatĩ Nyekuci eet vẽlẽk ꞌcĩg au nyahũũtaawaa cĩ Mĩꞌnyoono.” Nẽ õthõõthahaa aajĩlõ tarĩ ĩĩnnĩhaa, “Ĩĩn thooꞌthioha cieeg vẽlẽk ꞌcĩg aduha Nyekuci dĩdĩ.”

10Ma baa hakanneehi aajĩlõ huruꞌnyia nẽ halawa ĩnõõnnõ ho, anneeka hinnia, “Ma halayya nganĩĩta! Hĩĩnĩ naa eet umwa ꞌcĩ hĩĩnĩ dticciannioohit cĩ Nyekuci haaga hĩ nii buúk nẽ haduhoonna hĩ ꞌgotoonogu ꞌcĩg ẽlẽmĩ Yeesu thõng. Laa nii Nyekuc diooni! Hĩnĩngĩtĩ ẽẽtĩ ꞌcĩ allimaneek ꞌgõõnõgĩ thõõth cĩ Yeesu, allimanni ꞌtirriaanaa cĩ Lori ꞌcĩ Ẽllẽẽmĩthĩ.”

ꞌThukannioohit cĩ nyangõõllẽẽ ꞌcĩ õõrĩ

11Ma ho, hĩcĩnootha hẽẽtkujjieen ngaatĩ abbuuhẽnĩ tarĩ, haau ngaburuur nẽ hudtuuha nyangõõllẽẽ ꞌcĩ õõrĩ ꞌcĩ aꞌthuhan ꞌthukannioohiti ꞌcĩ haĩ ꞌthaar cĩgĩnnĩg Lemmioohit, hĩ Thõõth ꞌcĩ ĩĩn Dĩdĩ. Gõõng ẽttẽẽd nẽẽ thooꞌthiok jurrung, hatĩ aduha thõõth umwa hode hatĩ õkõ jora. 12Baa alanyĩt hẽbẽrĩ cĩgĩnnĩg aattĩg hĩ ꞌgwaa nẽ itihim tẽmẽdẽhĩt ꞌcĩg mẽẽlĩg. Nẽ eheeddi ꞌthaara ẽllaa cĩnnĩ ꞌcĩg hõllõngaa aga eet umwaanĩ, aga nẽẽ dioo.

13Nẽ tarĩ, itihim cẽrẽm ꞌcĩ uudothoothĩk biyyieeta nẽ haĩ ꞌthaar cĩgĩnnĩg, “Thõõth cĩ Nyekuci.” 14Nẽ baa anũ ĩnõõnnõ ũũrũtana ꞌcĩg au hẽẽtahujjieen, ꞌcĩg aꞌthuhan nyangõõllẽẽꞌnya ꞌcĩg õõrĩg nẽ itihimit ceremwa ꞌcĩg õõppẽr ꞌcĩg anyũttĩĩ. 15Baa adukna nyetuboot umwaa ꞌcĩ ꞌlẽhẽdĩ gẽrrẽẽt ũtũũgaa cĩnnĩ, ꞌcĩ ẽꞌngẽddĩ nẽẽ eet cĩg loonyinu. “Aggam hatĩ nẽẽ loonyin hĩbahĩtaa ꞌcĩ ĩĩn ꞌthiihit.”#Tigiil ꞌBuuk cĩ Tegellwaanu 2:9 Adduuta hatĩ nẽẽ liilii cobbi cĩ Nyekuc ꞌTirriannioohit vẽlẽk, haau hĩ viino ꞌcĩ ariha ꞌloohaa ꞌcĩ ammacciini. 16Nẽ baa eheeddi cẽrẽm cĩnnĩ athaana thõõth ꞌcĩ aĩ, “Habu cĩ habuẽẽt vẽlẽk nẽ Makayyioohit cĩ makayyiook vẽlẽk.”

17Ma nĩngaata, hudtuuha aajĩlõ umwa ꞌcĩ abĩlĩ kõrra nẽ ũtũvvũ hodobwa ꞌcĩg alilliaan ngõõtatõõ vẽlẽk ĩĩnnĩk, “Iita adahit karrama cobbi ꞌcĩ aarĩk Nyekuci, 18hátĩ adahit idiꞌngwa cĩg habuẽẽt ꞌcĩg obbitig cĩg ũũrũta, cĩg appahacaaꞌnyanu, cĩg eet ꞌcĩg avvir nyangõõllẽẽꞌnyanĩ, hĩ idiꞌngwa cĩg nyangõõllẽẽꞌnyanu buúk, hĩ eleeti cĩg eet vẽlẽk cĩg adaahito.”

19Ma ho, hĩcĩna nyaharahaak hĩ habuẽẽt cĩg lootu hĩ ũũrũta cĩgĩnnĩg ngaatĩ alũtẽẽnĩ, aĩ hátĩ huruktooa hĩ eet ꞌcĩ õvvõ nyangõõllẽẽaa ꞌcĩ õõrĩ ho, hĩ ũũrũta cĩgĩnnĩg. 20Ma joraa nĩĩca, ikia aggamĩ nyaharahaahĩ hĩ põrõvẽtaac cĩnnĩ ꞌcĩ ĩĩn oloꞌngiaahit, ꞌcĩ baa adtican thooꞌthiok ꞌcĩg ĩnaat eeta gẽrrẽẽt, hĩnĩngĩtĩ nyaharahaak. Baa adtican nẽẽ thooꞌthiok tĩko, aĩ hátĩ hĩggõõl eet baag aꞌnyak nyamacaar cĩ nyaharahaahõ nẽ alaacõ ꞌthooura cĩnnĩ. Ma ho, udhuktoothĩk nyaharahaahĩ hĩ põrõvẽtaac cĩnnĩ ꞌcĩ ĩĩn oloꞌngiaahit ko buúk ꞌgelemit cĩ ꞌgwoo ꞌcĩ aaburii padtahac ꞌcĩ aalla ooo. 21Ma nĩngaata, ũcũda nyetuboot ꞌcĩ ꞌlẽhẽdĩ baa adukna ũtũũgaa cĩ eet ꞌcĩ avvir nyangõõllẽẽaa ꞌcĩ õõrĩ ho, ũũrũta cĩg nyaharahaahõ hĩĩ ꞌthĩĩ nẽ ũtũngẽẽhĩ hodobwa hadahit eleeti cĩggĩĩng.

Currently Selected:

Terethiinit 19: did

Highlight

Copy

Compare