ꞌLuuka 6:27-49

“Nẽẽthĩ, haduhaakuung ngagiit ꞌcĩg athĩknaangu nganĩĩt ko hanneekuung, ĩmmĩnanit mĩrõk cugguung. Ĩdĩmanit eet ꞌcĩg aaburreekuung ngagiit jurrung. Aggatanit eet ꞌcĩg accĩĩnnuung ngagiit nẽ alayyiooyyu eet ꞌcĩg adĩmannuung ngagiit ꞌbuth. Má atabaaꞌngi ẽẽtĩ umwaa mũũcĩc, aꞌnyĩĩk hatabaang ꞌcĩ gõlla buúk. Má adiim õkõõĩ ẽẽtĩ umwaa cẽrẽm cunni hõdẽĩ, aꞌnyĩĩk hũũhĩ umwa tarĩ. Ẽẽl eet ꞌcĩg alayyi nganiita nẽ má ũũhĩ ẽẽtĩ umwaa ꞌgii cunni, ma hadiimi hõbõdaakiina. Ĩdĩmatteek ꞌgoonogu thooꞌthiok ꞌcĩg occa adiimmu niig ĩhõõggõ hĩdĩmatteehuung ngagiita. “Má ammĩnannu niig eet ꞌcĩg ammĩnannuung ngagiit dioo, occa ꞌthẽk ꞌyioko ainnu ĩdĩmattu authet ꞌcĩ abũnnaa? Tananga ꞌthẽccanniooha buúk ammĩnan eet ꞌcĩg adĩman ĩhõõggõ jurrung. Nẽ má adĩmannu niig eet ꞌcĩg abũnnaa hĩ ngagiit dioo jurrung, bũnnai thĩ ꞌyioko ꞌthẽk cunuung ko inoono? Tananga ꞌthẽccanniooha buúk adĩman noho. Má aaꞌnyiku niig eet ꞌcĩg agayyu hucuhattaauung ꞌgiimwa, hĩnĩngĩtĩ agayyu ngaatĩ hatĩ au adũmanĩ, occa ꞌthẽk accamanaannuung Nyekuci ngagiita? Aaꞌnyĩk ꞌthẽccanniooha buúk ꞌgõõnõgĩ, hĩnĩngĩtĩ aga nẽẽg aĩ adũmanneet hatĩnĩ. Nẽẽthĩ, ĩmmĩnanit mĩrõk cugguung nẽ ĩdĩmatteehu thooꞌthiok ꞌcĩg abũnnaa. Nẽ má aaꞌnyiku ĩhõõggõ ꞌgiimwa, ma hadiimmu hoboddiaakuung tarĩ. Ĩnõõ ꞌcĩ hatĩ ammũdaannu ꞌbaaninit ꞌcĩ maka gẽrrẽẽt nẽ iittu lõhõlĩ cĩg Nyekuc ꞌcĩ ĩllõõan vẽlẽk. Hĩnĩngĩtĩ tarbal nẽẽ hĩ eet ꞌcĩg ĩĩn ꞌthẽccanniook hĩ ꞌcĩg hõllõngaa atalĩ ĩnõõnnõ buúk. Atamaattik ꞌgoonogu hĩcĩ ammaannikuung ngagiit Baangẽẽtĩ cunuung.” Ma nĩngaata, irrioonĩk Yeesu ĩhõõggõ tarĩ ĩĩnnĩk, “Ma hetteediku ꞌgoonogu thooꞌthiok, hátĩ hiittiõõ hõllõngaa etteedothoothĩkuung ngagiit buúk thooꞌthioha. Atamaattik ꞌgoonogu, hátĩ atammaattihoothĩk niig buúk. Aanytĩk ꞌgoonogu ꞌbaaninit nẽẽthĩ hatĩ aaꞌnyĩhoothĩhuung ngagiit buúk. Má adĩmannu noho, au hatĩ ammũdaannu niig buúk ꞌbaaninit ꞌcĩ maka gẽrrẽẽt, ꞌcĩ abatan hĩ haala ꞌcĩg acĩĩdothoothĩk lohod hĩbbĩt hudduutti loota, hĩllõõan baa aaꞌnyiku niig ꞌgoonogu.” Baa nẽ uduhaak nẽẽ ĩhõõggõ thõõth ꞌcĩ awantoothĩk ko ĩĩnnĩk, “ꞌYioko ꞌthẽk ẽẽtĩ ꞌcĩ rubenĩ occa atĩꞌthĩt ꞌgõõnĩ ꞌcĩ rubenĩ? Hõllõngaa hinnia occa adhuhoothĩk nẽẽg vẽlẽk ꞌwoor? Aitiõõ loholeec cĩ ꞌthukuulo hõllõngaa ĩllõõan ꞌlimmannioohit cĩnnĩ. Nẽẽthĩ, loholeec ꞌcĩ illimanĩ jurrung, aduhõõ hatĩ nẽẽ hĩ ꞌlimmannioohit cĩnnĩ thõng. “Inni cĩĩn tahahaac ꞌcĩ mĩllĩꞌnyĩ hebereecaa cĩ ꞌgotonoonu nẽ iittiõõ hõllõngaa acini iggooli ꞌcĩ aaĩ hebereecaa cunni ho? Occa gõõng anneehi nii ꞌgotonu, ‘ꞌGõtõna, ĩꞌnya hittihaii tahahaac hebereecaa cunni,’ nẽ nẽẽ aitiõõ hõllõngaa acini iggooli hebereeca cunni ẽmmẽn? Nii oloꞌngiaahiti, ꞌtiha nõõ iggooli hebereecaa cunni nẽ thĩ hatĩ icinu ꞌgõõl ꞌcĩ attihaanĩ tahahaac hebereecaa cĩ ꞌgotonoonu. “Aitiõõ hẽẽt ꞌcĩ abũnnaa hõllõngaa õddõngta ꞌgẽẽn ꞌcĩ abathĩ nẽ aitiõõ hẽẽt ꞌcĩ abathĩ hõllõngaa õddõngõta ꞌgẽẽn ꞌcĩ abũnnaa. Agayyi hẽẽt ꞌgẽẽnaa ꞌcĩ õddõngta nẽẽnĩ. Aitiõõ eeta hõllõngaa adũũca ꞌmũũnĩ hẽẽnĩĩ ꞌcĩg ĩĩn bĩlla, hode hẽẽn ꞌcĩg abbiiri cĩg viinoaak hẽẽnĩĩ ꞌcĩg ĩĩn bĩlla. Adĩman eeta ꞌcĩg abũnnaa thooꞌthiok ꞌcĩg abũnnaa, hĩnĩngĩtĩ bũnnai ꞌcĩ aaĩ ꞌthinneetinii cĩggĩĩng nẽ adĩman eeta ꞌcĩg abathĩ thooꞌthiok ꞌcĩg abathĩ, hĩnĩngĩtĩ bathi ꞌcĩ aꞌnyak nẽẽg ꞌthinneetinii cĩggĩĩng. Hĩnĩngĩtĩ ẽtẽrꞌtha thooꞌthioha ꞌcĩg aduha ẽẽtĩ ꞌgii ꞌcĩ aaĩ ꞌthĩnĩtatõõ cĩnnĩ.” Nĩngĩtĩ annẽẽkĩ Yeesu ĩhõõggõ, “Inni niig utuvvuyyiaangu nganĩĩt ĩĩttĩhaangu, ‘Makayyioohit, Makayyioohit,’ nẽ iittiõõ hõllõngaa adĩmannu thõõth ꞌcĩ haduhaakuung naa ho? Ĩꞌnya huduhaahuung eet ꞌcĩ aaĩ hutuno ꞌcĩ occa aku athĩhĩ thooꞌthiok cĩgannĩg nẽ idticanõõĩ. Aaĩ nẽẽ hĩ ẽẽtĩ ꞌcĩ ma ẽhẽnyĩt ꞌcieeth, ada nõõ ꞌlõõhĩt huuꞌthĩk jurrung nẽ ẽtẽhẽnya loota biyyiẽẽnĩ nẽ ꞌyioko hikia tawanĩ cĩ tammu cobbi buúk, hõllõngaa hatĩ arribanni ꞌcieeth cĩnnĩ ho, hĩnĩngĩtĩ ẽhẽnytĩ jurrung. Nẽẽthĩ, ẽẽtĩ ꞌcĩ athĩhĩ thõõth caannĩ nẽ hõllõngaa adticaniini, aaĩ nẽẽ hĩ ẽẽtĩ ꞌcĩ ẽhẽnyta ꞌcieeth hõllõngaa ada ꞌlõõhĩt huuꞌthĩk. Nẽ ma ikia tawanĩ cobbiẽẽnĩ, arriban hatĩ ꞌcieeth tĩho looc hĩ lõõcĩ ꞌthĩĩ.”