Ebereei 4

Kõr cĩ ꞌYiomman cĩ eet cĩg Nyekuci

1Nga abũnnaa thõõth baa aduha Nyekuci aĩ ꞌcĩ hadukni nĩngĩtĩ ꞌyiommaanõ nẽ adiim harrĩcana naag, hátĩ hiittiõõ hõllõngaa abacĩ eet umwaa ngaatĩ adukni nĩngĩtĩ ꞌyiommaanõ ho hõrggẽẽnaa cunuung. 2Baa hĩthĩhĩt naag nyeemuut ꞌcĩ abũnnaa ho, hĩ baa athĩhĩ eeta cĩg Ĩꞌthĩraẽlĩ. Nẽ baa ũtũbũrĩt nẽẽg thõõth baa ĩthĩhĩt ẽlẽk. Ma ho, iittiõõ nyeemuut ciee hõllõngaa ẽẽl ĩhõõggõ, hĩnĩngĩtĩ hõllõngaa aꞌnyak nẽẽg lemiinit. 3Ngagĩĩt ꞌcĩg hẽlẽmĩ Nyeemuut icci ĩĩn Ngeju ho, ꞌcĩg occa haduhun nĩngĩtĩ ꞌyiomman tĩho, hĩ baa aduha Nyekuci aĩ,

“Hũbũtana lĩĩlĩẽẽtta hĩĩna,

‘Aitiõõ hatĩ nẽẽg hõllõngaa aduhun nĩngĩtĩ haayyi naa hiita hiyyiomanit.’ ”#Tigiil ꞌBuuk cĩ Tegellwaanu 95:11

Baa aduha Nyekuci thõõth icci, tananga baa ẽdẽcaak nẽẽ ngaatĩ ẽhẽnytaanĩ looc. 4Õthõõth Nyekuci kõr ꞌcĩ ĩĩn tũkĩramma ꞌBuuhaa cĩnnĩ aĩ, “Ikia iyyioman Nyekuci dtiicaa cĩnnĩ.”#Tigiil ꞌBuuk cĩ ꞌThianaattõ 2:2 5Nẽ tarĩ uduha ĩĩ, “Aitiõõ hatĩ nẽẽg hõllõngaa aduhun nĩngĩtĩ haayyi naa hiita hiyyiomanit.”

6Nga abbuuhi nĩngĩtĩ ꞌyiommaanõ ho, hátĩ huduhunit eeta ũgẽẽgĩ, aitiõõ eeta baag ĩthĩhĩt nyeemuut ꞌcĩ abũnnaa nẽ ũtũbũrĩt hõllõngaa aduhuni. 7Nẽẽthĩ tarĩ, aarĩk Nyekuci kõr umwa ꞌcĩ hadukni nĩngĩtĩ ꞌyiomman cĩnnĩ nẽ ĩĩn kõrra niccia, “Kõr nicci.” Baa aduha Nyekuci thõõth icci ũtũũgaa cĩ Daavide#4:7 Daavide: Baa ẽbẽra Nyekuci Daavide hikia hĩĩ habu cĩ Ĩꞌthĩraẽlĩ nẽ uduha ĩĩ, aku hatĩ habuui cobbi lõhõlẽẽnĩĩ cĩg lõhõlĩ cĩgĩnnĩg, hikia haggam looc hĩĩ habu ũdũt. Baa habu tĩho Yeesu Krĩstõ. Tigiil thõõth icci ꞌBuuhaa cĩ Tegellwaanu 132:11-12. Baa arũgĩ Daavide irkiꞌnyia ꞌcĩg occa ũũppan aalib hõdẽĩ, baa nga hittirria Yeesu. Tigiil thõõth cĩnnĩ ꞌBuuhaa ꞌcĩ ĩĩn 1 ĩcĩ Thamueele 16-30; 2 Thamueele 1-24; 1 Habueetu 1-2. uruta ꞌrĩng, hĩ baa adukiaa thooꞌthiohĩĩ ꞌcĩg oou aĩ,

“Má athiknu molook cĩ Nyekuci kõr nicci,

ma haburru.”#Tigiil ꞌBuuk cĩ Tegellwaanu 95:7-8

8Má baa aaꞌnyĩk ꞌJooꞌthua#4:8 ꞌJooꞌthua: Baa ẽbẽra Nyekuci ꞌJooꞌthua hĩĩ makayyioohit hũtũhaõõthĩ eet cĩg Ĩꞌthĩraẽlĩ hũũhĩ ĩĩcĩ looc cĩ Kanaanĩ, urutaa cĩ daahĩth cĩ Mũũꞌtha. Baa ĩĩn ꞌJooꞌthua eet baa õkõõĩ eet cĩg Ĩꞌthĩraẽlĩ looccaa baa aduhaak Nyekuci Mũũꞌtha baa nga hadaak, ma baa urutaa cĩ irkiꞌnyia ꞌcĩg mẽẽlĩg ikia ĩĩ Daavide habu. Tigiil thõõth cĩnnĩ ꞌBuuhaa cĩ Luugithõõ 17-24; ꞌJooꞌthua 1-24. baa ĩĩn lemmioohit ĩhõõggõ ꞌyiomman, occa hõllõngaa õthõõth Nyekuci kõr umwa cĩ ꞌyiommaanõ tarĩ. 9Nẽẽthĩ, baa uduhaaheet Nyekuci ngagĩĩt ĩĩnnĩheet haaꞌnyuung hatĩ Kõr cĩ ꞌYiommaanõ, ꞌcĩ hatĩ hiyyiomanĩ naaga, tananga nga hikia kõrra tĩho.#4:9 Kõr ꞌcĩ ĩĩn tũkĩramma: Baa kõr ꞌcĩ iyyiomanĩ Nyekuci urutaa ꞌcĩ ẽtẽhẽnyaaĩ nẽẽ hẽlẽggĩ vẽlẽk waathinnioohĩĩ ꞌcĩg ĩĩn tõrkõnõn. Kõrra ꞌcĩ avvĩ eeta cĩg ꞌJudeei aĩ ĩĩn tũkĩramma ho, ĩĩn kõr ꞌcĩ hanneek naag Dĩdĩngaayyi lõõcĩ tõrkõnõn. Tigiil ꞌBuuk cĩ ꞌThianaattõ 2:2. 10Kõr tĩho, iyyioman hatĩ eeta cĩg Nyekuci dtiicanẽẽnnĩĩ cĩggĩĩng, hĩnĩngĩtĩ uduhunit nẽẽg nĩngĩtĩ ꞌyiomman cĩ Nyekuci, hĩ baa iyyioman Nyekuci dtiicaa cĩnnĩ.

11Nẽẽthĩ ꞌyioko, hidticatõ gẽrrẽẽt, hátĩ huduhunit nĩngĩtĩ ꞌyiomman tĩho, hiittiõõ ẽẽtĩ ꞌcĩ abacĩ tõõ. Nẽẽthĩ, má habũrĩ Nyekuc hĩ baa abũrĩ eeta cĩg Ĩꞌthĩraẽlĩ, hadhukiaa hatĩnĩ. 12Hĩnĩngĩtĩ arũgĩ thõõth cĩ Nyekuci nẽ attiranĩ. ꞌLẽhẽd hĩllõõan nyetuboot ꞌcĩ ꞌlẽhẽdĩ gẽrrẽẽt, ẽttẽẽd thõõth cĩ Nyekuci loriẽẽt hõdõlan lobulẽẽt hĩ õnyõ, ĩꞌthõng hũmmũda mũyan hĩ muhẽẽnĩt cĩ ꞌthinneeti cĩggaac. 13Aitiõõ ꞌgii baa ẽhẽnyta Nyekuci hõllõngaa occa aguꞌthi hẽbẽrẽẽnnĩĩ cĩgĩnnĩg, acĩn nẽẽ ꞌgii vẽlẽk cũrũmũũm, hĩnĩngĩtĩ haduhaak hatĩ naag ĩnõõnnõ thõõth ꞌcĩ ĩĩn dĩdĩ ꞌcĩ baa hidticanit naaga.

Ĩĩn Yeesu paadĩr cobbi ꞌcĩ ĩllõõan vẽlẽk

14Nẽẽthĩ, haꞌnyak naag paadĩr cobbi ꞌcĩ ũũk hẽẽtahujjieen, ĩnõõnnõ Yeesu Ngeertĩ Nyekuci. Ĩnõõ ꞌcĩ haĩ, huꞌthuutti thõõth ꞌcĩ haduha naag, hĩnĩngĩtĩ hẽlẽmĩ ĩnõõnnõ. 15Aga paadĩrĩ cobbi pĩĩrnanĩt cĩnaac vẽlẽk, hĩnĩngĩtĩ baa ĩttĩmanĩ nẽẽ pĩĩrnatta ꞌgoolliohĩ vẽlẽk hĩ naaga, nẽẽthĩ aitiõõ ĩnõõnnõ ꞌthẽccanĩ tõõ! 16Hõõt naag vẽlẽk dtaaba cĩ bulẽẽttõ cũrũmũũm, hátĩ hummuddia tamaati hĩ bũnnai ꞌcĩ eelleet nẽẽ ngagĩĩt, hatĩ hadiim eliinit.

Currently Selected:

Ebereei 4: did

Highlight

Compare

Copy