ꞌJeemith 2

Ma hammĩnannu balliook hĩ eet ꞌcĩg attiranĩ

1ꞌGotoonoga hĩ ngoonoga, hĩcĩ hẽlẽmĩ naag Makayyioohit cĩnaac Yeesu Krĩstõ ꞌcĩ abuli ho, ma hahallu eeta. 2Má occa hikia ballioohiti umwaa ꞌcĩ ahimit ceremwa ꞌcĩg ẽllẽẽmĩth hĩ ꞌralit ꞌcĩ ĩĩn ꞌdaab, nẽ ikia eet umwaa ꞌcĩ ĩĩn hullahaac buúk ꞌcĩ ahimit ceremwa ꞌcĩg ꞌthaꞌtharĩg; 3má arrĩcanaannu niig eet ꞌcĩ ahimit ceremwa ꞌcĩg ẽllẽẽmĩth ko nẽ iittihu, “Avvi dtaaba ꞌcĩ abũnnaa cieeni,” nẽ iittihu hullahaac, “Bĩĩl nĩngaata hode ꞌcioloongan loota ngaati,” 4nga thĩ ahalit niig eleeti hõrggẽẽnaa cunuung nẽ etteeddu thooꞌthiok muhẽẽttaa ꞌcĩ abathĩ?

5ꞌGotoonoga hĩ ngoonoga ĩthĩktõ. Ẽbẽra Nyekuci hullaha nẽ aaꞌnyĩk ĩhõõggõ lemiinit ꞌcĩ maka loota nĩnga. Nẽ uduhaak ĩhõõggõ buúk thõõth ꞌcĩ hatĩ õthõlĩ nẽẽg hĩ ĩnõõnnõ habuccieet cĩnnĩ, ꞌcĩ hatĩ aaꞌnyĩk nẽẽ eet vẽlẽk ꞌcĩg ammĩnan ĩnõõnnõ. 6Nẽẽthĩ, baa hinnia odoommu niig hullaha thõng. Hõllõngaa nooyyia balliook ꞌcĩg arratannuung ngagiita? Hõllõngaa noyyia ĩhõõggõ ꞌcĩg agurreekuung ngagiit lokihooa? 7Hõllõngaa nooyyia ĩhõõggõ ꞌcĩg arannĩ ꞌthaar ꞌcĩg abuli cĩg Makayyioohit cunuung?

8Má aꞌthuunnu niig nyattal ꞌcĩ aaddi ꞌcĩ eheeddi ꞌBuuhaa cĩ Nyekuci ꞌcĩ aĩ, “Mĩnnan eet ꞌcĩ aaronnu haau hĩcĩ ammĩnannu eleeti cugguung,”#Tigiil ꞌBuuk cĩ Levitiko 19:18 occa thĩ adĩmannu thõõth ꞌcĩ aũlanĩ. 9Nẽẽthĩ, má accamanaannu niig eet ũgĩ hĩllõõanit ꞌgõõnõgĩ, ẽꞌthẽcannu nẽ allimanneet nyattalĩ cĩ Nyekuci aĩ, ẽꞌthẽcannu. 10Hĩnĩngĩtĩ ẽẽtĩ ꞌcĩ aꞌthũũnnĩ nyattalliook vẽlẽk nẽ ẽꞌthẽcan hõdẽẽthõng, ẽꞌthẽcan nẽẽ nyattalliook cĩg Nyekuci vẽlẽk. 11Hĩnĩngĩtĩ Nyekuc ꞌcĩ aduha aĩ, “Ma hattihi ngaa cĩ eet umwa,”#Tigiil ꞌBuuk cĩ Luugithõõ 20:14; Ditoronomi 5:18 nẽ tarĩ ĩĩ, “Ma haruhi.”#Tigiil ꞌBuuk cĩ Luugithõõ 20:13; Ditoronomi 5:17 Má hõllõngaa attihi ngaa cĩ eeto, nẽ uruhu eet, nga ꞌthẽk ẽꞌthẽcannu nyattal noho.

12Othoothit nẽ idticattu thooꞌthiok hĩ eeta ꞌcĩg hatĩ etteedothoothĩk thooꞌthioha nyattaalaa ꞌcĩ õõga eet haauto lõꞌngõõc, 13hĩnĩngĩtĩ aitiõõ hatĩ hõllõngaa ammaannothoothĩk ẽẽtĩ ꞌcĩ baa hõllõngaa ammaannĩk ꞌgõõnõgĩ. Nẽẽthĩ, má baa ammaannihi nii ꞌgoonogu, ammaannikii hatĩ Nyekuci nganiit kõr ꞌcĩ hatĩ ẽttẽẽdĩkĩ nẽẽ eet thooꞌthiok.

Lemiiniti ꞌcĩ aitiõõ dtiicanĩ ꞌcĩg abũnnaa tõõ adaahĩ

14ꞌGotoonoga hĩ ngoonoga, ne ꞌcĩ occa abũnnaa, hatĩ aĩ ẽẽtĩ haꞌnyahi lemiinit nẽ hiꞌthihi dtiicanĩ ꞌcĩg abũnnaa ꞌcĩg adtican nẽẽnĩ? Occa ꞌyioko ꞌthẽk ẽẽla ĩnõõnnõ lemiiniti cĩnnĩ ho? 15Má haau ꞌgõtõõnẽẽtĩ hode ngõõnẽẽtĩ ꞌcĩ hõllõngaa aꞌnyak ceremwa hĩ ꞌgẽẽn, 16nẽ ĩĩnnĩk eet umwaa hõrggẽẽnaa cunuung, “Bĩtõ, bĩĩt au lõꞌngõõc, tihimi nẽ uduho jurrung,” nẽ hõllõngaa ĩbbaan ĩnõõnnõ ꞌgii ꞌcĩ adiim nẽẽ ũdũt, bũnnai ꞌyioko cĩ thõõth cĩnnĩ ho nii? 17ꞌGõõlaa ꞌcĩ aduhõõ thõng, má hõllõngaa õõkõrõõ lemiiniti hĩ dtiicanĩ ꞌcĩg abũnnaa, ĩĩn lemiinit ꞌcĩ adaaha.

18Nẽẽthĩ, occa õthõõth eet umwaa aĩ, “Aꞌnyahi nii lemiinit nẽ haꞌnyahi naa dtiicanĩ ꞌcĩg abũnnaa.”

Teretheehaa daho lemiinit cunni ꞌcĩ aitiõõ dtiicanĩ ꞌcĩg abũnnaa tõõ ho, nẽ heteretheehii naa lemiinit caannĩ dtiicanẽẽnnĩĩ ꞌcĩg abũnnaa ĩcĩg hadĩmani naa ho. 19Elemmu niig ngaatĩ aayyi Nyekuci hõdẽẽthõng. Abũnnaa! Ẽlẽmĩ loriẽẽta ꞌcĩg abathĩ#2:19 Loriẽẽt ꞌcĩg abathĩ: Baa ĩĩn cieeg aajĩlẽẽt ꞌcĩg baag arũmĩ hĩ Nyekuc hẽẽtahujjieen nẽ iita ũtũbũrĩt nẽẽg Nyekuc, nĩngĩtĩ iiggiaĩ Nyekuci ĩhõõggõ hẽẽtahujjieen. Nẽ ꞌyioko iita accananit loriẽẽta cieeg eet loota nĩnga. Tigiil ꞌBuuk cĩ Terethiitto 12:7-9. buúk thõõth icci nẽ aaꞌnyĩk ĩhõõggõ habarritit tẽẽlꞌthĩta.

20Nii ꞌgiiꞌthiahiti, adiimi nii heterethoothihii thõõth ꞌcĩ aĩ, hõllõngaa ẽẽlannii nganiit lemiiniti ꞌcĩ aitiõõ dtiicanĩ ꞌcĩg abũnnaa tõõ? 21Hõllõngaa nooyyia agayyi Abũrahamĩ#2:21 Abũrahaamõ: Baa avvĩ Nyekuci Abũrahaamõ hũtũngeek eet cĩg halang cĩnnĩ hĩ looc cĩnnĩ nẽ ũnũõõthĩ Nyekuc ĩĩcĩ looc ꞌcĩ ĩĩn ngeju. Baa ikia ĩĩ Abũrahamĩ maaꞌnyĩ eet cĩg ꞌJudeei. Baa arũgĩ nẽẽ irkiꞌnyia 1,800 baa nga hittirria Yeesu. Tigiil thõõth cĩnnĩ ꞌBuuhaa cĩ ꞌThianaattõ 17-26. baangẽẽtĩ cĩnaac, ngaatĩ ĩĩnnĩ eet ꞌcĩ abũnnaa, hĩnĩngĩtĩ thõõth baa occa ĩbbõõrĩ nẽẽ ngeerĩnĩ Iꞌthaako#2:21 Iꞌthaako: Baa ĩĩn ciee ngeertĩ Abũrahamĩ ꞌcĩ baa aduhaak Nyekuci Abũrahaamõ. Tigiil thõõth cĩnnĩ ꞌBuuhaa cĩ ꞌThianaattõ 17-35. hĩĩ ꞌgaarrieenit altaarĩa? 22Ĩcĩnĩt nõõ lemiinit cĩnnĩ ngaatĩ adticaniini hõdẽĩ hĩ dtiicanĩ cĩgĩnnĩg ꞌcĩg abũnnaa. Ikia ũttũbanoothĩk lemiiniti cĩnnĩ, hĩnĩngĩtĩ dtiicanĩ ꞌcĩg abũnnaa baag adĩman nẽẽnĩ. 23Nĩngĩtĩ aku edeeꞌnyianĩ thõõth baa aduha ꞌBuuhi cĩ Nyekuci dĩdĩ ꞌcĩ aĩ, “Baa ẽlẽmĩ Abũrahamĩ thõõth cĩ Nyekuci nẽ hĩnĩngĩtĩ thõõth icci, ikia accamana Nyekuci ĩnõõnnõ ngaatĩ ĩĩnnĩ eet ꞌcĩ abũnnaa.”#Tigiil ꞌBuuk cĩ ꞌThianaattõ 15:6 ꞌGõõl ꞌcĩ baa aku ĩĩnnĩ Abũrahamĩ ꞌgõõnĩ Nyekuci ho niccia. 24Nẽẽthĩ hoti ho, hẽtẽrꞌtha naag ngaatĩ habũnnayyĩ hĩ Nyekuc, hĩnĩngĩtĩ dtiicanĩ ꞌcĩg abũnnaa ꞌcĩg hadĩman naaga, hõllõngaa hĩnĩngĩtĩ lemiinit diooni.

25Nẽẽthĩ hoti ho, hõllõngaa nooyyia baa agayyi ꞌwaaꞌngiahiti baa haĩ Rahab ngaatĩ abũnnayyĩ, hĩnĩngĩtĩ thõõth baa avvaanĩ nẽẽ eet baag ĩĩn ꞌrootti, nẽ utuguny ĩꞌthõng nẽ ĩꞌthooĩk hĩnĩhĩt ꞌgõõlaa ꞌcĩ ꞌrĩĩng? 26Hĩ ẽlẽ ꞌcĩ adaahĩ hĩnĩngĩtĩ aitiõõ lorii tõõ, nẽẽthĩ, lemiiniti ꞌcĩ aitiõõ dtiicanĩ ꞌcĩg abũnnaa tõõ, ĩĩn lemiinit ꞌcĩ adaaha.

Currently Selected:

ꞌJeemith 2: did

Highlight

Compare

Copy