Ebereei 7

Paadĩr Melkithẽdẽk

1Baa ĩĩn Melkithẽdẽhĩ habu cobbi cĩ ꞌtaaũn cĩ Thaalemĩ nẽ ĩĩ paadĩr cĩ Nyekuc ꞌcĩ ĩllõõan vẽlẽk. Melkithẽdẽk baa õõ õmmõtõõ hĩ Abũrahaamõ, nĩngĩtĩ aggatanĩ nẽẽ Abũrahaamõ baa õbõda joraa baa õõ aruhõõnĩ hĩ habuẽẽt ꞌcĩg mẽẽlĩg nẽ ĩllõõan ĩhõõggõ. 2Nẽ ikia aaꞌnyĩk Abũrahaamõ Melkithẽdẽk hẽlẽggĩ ũgĩ ꞌcĩg abadtẽc#7:2 Hẽlẽggĩ ũgĩ ꞌcĩg abadtẽc: Má õbõdaanĩ Abũrahaamõ hẽlẽggĩ õmmõtõ joraa baa ĩllõõanĩ habuẽẽt baag aruhõõ hĩ ĩnõõnnõ, aku ẽꞌngẽraak nẽẽ Melkithẽdẽk hõdẽĩ. Tigiil ꞌBuuk cĩ ꞌThianaattõ 14:13-20. baag ammiira jora. Nẽ ꞌthaara ꞌcĩg haĩ Melkithẽdẽk ko, nĩngĩtĩ aĩ, “Bũnnai.” Nẽ haĩ Melkithẽdẽk ꞌthaar ũgĩ buúk, “Habu cĩ Ganõõnõ.” Nẽẽthĩ, aĩ ꞌthaara ꞌcĩg haĩ Thaalem ko, Ganõn. 3Baa aitiõõ hõllõngaa agayyi maaꞌnyĩ Melkithẽdẽhĩ hode ngaannia hode maajiha cĩg baarkit hode ꞌtirriaanĩtĩ hĩ daahĩth cĩnnĩ. Ikia aala nẽẽ ĩĩ paadĩr ũdũt haau hĩ Ngeertĩ Nyekuci.

4Ummuhit nõõ makaaꞌthĩt cĩ Melkithẽdẽhĩ, ẽꞌngẽraak aattĩ Abũrahamĩ ĩnõõnnõ ꞌgii umwa hẽlẽggẽẽnnĩĩ baag ammiira jora. 5Nẽ ꞌyioko adiim nyattalĩ cĩ Mũũꞌtha paadĩrꞌnya ꞌcĩg hattũũg cĩ ꞌLeevi, huluttia ꞌbaaninit ꞌcĩ abadtẽc#7:5 ꞌBaaninit ꞌcĩ abadtẽc: Nyattaalaa cĩ Mũũꞌtha, baa aduhaak Nyekuci eet heꞌngerriaak ĩnõõnnõ ꞌbaaninit ꞌcĩ abadtẽc. Má ajana ẽẽtĩ lohoddwa õmmõtõ, attiha hõdẽĩ nẽ ẽꞌngẽraak Nyekuc. Tigiil ꞌBuuk cĩ Levitiko 27:30-33; ꞌBuuk cĩ Tigiilẽttõõ 18:21-24; Ditoronomi 12:5-19; 14:22-29. eetini vẽlẽk ĩcĩg Ĩꞌthĩraẽlĩ, ĩcĩg ĩĩn nẽẽg buúk lõhõlĩ cĩg lõhõlĩ cĩg Abũrahaamõ. 6Baa aitiõõ hõllõngaa ĩĩn Melkithẽdẽhĩ eet cĩ hattũũg cĩ ꞌLeevi. Ma ho, ikia ẽꞌngẽraak Abũrahamĩ ĩnõõnnõ ꞌbaaninit ꞌcĩ abadtẽc, hẽlẽggẽẽnnĩĩ baag ammiira Abũrahamĩ jora. Nĩngĩtĩ aku aggatanĩ Melkithẽdẽhĩ Abũrahaamõ baa aꞌnyak thooꞌthiok ꞌcĩg aduhaak Nyekuci. 7Nẽẽthĩ, hiꞌthihi eet ꞌcĩ akidan ngaatĩ aggatanĩ ẽẽtĩ cobbi eet ꞌcĩ hidici.

8Paadĩrꞌnya ꞌcĩg alũta ꞌbaaninit ꞌcĩ abadtẽc ko, ĩĩn eet ꞌcĩg hatĩ adaahĩ, nẽẽthĩ, maka Melkithẽdẽhĩ ĩllõõan ĩhõõggõ, hĩnĩngĩtĩ adukiaakeet aĩ arũgĩ Melkithẽdẽhĩ ũdũt. 9Occa horoong hõthõõth haĩ, eeta cĩg ꞌLeevi#7:9 ꞌLeevi: Baa au paadĩrꞌnya cĩg Ĩꞌthĩraẽlĩ vẽlẽk hattũũgaa cĩ ꞌLeevi nẽ baa ĩĩn Arõõnẽ ꞌgõtõnĩ Mũũꞌtha paadĩr ꞌcĩ oou. ꞌcĩg alũta ꞌbaaninit ꞌcĩ abadtẽc ko, adũmaneek Melkithẽdẽk ꞌbaaninit tĩho hĩ baa adũmaneek Abũrahamĩ baangẽẽtĩ cĩnĩĩng, 10hĩnĩngĩtĩ baa nga hittirria ꞌLeevi baa õmmõtõõ Melkithẽdẽhĩ hĩ Abũrahaamõ.

Aduhõõ Yeesu hĩ Melkithẽdẽk

11Má baa ummuddia eeta ngaatĩ ũũnyĩ ꞌgaarriẽẽna cĩg paadĩrꞌthẽẽt cĩ hattũũg cĩ ꞌLeevi ꞌthẽccanẽẽt hĩ baa aduha nyattalĩ cĩ Mũũꞌtha, inni thĩ hidiim Nyekuci hĩꞌthõõa paadĩr umwa hattũũgaa cĩ Melkithẽdẽhĩ nẽ hõllõngaa ĩꞌthõõa hattũũgaa cĩ Arõõnẽ baa ĩĩn paadĩr ꞌcĩ oou ho? 12Nẽ ma ẽgẽẽranni ꞌgõõl ꞌcĩ eberriaanĩ paadĩrꞌnya, adiim ẽgẽẽranni nyattalĩ buúk.

13Paadĩrĩ ꞌcĩ hõthõõth naag ko, ĩĩn eet cĩ hattũũg cĩrrĩĩng ꞌcĩ nga hidticattõõ eeta cĩgĩnnĩg altaarĩa#7:13 Altaarĩ: Nyattaalaa cĩ Mũũꞌtha, baa gõõng ĩĩn altaarĩ nĩngĩtĩ ꞌcĩ ĩbbõõrĩ paadĩrĩ ꞌgaarrieenit ꞌcĩ aaꞌnyĩk Nyekuc, hátĩ hũtũũnyĩtõ biyyieeta ꞌthẽccanẽẽt cĩg eetuk. hĩ paadĩrꞌnya.

14Haga naag vẽlẽk aku Makayyioohiti cĩnaac hattũũgaa cĩ ꞌJuuda nẽ nga huduha Mũũꞌtha thõõth ꞌcĩ occa auuni paadĩrꞌnya hattũũgaa cĩ ꞌJuuda ũdũt.

15Baa agaĩ gẽẽraniiniti ciee baa ikia edeeꞌnyia paadĩrĩ cĩrrĩĩng ꞌcĩ eberriaa ꞌcĩ aduhõõ hĩ Melkithẽdẽhĩ thõng. 16Ikia ĩĩ Yeesu paadĩr, hõllõngaa hĩnĩngĩtĩ ĩĩn nẽẽ eet cĩ hattũũg cĩ ꞌLeevi, nẽẽthĩ, aku ĩĩn nẽẽ paadĩr ꞌtirriaanaa cĩ rũgẽt ꞌcĩ aalla ũdũt.

17Uppulana ꞌBuuhi cĩ Nyekuci ĩĩ,

“Iinu nii paadĩr ꞌcĩ aalla ũdũt

hĩ Melkithẽdẽhĩ.”#Tigiil ꞌBuuk cĩ Tegellwaanu 110:4

18Ikia ũtũngoothĩk ꞌgõõl ꞌcĩ ꞌrẽẽnĩ baa gõõng eberriaanĩ paadĩrꞌnya, hĩnĩngĩtĩ baa iittiõõ hõllõngaa attiranĩ nẽ hõllõngaa adticanni. 19Hĩnĩngĩtĩ baa hõllõngaa akũmaneek nyattalĩ ꞌgii umwa hũbũna. Nẽẽthĩ ꞌyioko, okomit ngagĩĩt ꞌthĩnneeti, hĩnĩngĩtĩ muhẽẽnĩt ꞌcĩ abũnnaa ꞌcĩ hiita hõbõktõõĩ naag hĩ Nyekuc.

20Baa aku ꞌgõõl ꞌcĩ ĩĩn ngeju ꞌcĩ eberriaanĩ paadĩrꞌnya ho, lõbũtĩaa ꞌcĩ abũnnaa. Baa au ĩĩn lohollia cĩg lõhõlĩ cĩg Arõõnẽ paadĩrꞌnya haaga hiꞌthihi lõbũtĩ, 21nẽẽthĩ, baa aaĩ lõbũtĩ cĩ Yeesu. Hĩnĩngĩtĩ baa anneek Nyekuci ĩnõõnnõ,

“Baa abũtan Makayyioohiti nẽ hõllõngaa ẽꞌthẽcan lõbũtĩ cĩnnĩ ꞌcĩ aĩ,

‘Iinu nii paadĩr ꞌcĩ aalla ũdũt!’ ”#Tigiil ꞌBuuk cĩ Tegellwaanu 110:4

22Nẽ hĩnĩngĩtĩ lõbũtĩ icci, ikia aaꞌnyeet Yeesu lõhõt ꞌcĩ abũnnaa hĩ Nyekuc.

23Baa mẽẽlĩg paadĩrꞌnya ꞌcĩg baag adticaniini nyattal baa ꞌrẽẽnĩ, hĩnĩngĩtĩ baa daahĩth ꞌcĩ alaam ĩhõõggõ ngaatĩ adticaniini ĩꞌthõng. 24Nẽẽthĩ, Yeesu ꞌcĩ arũgĩ ũdũt ko, aalla paadĩrꞌthẽẽt cĩnnĩ buúk ũdũt. 25Nẽẽthĩ hoti ho, ũũlũ Yeesu ngaatĩ ẽẽlanĩ eet ꞌcĩg ẽlẽmĩ Nyekuc hĩnĩngĩtĩ ĩnõõnnõ.

26Ĩĩn Yeesu paadĩr cobbi ꞌcĩ hadiim naag, hĩnĩngĩtĩ ẽllẽẽmĩth nẽẽnĩ, tẽlla nẽ hiꞌthihi ꞌthẽccan. Aitiõõ Yeesu ꞌthẽccanĩ tõõ nẽ aaꞌnyĩhoothĩk nĩngĩtĩ cobbi cĩ bulẽẽttõ hẽẽtahujjieen. 27Aitiõõ Yeesu hõllõngaa occa ĩbbõõr ꞌgarrieenit hõdõõkõthĩ hĩ gõõng ĩbbõõr paadĩrĩ umwaa cobbiẽẽnĩ. Ĩbbõõr paadĩrĩ cobbi ꞌgaarriẽẽn, hĩnĩngĩtĩ ꞌthẽccanẽẽt cĩgĩnnĩg ĩĩcĩ oou nẽ ikia ĩbbõõr, hĩnĩngĩtĩ ꞌthẽccanẽẽt cĩg eetuk uruta. Nẽẽthĩ ꞌyioko, ẽlẽmana Yeesu ẽlẽ cĩnnĩ tabattĩ hõdẽẽthõng hĩĩ ꞌgaarrieenit, hĩnĩngĩtĩ ꞌthẽccanẽẽt cĩg eetuk. 28Nẽẽthĩ, baa ẽbẽra nyattalĩ paadĩrꞌnya ꞌcĩg ĩĩn eet haaga ꞌcĩg hõllõngaa attiranĩ. Ma baa aaꞌnyĩhoothĩk eet nyattalĩ, ikia ẽbẽra Nyekuci Ngeerĩnĩ lõbũtĩĩa nẽ ikia ĩĩ Ngeerĩnĩ paadĩr cobbi ꞌcĩ ĩllõõan paadĩrꞌnya vẽlẽk ũdũt.

Currently Selected:

Ebereei 7: did

Highlight

Compare

Copy