Ebereei 6

1Nẽẽthĩ, hũtũngteek ngaatĩ hõbõdẽẽkĩ ꞌlimman cĩ Krĩstõ baa oou hiriiri. Hõõt ĩĩcĩ oou, hátĩ heggeenyit hagaac ꞌlimman cĩ Krĩstõ. Nẽ dĩdĩ, occa hõllõngaa hadiim hiꞌthianaanĩ tarĩ ngaatĩ, hallimanĩ thooꞌthiok ꞌcĩg tiirik ꞌcĩg haduhaanĩ ꞌthẽccanẽẽt nẽ helemit Nyekuc. 2Occa hõllõngaa hara hallimaneekuung ngagiit thõõth cĩ baattithimoo, hĩ ꞌgattan cĩ Lori ꞌcĩ Ẽllẽẽmĩth hĩ rũgũthaanĩt cĩ daakiahu hĩ ꞌteedinit cĩ thooꞌthiok ꞌcĩg aalla ooo. 3Nẽ ꞌyioko, má ẽlẽmĩ Nyekuci, hũnnẽẽc ꞌlimman ꞌcĩ tiiri ꞌcĩ allimanneet thõõth cĩ Krĩstõ nẽ occa ꞌthẽk hadĩman hoti.

4Hĩnĩngĩtĩ õkõmĩ hatĩ gẽrrẽẽt hĩ eet baag agaacõ thõõth cĩ Nyekuci ẽlẽk, ngaatĩ õbõdaanĩ hiita hũtũngteek ꞌthẽccan, eet baag ummuddia ꞌbaaninit cĩ hẽẽtkujjieen nẽ otholit Lori ꞌcĩ Ẽllẽẽmĩthĩ, 5nẽ atarit mẽdĩĩth cĩ thõõth cĩ Nyekuci, hĩ makaaꞌthĩt cĩ rũgẽt ꞌcĩ hatĩ aku horumwa, 6nẽ ꞌyioko ũtũbũrĩt Nyekuc. Õkõmĩ gẽrrẽẽt ngaatĩ ũũnnĩkĩ eeta ꞌcĩg aattĩg noho ꞌthẽccanẽẽt cĩggĩĩng, hĩnĩngĩtĩ ũtũbũrĩt nẽẽg Ngeertĩ Nyekuci nẽ aauto hĩcĩ odooddĩk ĩnõõnnõ hurucceea tarĩ nẽ aanytĩk ngaaoni lothippita.

7Aggatan Nyekuci mana huruk tammu nẽ ibbiir jurrung, hátĩ hajana maaꞌnyia haal ꞌcĩg mẽẽlĩg. 8Nẽ mana ꞌcĩ adak ꞌdwaanĩ nẽ uwwatana, ĩĩn mana ꞌcĩ accĩĩnĩ thõng nĩngĩtĩ atũũthẽnĩ.

9ꞌGotoonoga hĩ ngoonoga, tananga hõthõõꞌtha naag hoti, hagayya naag ngaatĩ adĩmannu hẽlẽggĩ ꞌcĩg abũnnaa ꞌcĩg adĩman eeta hatĩ eellia. 10Aitiõõ Nyekuci hõllõngaa ahaleek eet umwa tuu, ĩnõõ ꞌcĩ hõllõngaa ataarrõꞌthĩ nẽẽ dtiicanĩ cugguung hĩ mĩnnan ꞌcĩ ẽtẽrꞌthaannu niig ngaatĩ eellu eet cĩgĩnnĩg, hĩcĩ nga aalla eellu noho ho. 11Hadiimmuung naag ngagiit hõdẽĩ hõdẽĩ eellio nyaagwaana ooo ĩꞌthõng decciaanĩt cĩ lootu, hátĩ hikia muhẽẽnĩtĩ cunuung ꞌcĩ ammuku Nyekuc, hĩĩ dĩdĩ. 12Hõllõngaa hadiimmuung naag ngagiit ĩĩtõ nyamuttiook, hadiimmuung ĩthahithit eet baag aꞌnyahit lemiinit hĩ temeethi nẽ iita ummuddia thõõth baa aduha Nyekuci.

Ĩĩn thõõth ꞌcĩ aduha Nyekuci dĩdĩ

13Baa aaĩ thõõth ꞌcĩ aduhaak Nyekuci Abũrahaamõ. Hĩnĩngĩtĩ baa aitiõõ ẽẽtĩ ꞌcĩ maka ꞌcĩ baa occa adukiaak thõõth tĩho tõõ, ũbũtan Nyekuci ꞌthaarĩĩ cĩgĩnnĩg ẽmmẽn, 14ĩĩ, “Haggatannii hatĩ naa nganiit dĩdĩ nẽ haaꞌnyii lõhõlĩ ꞌcĩg mẽẽlĩg gẽrrẽẽt.”#Tigiil ꞌBuuk cĩ ꞌThianaattõ 22:17 15Ma ho, ikia ẽrẽẽõ Abũrahamĩ ĩꞌthõng hikia hẽdẽẽnya Nyekuci thõõth baa aduha.

16Nẽẽthĩ ꞌyioko, má abũtan eeta ũgẽẽgĩ lõbũtĩ, aꞌnyĩĩk hũbũtanit eet ꞌcĩ maka ꞌcĩ ĩllõõan ĩhõõggõ, hátĩ huꞌthuutti lõbũtĩ tĩho. Aꞌnyĩĩk huꞌthuutti lõbũtĩ tĩho hiittiõõ jinẽẽnĩtĩ tõõ. 17Nẽ tarĩ, aꞌthũũnnĩ Nyekuci ẽllaa cĩnnĩ ẽmmẽn lõbũtĩ, hátĩ hagaacõ eeta baag aduhaak nẽẽ lõbũtĩ ngaatĩ ĩĩnnĩ thõõth cĩ Nyekuci dĩdĩ. 18Nẽẽthĩ, aaꞌnyeet Nyekuci thõõth ꞌcĩ aduha nẽẽ hĩ lõbũtĩ cĩnnĩ. Aalla thooꞌthioha ꞌcĩg ĩĩn ꞌramma ho ꞌgõõla hõdẽẽthõng hĩnĩngĩtĩ hõllõngaa occa ĩĩn thõõth ꞌcĩ aduha Nyekuci õlõng. Nẽẽthĩ, naag baag hõõ hũũk hutugunyeet Nyekuci ho, õkõmĩ ꞌthinneeti hĩnĩngĩtĩ hẽrẽ muhẽẽnĩt ꞌcĩ abũnnaa ꞌcĩ nga aayyiaa ĩĩcĩ oou. 19Haꞌnyak naag muhẽẽnĩt cĩnaac ꞌcĩ abũnnaa dĩdĩ ꞌcĩ aggammeet ngagĩĩta. Aduhun muhẽẽnĩtĩ cĩnaac ꞌcĩ abũnnaa ho cẽrẽm ꞌcĩ ẽꞌngẽr ꞌCieeth cĩ Nyekuci#6:19 Cẽrẽm ꞌcĩ ẽꞌngẽr ꞌCieeth cĩ Nyekuci: ꞌCieethaa cĩ Nyekuci, aaĩ cẽrẽm ꞌcĩ uuni ꞌcĩ athid Nĩngĩtĩ Aꞌngirannii ꞌcĩ Ẽllẽẽmĩth Gẽrrẽẽt. Paadĩr cobbi dioo ꞌcĩ aduhun cẽrẽm nicci uuni ho hũũk ĩĩcĩ gõlla tabattĩ hõdẽẽthõng irkita. Tigiil ꞌBuuk cĩ Levitiko 16:2; Ebereei 6:19-20. hõdõlan Nĩngĩtĩ Aꞌngirannii ꞌcĩ Ẽllẽẽmĩth Gẽrrẽẽt. 20Utuwaneekeet Yeesu ngagĩĩt ĩĩca ẽlẽk. Ikia ĩĩ nẽẽ Paadĩr cĩnaac cobbi ꞌcĩ aalla ũdũt hĩ baa Melkithẽdẽhĩ.

Currently Selected:

Ebereei 6: did

Highlight

Compare

Copy