Ebereei 5

1Eberriaa paadĩrĩ cobbi lothippitaa cĩ eetu hĩĩ dticciannioohit cĩ Nyekuci, haaꞌnyĩk Nyekuc ꞌbaaninit hĩ ꞌgaarriẽẽn ꞌcĩg ũũny ꞌthẽccanẽẽt cĩg eetuk. 2Ĩĩn paadĩrĩ cobbi buúk eet haaga ꞌcĩ hõllõngaa attiranĩ nẽ aga ngaatĩ ammaannĩkĩ eet ꞌcĩg ẽrẽk thõõth nẽ arahanita. 3Ĩnõõ cĩ ĩbbõõrĩkĩ nẽẽ Nyekuc ꞌgaarriẽẽn ꞌcĩg adũman ꞌthẽccanẽẽt cĩg eetuk hĩ ꞌthẽccanẽẽt cĩgĩnnĩg buúk ko. 4Aitiõõ ẽẽtĩ ꞌcĩ occa ẽbẽraak ẽlẽ cĩnnĩ makaaꞌthĩt hĩĩ paadĩr cobbi ẽmmẽn tõõ, Nyekuc dioo ꞌcĩ ẽbẽra ĩnõõnnõ hĩ baa ẽbẽra Arõõnẽ.

5Ĩnõõ baa hõllõngaa attihi Krĩstõ makaaꞌthĩt cĩ paadĩr cobbi ẽmmẽn, Nyekuc ꞌcĩ baa aduhaak ĩnõõnnõ anneek,

“Iini nii Loholeec caannĩ

nẽ ꞌyioko kõr nicci, hanneekii hĩĩnĩ naa Maaꞌnyu.”#Tigiil ꞌBuuk cĩ Tegellwaanu 2:7

6Adukiaa ngaamwaanĩ ꞌBuuhaa cĩ Nyekuci aĩ,

“Iinu nii paadĩr#5:6 Paadĩr: Ĩĩn paadĩrĩ eet ꞌcĩ ĩbbõõr ꞌgaarrieenit ꞌCieethaa cĩ Nyekuci. ꞌcĩ aalla ũdũt

hĩ Melkithẽdẽhĩ.#5:6 Melkithẽdẽhĩ: Baa ĩĩn Melkithẽdẽhĩ habu cĩ Thaalemĩ, nẽ ĩnõõnnõ baa aggatan Abũrahamĩ.”#Tigiil ꞌBuuk cĩ Tegellwaanu 110:4

7Waathinnioohĩĩ ĩbaag aayyi Yeesu loota nĩnga, baa ala nẽẽ Nyekuc nẽ ĩĩnnĩk ĩlaallẽ nẽ utuluuik Nyekuc ꞌcĩ occa ẽẽla ĩnõõnnõ daahĩtha. Ma ho, ĩthĩk Nyekuci ĩnõõnnõ, hĩnĩngĩtĩ baa ẽlẽmĩ Yeesu thõõth ꞌcĩ aduhaak Maaꞌnyia. 8Tananga baa ĩĩn Yeesu Ngeertĩ Nyekuci, ikia illiman ꞌcannanĩ cĩnnĩ ĩnõõnnõ hĩthĩk Nyekuc. 9Nẽ ꞌgõõlaa cĩ, ikia aaꞌnyĩk ꞌcannani Yeesu hũbũna, nẽẽ aga ngaatĩ ẽẽlĩ eet vẽlẽk cĩg athĩhĩ ĩnõõnnõ ooo. 10Nĩngĩtĩ aku ẽbẽraanĩ Nyekuci ĩnõõnnõ hĩĩ paadĩr cobbi haau hĩ baa Melkithẽdẽhĩ.

Tilooinit hĩnĩngĩtĩ hũtũbũrĩt thõõth cĩ Nyekuci

11Tananga hĩĩ maka thõõth ꞌcĩ adukiaakuung ngagiit ꞌcĩ aduhõõnĩ Krĩstõ hĩ Melkithẽdẽk, aꞌnyamanaa nganĩĩt ꞌgõõl ꞌcĩ hẽddẽẽbakuung ngagiit thõõth icci, hĩnĩngĩtĩ hõllõngaa athĩkneennu niig hĩdĩĩkoothong. 12Baa iittu niig lemmiook baangaani ꞌrĩng. Nẽẽthĩ, occa ꞌyioko baa illimattu ꞌgoonogu thooꞌthiok ꞌcĩg ĩĩn dĩdĩ cĩg Loriiak. Nẽẽthĩ, ĩko hinnia nga adiimmu eet umwa hillimanuung ngagiit thooꞌthiok ꞌcĩg tiirik cĩg Nyekuci? Nga aattiyyu niig hĩ ĩdõlẽẽta ꞌcĩg nga adiim aam ira nẽ hõllõngaa occa nõõ aaꞌnyĩhoothĩk ahata. Aitiõõ niig nga ũkũmattoothĩk hĩnĩngĩtĩ ꞌlimman ꞌcĩ õkõmĩ ꞌcĩ aaĩ hĩ ahat ꞌcĩ aduk ẽẽtĩ cobbiẽẽnĩ. 13Ẽẽtĩ ꞌcĩ nga alliman thõõth ꞌcĩ õõlõlĩĩ ho, hõllõngaa aku aga thõõth ꞌcĩ thooꞌthiok ꞌcĩg abũnnaa, aaĩ nẽẽ hĩ ĩdõlĩ ꞌcĩ adiim ira. 14Ĩĩn ahat ꞌcĩ õkõmĩ cĩ eet cobbi nẽ aala illiman ngaatĩ ittiamanĩ ꞌgii ꞌcĩ abũnnaa hĩcĩ abathĩ.

Currently Selected:

Ebereei 5: did

Highlight

Compare

Copy