Ebereei 2

Aaut dĩkĩĩm

1Huꞌthuutti naag thõõth baa illimanoothĩheet nẽ hĩthĩhĩt jurrung, hátĩ hiittiõõ hõllõngaa hĩꞌthanni tahatak nẽ hũtũngteek thõõth ꞌcĩ ĩĩn dĩdĩ. 2Hĩnĩngĩtĩ thõõth baa aduha aajĩlẽẽta, ĩĩn thõõth dĩdĩ nẽ má baa ẽꞌthẽcan ẽẽtĩ umwaanĩ, uuki eet tĩho thõng. 3Nẽẽthĩ, má hũtũbũrĩt naag thõõth icci tiiri ꞌcĩ aꞌnyaha Makayyioohiti Yeesu ꞌcĩ occa heellianĩ ho, occa hatĩ halĩĩta naag ukẽẽnĩt nicci hutuno? Makayyioohit Yeesu ꞌcĩ baa aduha ĩĩcĩ oou thõõth ꞌcĩ heellianĩ naag ko, nẽ uduktaaheet eeta baag ĩthĩhĩt ĩnõõnnõ ĩĩttĩheet, ĩĩn thõõth ciee thõõth dĩdĩ. 4Aduha Nyekuci nẽẽ dẽẽdẽ aĩ thõõth ꞌcĩ ĩĩn dĩdĩ cieeni, ꞌgõõlaa ꞌcĩ adticanĩ thooꞌthiok ꞌcĩg mẽẽlĩg ꞌcĩg ĩnaat eeta nẽ aaꞌnyĩk eet Lori ꞌcĩ Ẽllẽẽmĩth hĩ ꞌbaaninit hĩcĩ adiim nẽẽnĩ.

5Baa hõllõngaa aajĩlẽẽt ꞌcĩg aaꞌnyĩk Nyekuci haggamit looc ꞌcĩ ĩĩn ngeju ꞌcĩ hõthõõth naag ꞌcĩ hatĩ aku horumwa ho. 6Nẽẽthĩ, aaĩ nĩngĩmwaa ꞌcĩ eheeddi ꞌBuuhaa cĩ Nyekuci aĩ,

“Inni nii Nyekuci ꞌmuuk eet gẽrrẽẽt

nẽ ũꞌthũũtĩ ngeertĩ eet ꞌcĩ holli õõ buúk gẽrrẽẽt ko?

7Hĩnĩngĩtĩ irritanaa nii ĩnõõnnõ hĩdĩhĩdĩĩc hĩllõõan aajĩlẽẽt

nẽ itihimẽẽhĩ ĩnõõnnõ temedek cĩ bulẽẽttõ hĩ ꞌcĩ iꞌngoliini eeta ĩnõõnnõ.

8Aaꞌnyĩhuu nii ĩnõõnnõ ꞌtirrian ꞌcĩ aggamĩ hẽlẽggĩ vẽlẽk.”#Tigiil ꞌBuuk cĩ Tegellwaanu 8:4-6

Aggam nẽẽ hẽlẽggĩ vẽlẽk ꞌyioko, nẽ nga hũtũngeek Nyekuci ꞌgiimwa battaala. Nẽẽthĩ nẽẽꞌthẽk ꞌyioko, nga hĩcĩnĩt hẽlẽggĩ vẽlẽk ꞌcĩg aggam nẽẽ ho, ngaatĩ edeeꞌnyianĩ. 9Hĩcĩnĩt naag Yeesu baa arritanniaa hĩdĩhĩdĩĩc hĩllõõan aajĩlẽẽt. Nẽẽthĩ ꞌyioko, itihimoothĩk ĩnõõnnõ tẽmẽdẽhĩ cĩ bulẽẽttõ hĩcĩ tẽẽlꞌthĩtõõ, hĩnĩngĩtĩ baa adaak nẽẽnĩ. Bũnnaiittaa cĩ Nyekuci dĩdĩ, ikia atar Yeesu daahĩth hĩnĩngĩtĩ eet vẽlẽk.

10Baa Nyekuc ꞌcĩ ẽhẽnyta hẽlẽggĩ vẽlẽk ꞌtirriaanaa cĩnnĩ nẽ ikia ẽbẽan nẽẽ dioo ngaatĩ aaꞌnyĩkĩ Yeesu hũbũna ꞌcannaana, hátĩ hũũppan Yeesu ngaatĩ ẽẽlanĩ eet nẽ otholit bulẽẽnĩt cĩnnĩ. 11Yeesu hĩ eet ꞌcĩg aaꞌnyĩk nẽẽ helleemito ho, odoyyii Maaꞌnyia. Ĩnõõ ꞌcĩ hõllõngaa aꞌngaaõnnĩ Yeesu ngaatĩ avvĩyyĩ ĩhõõggõ annẽẽkĩ ꞌgõtõõnõgĩ hĩ ngõõnõgĩ. 12Baa anneek Yeesu Nyekuc nẽẽ,

“Haduhaahi hatĩ naa lothippit cĩ lemmioohu ꞌthaar cugunnig

nẽ hẽbẽna dĩhĩthẽẽnĩt cunni, hatĩ au alayyi nẽẽg nganiita.”#Tigiil ꞌBuuk cĩ Tegellwaanu 22:22

13Nẽ uduha Yeesu ĩĩ,

“Haarihi hatĩ naa ꞌthĩnĩt caannĩ hĩ ĩnõõnnõ.”#Tigiil ꞌBuuk cĩ Iꞌthaia 8:17

Nẽ tarĩ, õthõõth Yeesu ĩĩ,

“Nganĩĩt ciee hĩ lõhõlĩ baag aaꞌnya Nyekuci.”#Tigiil ꞌBuuk cĩ Iꞌthaia 8:18

14Hĩĩgĩn naag vẽlẽk eet ꞌcĩg haꞌnyak eleeti. Ĩnõõ ꞌcĩ aku ĩĩnnĩ Yeesu eet hĩ naag ko. Baa adaahĩ nẽẽ, hátĩ huruk habu cĩ loriẽẽt ꞌcĩg abathĩ,#2:14 Habu cĩ loriẽẽt ꞌcĩg abathĩ: Ĩĩn ciee habu cĩ loriẽẽt ꞌcĩg abathĩ ꞌcĩ haĩ ꞌthaar cĩgĩnnĩg ꞌThĩttaan. Baa ĩĩn habuui cĩ loriẽẽt ꞌcĩg abathĩ ho aajĩlõ hẽẽtahujjieen, ꞌcĩ baa aĩnanaak aajĩlẽẽt ũgĩ hũtũbũrĩt Nyekuc, nĩngĩtĩ iiggiaĩ Nyekuci ĩhõõggõ hẽẽtahujjieen. Tigiil ꞌBuuk cĩ Terethiitto 12:7-9. baa aꞌnyak ꞌtirrian ꞌcĩ aruhi eet. 15Nẽ ꞌgõõlaa cĩ, occa õõga eet baag aalla ĩĩn appahacaaꞌnya ũdũt, hĩnĩngĩtĩ iꞌngolli nẽẽg ngaatĩ adaaknĩ. 16Nẽ dĩdĩ, baa hõllõngaa aku nẽẽ aĩ hẽẽla aajĩlẽẽt, baa aku ẽẽla lõhõlĩ cĩg Abũrahamĩ#2:16 Abũrahaamõ: Baa avvĩ Nyekuci ĩnõõnnõ hũtũngeek eet cĩg halang cĩnnĩ hĩ looc cĩnnĩ nẽ ũnũõõthĩ Nyekuc ĩĩcĩ looc ꞌcĩ ĩĩn ngeju. Baa ikia ĩĩ Abũrahamĩ maaꞌnyĩ eet cĩg ꞌJudeei. Baa arũgĩ nẽẽ irkiꞌnyia 1,800 baa nga hittirria Yeesu. Tigiil thõõth cĩnnĩ ꞌBuuhaa cĩ ꞌThianaattõ 17-26. vẽlẽk. 17Nẽẽthĩ hoti ho, baa ikia aau nẽẽ hĩ ꞌgotoonoggia hĩ ngõõnõgĩ ꞌgoolliohĩ vẽlẽk, hátĩ hikia hĩĩ nẽẽ tamaattiohit nẽ ũꞌthũũtĩ thõõth hĩ paadĩrĩ cobbi#2:17 Paadĩr cobbi: Maka paadĩrĩ cobbi ĩllõõan paadĩrꞌnya vẽlẽk, hĩnĩngĩtĩ paadĩr cobbi dioo ꞌcĩ aduhun Nĩngĩtĩ ꞌcĩ Aꞌngirannii ꞌcĩ Ẽllẽẽmĩth Gẽrrẽẽt ꞌCieethaa cĩ Nyekuci tabattĩ hõdẽẽthõng irkita. Baa aayyi Nyekuci Nĩngĩtĩ icci Aꞌngirannii ho bulẽẽtta, ĩnõõ ꞌcĩ adukni paadĩrĩ cobbi Nĩngĩtĩ icci nẽ ũũk urwacan biyyiẽẽtĩ, hátĩ hatamaatĩk Nyekuci eet hĩnĩngĩtĩ ꞌthẽccanẽẽt cĩggĩĩng ko. Tigiil ꞌBuuk cĩ Levitiko 16; Ebereei 9. dtiicaa cĩ Nyekuci, hátĩ hĩbbõõr ꞌgaarrieenit ꞌcĩ ũũnnõthõõthĩkĩ ꞌthẽccanẽẽta cĩg eetuk. 18Hĩnĩngĩtĩ baa accananni nẽẽ baa attĩmanni, occa ũũlũ nẽẽ ngaatĩ ẽẽlanneet ngagĩĩt buúk hatĩ hattĩmanni.

Currently Selected:

Ebereei 2: did

Highlight

Compare

Copy