Ebereei 3

Maka Yeesu ĩllõõan Mũũꞌtha

1Niig ꞌgotoonoga hĩ ngoonoga cieegi, ẽbẽraauung Nyekuci ngagiit ĩĩtõ eet cĩgĩnnĩg ꞌcĩg ẽllẽẽmĩthĩ. Nẽẽthĩ, ummuhit Yeesu ꞌcĩ hanneek naag ꞌthooyyiahit cĩ Nyekuci nẽ ĩĩ paadĩr cobbi ꞌcĩ hẽlẽmĩ naag ko. 2Baa athĩhĩ Yeesu Nyekuc baa ẽbẽra ĩnõõnnõ, haau hĩ baa athĩhĩ Mũũꞌtha#3:2 Mũũꞌtha: Urutaa cĩ daahĩth cĩ Yothebo, iita ĩĩtõ lohollia cĩg Ĩꞌthĩraẽlĩ appahacaaꞌnya Ijjiba irkiꞌnyia ꞌmiiaꞌnya ꞌwec. Baa adticaniini Nyekuci Mũũꞌtha hõõgaĩ eet cĩg Ĩꞌthĩraẽlĩ appahacẽẽꞌthĩta. Baa aaꞌnyĩk Nyekuci lõhõlĩ cĩg Ĩꞌthĩraẽlĩ nyattal, hĩnĩngĩtĩ Mũũꞌtha. Ĩnõõ ꞌcĩ haĩnnĩ nyattal icci nyattal cĩ Mũũꞌtha ho. Baa arũgĩ Mũũꞌtha irkiꞌnyia aalib hõdẽĩ hĩ ꞌmiiaꞌnya ꞌwec, baa nga hittirria Yeesu. Tigiil thõõth cĩnnĩ ꞌBuuhaa cĩ Luugithõõ 2-24. Nyekuc, ngaatĩ adticanõõthĩkĩ eet vẽlẽk cĩg Nyekuci. 3Nẽẽthĩ, adiim Yeesu bulẽẽnĩt ꞌcĩ maka hĩllõõan Mũũꞌtha, haau hĩcĩ adiim ẽẽtĩ ꞌcĩ ẽhẽnyĩt ꞌcieeth dĩhĩthẽẽnĩt, hĩllõõan ngaatĩ hadĩkꞌthĩ ꞌcieeth ẽlẽ cĩnnĩ. 4Hĩnĩngĩtĩ aꞌnyak ꞌcieethi vẽlẽk teheꞌnyioohit, nẽẽthĩ, eet ꞌcĩ ẽhẽnyta hẽlẽggĩ vẽlẽk Nyekuci.

5Baa ẽlẽmĩ Mũũꞌtha ngaatĩ adticanõõthĩkĩ eet ꞌCieethaa cĩ Nyekuci nẽ uduha cũrũmũũm thooꞌthiok ꞌcĩg hatĩ au edeeꞌnyia horumwa. 6Nẽẽthĩ, ĩĩn Krĩstõ Ngeertĩ Nyekuci ꞌcĩ aggam eet cĩg Nyekuci. Nẽ hĩĩgĩn naag eet tĩko, hatĩ haalla haꞌthĩlan nẽ huꞌthuutti muhẽẽnĩt ꞌcĩ abũnnaa.

ꞌYiomman cĩ eet cĩg Nyekuci

7Nẽẽthĩ, hĩcĩ aduha Lorii ꞌcĩ Ẽllẽẽmĩth aĩ,

“Má ithiktu molook cĩ Nyekuci kõr nicci,

8ma haburru,

hĩ baa abũrĩ eeta cĩg Ĩꞌthĩraẽlĩ,

baag attĩman Nyekuc horrwatõõ ꞌcĩ õdõhõhĩĩ kak,

9nga baa attĩmanna nganĩĩt nyakangaaꞌnya cugguung, tananga

baa ĩcĩnĩt nẽẽg thooꞌthiok ꞌcĩg ĩnaat eeta, baag hadticani naa irkiꞌnyia hẽẽn ꞌwec.

10Ĩnõõ ꞌcĩ baa halĩĩllĩkĩĩ naa eet tĩko irkiꞌnyia nicciag,

nẽ hĩĩna nẽẽ, ‘Gõõng abũrra nẽẽg nganĩĩta.

Nẽ ũtũbũrĩt thõõth ꞌcĩ haduhaahi naa ĩhõõggõ hidticanit.’

11Nẽ hũbũtana lĩĩlĩẽẽtta hĩĩna,

‘Aitiõõ hatĩ nẽẽg hõllõngaa aduhun nĩngĩtĩ hiyyiomanĩĩ naana.’ ”#Tigiil ꞌBuuk cĩ Tegellwaanu 95:7-11

12ꞌGotoonoga hĩ ngoonoga, ĩcĩnĩt jurrung ma hakidannu hode haꞌnyaku ꞌthinneeti ꞌcĩg abathĩ ꞌcĩg aaꞌnyuung ũtũngteek thõõth cĩ Nyekuc ꞌcĩ arũgĩ. 13Eellio nyaagwaana hõdõõkõthĩ hĩcĩ ꞌyioko adukiaakeet kõr nicci ho, hátĩ hiittiõõ ẽẽtĩ ꞌcĩ hatĩ ĩggõõl ꞌthẽccanĩ nẽ õkõm ngaatĩ athĩknĩ thõõth cĩ Nyekuci tõõ. 14Hĩnĩngĩtĩ má haꞌthũũnnĩ naag thõõth cĩ Nyekuci ĩꞌthõng hadaahit, haau hĩ baa hẽlẽmĩ ĩĩcĩ oou, hõthõl hatĩ hẽlẽggĩ vẽlẽk cĩg Krĩstõ hõdẽĩ. 15Nẽ aĩ ꞌBuuhi cĩ Nyekuci nẽẽ,

“Má ithiktu molook cĩ Nyekuci kõr nicci,

ma haburru,

hĩ baa abũrĩ eeta cĩg Ĩꞌthĩraẽlĩ.”#Tigiil ꞌBuuk cĩ Tegellwaanu 97:7-8

16Hĩ nganĩ baa ꞌcĩg ĩthĩhĩt molook cĩ Nyekuci nẽ ũtũbũrĩt ko? Hõllõngaa nooyyia eet baag aꞌnyaha Mũũꞌtha looccaa cĩ Ijjibi baag abũrĩ molook cĩ Nyekuci ho? 17Hĩ nganĩ nooyyia baag aaꞌnyĩk Nyekuc hĩlĩĩlĩ ĩꞌthõng irkiꞌnyia hẽẽn ꞌwec ko? Hõllõngaa nooyyia ĩhõõggõ eeta baag ẽꞌthẽcattõõ nẽ adaahito horrwatõõ ꞌcĩ õdõhõhĩĩ kak nẽẽgĩ? 18Hĩ nganĩ baag abũtaneek Nyekuci irkiꞌnyia hẽẽn ꞌwec anneek, hõllõngaa hatĩ aduhun nẽẽg nĩngĩtĩ aayyi nẽẽ, hátĩ hõõt hiyyiomanit, hõllõngaa nooyyia ĩhõõggõ eeta baag abũrĩ thõõth cĩ Nyekuci? 19Hĩcĩnĩt naag ngaatĩ hõllõngaa adukni nẽẽg nĩngĩtĩ ꞌyiommaanõ ho, hĩnĩngĩtĩ abũrĩ nẽẽg thõõth cĩ Nyekuci.

Currently Selected:

Ebereei 3: did

Highlight

Compare

Copy