ꞌJeemith 3

ꞌGõõl ꞌcĩ haꞌthũũnnĩ ũtũg

1ꞌGotoonoga hĩ ngoonoga, occa hõllõngaa au ĩĩgĩnnu niig vẽlẽk ꞌlimmanniook lothippitaa cĩ lemmioohu, hĩnĩngĩtĩ, naag ꞌcĩg hallimanna eet ko, etteedothoothĩkeet hatĩ thõõth ꞌgõõlaa ꞌcĩ õkõmĩ gẽrrẽẽt. 2Nẽ dĩdĩ, hẽꞌthẽcattõõ naag vẽlẽk thooꞌthiohĩĩ ꞌcĩg mẽẽlĩg. Hĩnĩngĩtĩ, ꞌyioko huꞌthuutti naag utugeeti cĩggaac, occa habũnnaa gẽrrẽẽt nẽ occa haꞌthũũnnĩ eleeti cĩggaac ꞌgoolliohĩĩ ũgẽẽgĩ buúk.

3Má ecebeek ẽẽtĩ ꞌthiihit ꞌcĩ hidici ũtũũgaa cĩ nyangõõllẽẽõ, occa aaꞌnyĩk eet hũjjũhan nyangõõllẽẽ hũũk ꞌgõõlaa ꞌcĩ adiim nẽẽnĩ.#3:3 ꞌThiihit ꞌcĩ hidici ꞌcĩ eceboothĩk ũtũũgaa cĩ nyangõõllẽẽõ: Ecebeek eeta ꞌthiihit ꞌcĩ hidici ũtũũgaa cĩ nyangõõllẽẽõ, hátĩ heteretheek ẽẽtĩ nyangõõllẽẽ ꞌgõõl. 4Hode aꞌnyĩĩk haahũl hĩĩ terethiinit. Adiim ngõõt ꞌcĩ attiran haaꞌnyĩk haahũl cobbi hõtõ, nẽẽthĩ, adticaniini ꞌthukannioohiti ꞌthiihit ꞌcĩ hidici haaga, heteretheek haahũl ꞌgõõl ꞌcĩ õkõõĩ. 5ꞌGõõla hõdẽẽthõng, ĩĩn ahaatĩ ꞌgii ꞌcĩ hidici ẽlla, nẽẽthĩ, irrianĩ eeta ĩnõõnnõ ngaatĩ aduhaanĩ thooꞌthiok ꞌcĩg obbitig. Agayyiooth ngaatĩ occa atũũthĩ ꞌgwaa ꞌcĩ dĩppĩlĩ haaga mõrõ cobbi ꞌrĩng hĩĩ ꞌthĩĩ! 6Aaĩ ũtũgĩ buúk hĩ ꞌgwaa, ĩĩn nẽẽ ꞌgii ꞌcĩ abathĩ ẽllaa cĩ eeto. Ẽꞌthẽcan nẽẽ ẽlẽ cĩ eeto hũtũrũũr, adhuheek rũgẽt cĩ eeto hũtũrũũr ꞌgwoyyiatõõ, nẽ ũtũũthĩ nẽẽ buúk ꞌgwoyyiaa ꞌcĩ aalla ũdũt.#3:6 ꞌGwoo ꞌcĩ aalla ũdũt: Ĩĩn ciee ꞌgwoo ꞌcĩ atũũthĩ Nyekuci eet ꞌcĩg abũrĩ ĩnõõnnõ, hatĩ kõr cĩ decciaanĩt cĩ lootu. Tigiil ꞌBuuk cĩ Terethiitto 20:7-15.

7Occa abal eeta idiꞌngwa cĩg moru vẽlẽk, hĩbaallĩ hĩ hẽlẽggĩ ꞌcĩg õgõlĩt loota, hĩ hẽlẽggĩ ꞌcĩg aattĩg bũlũcatõõ. 8Nẽẽthĩ hinnianĩ, aitiõõ ẽẽtĩ ꞌcĩ occa aꞌthũũnnĩ ahaat tõõ, ĩĩn nẽẽ ꞌgii ꞌcĩ hõllõngaa iyyioman nẽ abathĩ, abbĩꞌthĩĩ ahaat madõõtĩ ꞌcĩ aruk eeta.

9Hadĩhĩth naag Makayyioohit cĩnaac hĩ Baangeet ũtũũga nẽ tarĩ, haccĩĩnĩ ũtũg eet ꞌcĩg ẽhẽnytaa haauto hĩ Nyekuci ho buúk. 10Aku dĩhĩthẽẽnĩtĩ hĩ ꞌcĩĩnẽnĩt ũtũũga hõdẽẽthõng. ꞌGotoonoga hĩ ngoonoga, occa hõllõngaa aaĩ noho. 11Ĩcca occa ariha maama ꞌcĩg tẽllĩg hĩ ꞌcĩg ammũccarĩĩ hebereeca cĩ hidioo hõdẽẽthõng? 12ꞌGotoonoga hĩ ngoonoga, ꞌyioko ꞌmũũnĩcĩ occa õddõngta oliv, hode õddõngta hẽẽt cĩ viinoo ꞌmũũnĩ? Hode occa hõllõngaa ariha maama ꞌcĩg abũnnaa ũꞌngeecaa cĩ hidioo ꞌcĩ ammũccarĩĩ.

Aku ꞌgẽẽnyĩthĩ ꞌcĩ ĩĩn dĩdĩ hĩ Nyekuc

13Nganĩ hõrggẽẽnaa cunuung ꞌcĩ ẽggẽẽnyĩth nẽ aga hẽlẽggĩ vẽlẽk? Aꞌnyĩĩk hẽtẽrẽtha ꞌgẽẽnyĩth cĩnnĩ ho rũgẽtaa cĩnnĩ ĩĩcĩ abũnnaa, ngaatĩ hõllõngaa athĩngõõnyanĩ, hĩnĩngĩtĩ ẽggẽẽnyĩth nẽẽnĩ. 14Nẽ má abbĩꞌthĩĩ iniaani ꞌcĩ abathĩ hĩ thĩngõõnyani ꞌthĩnĩtaa cunni, ma hatali hode ma hammuti thõõth ꞌcĩ ĩĩn dĩdĩ. 15Hĩnĩngĩtĩ hõllõngaa aku iniaani hĩ muruꞌthẽẽt ꞌgẽẽnyĩthaa cĩ Nyekuci. Ĩĩn nẽẽg hẽlẽggĩ cĩg lootu nẽ ĩĩn cĩg habu cĩ loriẽẽt ꞌcĩg abathĩ. 16Má iinanõõ eeta nẽ ĩĩtõ muruꞌthiook, adĩman nẽẽg thooꞌthiok ꞌcĩg abathĩ ꞌcĩg mẽẽlĩg.

17Nẽẽthĩ ĩĩcĩ oou, tẽlla ꞌgẽẽnyĩthĩ ꞌcĩ aku hẽẽtahujjieen. Abbĩꞌthĩĩ tamaati hĩ dtiicanĩ ꞌcĩg abũnnaa. Hõllõngaa ahal eeta nẽ aduha thõõth ꞌcĩ ĩĩn dĩdĩ hõdõõkõthĩ. 18Ma irrioon eeta cĩg ganõõnaak ganõn, ammũda hatĩ nẽẽg bũnnai.

Currently Selected:

ꞌJeemith 3: did

Highlight

Compare

Copy