Ebereei 1

Othoothĩkeet Nyekuci ꞌthaarĩĩ cĩg Ngeerĩnĩ

1Baangaani, baa gõõng othoothĩk Nyekuci hĩbaangĩ utugeetinii cĩg põrõvẽtaaꞌnyanu tabattĩ mẽẽlĩg ꞌgoolliohĩĩ cũũmõ cũũmõ. 2Nẽ ꞌyioko waathinnioohĩĩ ꞌcĩg adtuurna ho, ikia othoothĩheet Nyekuci ngagĩĩt ꞌthaarĩĩ cĩg Ngeerĩnĩ baa ẽhẽnytaanĩ nẽẽ looc, baa ẽbẽra Nyekuci ĩnõõnnõ hikia hirigith hẽlẽggĩ vẽlẽk baag ẽhẽnyta nẽẽnĩ. 3Ĩĩn Ngeerĩnĩ lanyit cĩ bulẽẽnĩt cĩ Nyekuci nẽ aduhõõ nẽẽ hĩ Nyekuc ꞌgiiaa vẽlẽk. Aggam nẽẽ looc vẽlẽk kõmĩĩthaa cĩ thõõth cĩnnĩ. Ma baa ũtũũny nẽẽ ꞌthẽccanẽẽt cĩg eetuk ẽlẽk, ũũk iccioloongan hẽẽtahujjieen attiaa cobbi makaaꞌthĩtaa cĩ Nyekuci. 4Ikia ĩĩ maka nẽẽ ĩllõõan aajĩlẽẽt makaaꞌthĩtaa cĩnnĩ, hĩnĩngĩtĩ akattioothĩk ĩnõõnnõ ꞌthaara ꞌcĩg ĩllõõan ꞌthaarriok vẽlẽk cĩg aajĩleetu.

Maka Ngeertĩ Nyekuci ĩllõõan aajĩlẽẽt

5Baa nga hĩĩnnĩk Nyekuci aajĩlõ umwa,

“Iini nii Loholeec caannĩ,

nẽ ꞌyioko kõr nicci, hĩĩna naa Maaꞌnyu.”#Tigiil ꞌBuuk cĩ Tegellwaanu 2:7

Hode anneek,

“Hĩĩnĩ hatĩ naa Maaꞌnyĩ

nẽ ĩĩn hatĩ nẽẽ Loholeec caannĩ.”#Tigiil ꞌBuuk cĩ ĩĩn 2 Thamueele 7:14; 1 Koroniko 17:13

6Ma baa ĩꞌthõõa Nyekuci Ngeerĩnĩ ꞌcĩ odoyyii hikia loota nĩnga, ikia õthõõth Nyekuci ĩĩ,

“Aꞌnyĩĩk aajĩlẽẽt cĩgannĩg vẽlẽk hakattieek Loholeec caannĩ huruꞌnyia nẽ ubuluthit ĩnõõnnõ.”#Tigiil ꞌBuuk cĩ Ditoronomi 32:43

7Ma baa ho, ikia õthõõth Nyekuci thõõth cĩ aajĩleetu ĩĩ,

“Haaꞌnyĩha naa aajĩlẽẽt cĩgannĩg haauto hĩ ngõõtĩ

nẽ haaꞌnyĩha dticcianniook cĩgannĩg haauto hĩ lanyit cĩ ꞌgwoyyio.”#Tigiil ꞌBuuk cĩ Tegellwaanu 104:4

8Nẽ uduha Nyekuci thõõth cĩ Ngeerĩnĩ ĩĩ,

“Iini nii Nyekuc nẽ aggami hatĩ looc ĩĩ habu ooo

nẽ tarĩ, aꞌnyahaak hatĩ makaaꞌthĩt cunni eet bũnnai loota nĩnga.

9Baa ammĩnani nii thõõth ꞌcĩ abũnnaa nẽ aaburreehu thooꞌthiok ꞌcĩg abathĩ,

nẽẽthĩ, hẽbẽraaii naa Nyekuci cunni nganiit ꞌlõõan ꞌgoonogu vẽlẽk,

nẽ hiniibii ngõõrraa cĩ taliitto.”#Tigiil ꞌBuuk cĩ Tegellwaanu 45:6-7

10Baa aduhaak Nyekuci Ngeerĩnĩ anneek,

“Makayyioohit, baa ꞌthianaatta, nganiit ꞌcĩ baa ẽhẽnyta looc

hĩ hẽẽtkujjieen athĩnĩĩ cugunnig.

11Aꞌnginoothi hatĩ hẽẽtkujjieen kĩ looc vẽlẽk

nẽ uduktoothĩk hĩ ceremwaana ꞌcĩg ũnũũhĩtõ nẽ aalla hatĩ nii ooo.

12Appũrcca hatĩ nii hẽẽtkujjieen kĩ looc

hĩ cẽrẽm gõõng happũrcca nẽ hudhukteek tuu,

nẽ hõllõngaa hatĩ adtuurnik irkiꞌnyia cugunnẽẽgĩ,

aalla hatĩ nii ooo nẽ hõllõngaa ahaanyi ũdũt.”#Tigiil ꞌBuuk cĩ Tegellwaanu 102:25-27

13Baa nga hĩĩnnĩk Nyekuci aajĩlõ umwa,

“Au attiaa caannĩ ĩcobbi

ĩꞌthõng hĩllõõan naa mĩrõk cugunnig.”#Tigiil ꞌBuuk cĩ Tegellwaanu 110:1 14Nẽẽthĩ hoti ho, ĩĩn aajĩlẽẽta loriẽẽt haaga ꞌcĩg ĩꞌthooyyiaa, hiita hidticattoothĩk eet ꞌcĩg hatĩ eelliaa.

Currently Selected:

Ebereei 1: did

Highlight

Compare

Copy