Vilõmẽẽnõ 1

Ĩꞌtha Paaulo Vilõmẽẽnõ

1Waraga ꞌcĩ aku hĩ nganĩĩt Paaulo hĩ ꞌgotooneet Timotteeo cieeni, haaĩ naa baabuutha hĩnĩngĩtĩ hirriooni nyeemuut cĩ Yeesu Krĩstõ.

Hẽhẽẽdakii naa nganiit Vilõmẽẽnõ, ꞌcĩ hammĩnannii nẽ hidticattõõ hõdẽĩ waraga icci, 2hĩ ngooneet Aappia hĩ Arkippo, eet ꞌcĩ adticanoothĩk Makayyioohit hĩ naaga, hĩ lothippit cĩ lemmioohu ꞌcĩ alayyi õlõõ cunni.

3Halayyi naa, hátĩ hĩĩtõ Nyekuci Baangẽẽtĩ cĩnaac hĩ Makayyioohit cĩnaac Yeesu Krĩstõ tarbalĩg hĩ ngagiit nẽ aggatattuung ganõõna!

Mĩnnan hĩ lemiinit cĩ Vilõmẽẽnõ

4Ẽlẽ Vilõmẽẽnõ, hanneehi naa Nyekuc hõdõõkõthĩ ĩlaallẽ hatĩ halaiinni nganiita. 5Hathihi naa thõõth cĩ lemiinit cunni ꞌcĩ aꞌnyahi nii hĩnĩngĩtĩ Makayyioohit cĩnaac Yeesu, hĩ mĩnnan ꞌcĩ ammĩnanĩĩ nii eet cĩg Nyekuci vẽlẽk. 6Halayyi naa, hátĩ hĩttõõrĩ rũmẽẽnĩtĩ cĩ lemiinit ꞌcĩ othollu niig hĩ ꞌgoonogu lemmiook, hátĩ gaa nii hẽlẽggĩ vẽlẽk ꞌcĩg abũnnaa ꞌcĩg haꞌnyak naag hĩ Krĩstõ. 7ꞌGõtõna, aaꞌnya mĩnnanĩ cunni nganĩĩt haccamanoothĩk gẽrrẽẽt nẽ amammaayanaa, hĩnĩngĩtĩ aaꞌnyĩk tarbalꞌthẽẽt cunni eet cĩg Nyekuci haccamattoothĩk.

Uduhaak Paaulo Vilõmẽẽnõ thõõth cĩ Onethimo

8Aaꞌnya Krĩstõ nganĩĩt hõkõm ꞌthĩnĩt huduhaaki nganiit ꞌgii ꞌcĩ occa adticani niina. 9Nẽ hĩnĩngĩtĩ mĩnnan cĩnaac, occa hanneekii ꞌmuuk thõõth icci haau hĩ jinẽẽnĩtĩ ꞌcĩ aku hĩ nganĩĩt Paaulo, ꞌcĩ hatahaanya nẽ ꞌyioko hĩĩna baabutheenit, hĩnĩngĩtĩ Yeesu Krĩstõ buúk, 10halayyii gẽrrẽẽt ẽẽl loholeec caannĩ Onethimo. Hikia hĩĩna naa maaꞌnyĩ, lemiittaa baa nga haaĩ baabuuthatõõ. 11Baa õõa, baa gõõng nga ĩĩn nẽẽ eet umwa haaga hĩ nganiita, nẽẽthĩ ꞌyioko, ikia ĩĩ nẽẽ tiir hĩ nganĩĩt nẽ ĩĩ tiir hĩ nganiit buúk.

12Hĩꞌthõõakii naa nganiit Onethimo ꞌgõõna cĩ ꞌthĩnĩtõ, hõbõda hikia hĩ nganiita. 13Hadiimi occa hũrũmteea hĩ nganĩĩt ngaati, hirigith nĩngĩtĩ nunni hẽẽla nganĩĩt nga hababuuthannii, hĩnĩngĩtĩ hirriooni nyeemuut ꞌcĩ abũnnaa ho. 14Nẽ hõllõngaa occa hadĩmani ꞌgiimwa ẽmmẽn nga lẽẽm nii ĩĩcĩ oou. Hadiimi ẽlẽmana nii ꞌthĩnĩtaa cunni ẽmmẽn, hõllõngaa hĩnĩngĩtĩ attĩnganoothĩkii thõng. 15Horoong ꞌyioko baa eꞌngeroonnu niig hĩ Onethimo hĩdĩhĩdĩĩc, hátĩ iita ũrũmtĩ niig hĩ ĩnõõnnõ ũdũt uruta. 16Iittiõõ nẽẽ hõllõngaa aaĩ hĩ appahaca hĩ ngagiit tarĩ. Ĩllõõan nẽẽ appahaca, hĩnĩngĩtĩ ĩĩ nẽẽ ꞌgotooneet ꞌcĩ hammĩnan nẽ hĩmmĩnana naa buúk dĩdĩ. Nẽ ꞌyioko, ikia ĩĩ nẽẽ eet ꞌcĩ tiiri gẽrrẽẽt hĩ nganiit nẽ aau hĩ ꞌgõtõõnẽẽtĩ Makayyiookta.

17Má acĩnnaa nii nganĩĩt hĩ ꞌgoonu, hĩnĩngĩtĩ Krĩstõ, aꞌnyĩĩk Onethimo hikia haau hĩ nganiit, hĩcĩ occa baa hau harũmĩ naag hĩ nganiita. 18Má baa iggooli nẽẽ nganiit hode aꞌnyak ngabolo umwa cunni, ĩꞌnya hũdũman naana. 19Nganĩĩt Paaulo ꞌcĩ heheedi waraga icci attiaa caannĩ dẽẽdẽ. Hadũmannii hatĩ naa Paaulo nganiita. Nẽ occa hõllõngaa hothoothi haini, ꞌyioko baa hiittiõõ ngaatĩ heelli naa nganiit tõõ, occa baa nga mũda rũgẽt ꞌcĩ ĩĩn ngeju hĩ Krĩstõ! 20Ẽlẽ ꞌgõõna, dĩmaneehaa thõõth icci, hĩnĩngĩtĩ Makayyioohit. Aꞌnyaa nganĩĩt kũttan icci, hĩnĩngĩtĩ Krĩstõ. 21Hĩcĩ heheedi naa waraga icci ho, haga naa ngaatĩ hatĩ adĩmanĩĩ thõõth ꞌcĩ hajinnii ho jurrung nẽ occa hatĩ adĩmani hĩllõõan.

22Kũmaneeka ꞌcieeth umwa hikia haavvi. Haꞌnyahi muhẽẽnĩt ꞌcĩ abũnnaa haini, ẽdẽcĩ hatĩ Nyekuci laiinit cunni nẽ aaꞌnya hikia hicinii hĩdĩĩkoothong.

ꞌThaainit hĩ laiinit cĩ Paaulo ꞌcĩ udtuura

23Epavarato ciee harũmeenna baabuutha hõdẽĩ ho, hĩnĩngĩtĩ ĩĩn nẽẽ nuyyioohit cĩ Yeesu Krĩstõ. Ĩꞌthaayyi nẽẽ buúk nganiita, 24ĩꞌthaayyi Maarko buúk hĩ Arithtarko hĩ ꞌDẽẽma hĩ ꞌLuuka, ꞌcĩg hadticaniinna hõdẽĩ nganiita.

25Aꞌnyĩĩk bũnnai cĩ Makayyioohit Yeesu Krĩstõ haau hĩ ngagiita.

Currently Selected:

Vilõmẽẽnõ 1: did

Highlight

Compare

Copy